ރިޔާސީ އިންތިހާބާ ދިމާކޮށް އަންނަ އާދިއްތަ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސާފައިވާ ކަމަށް ރައީސް އޮފީހުން ބުނެފިއެވެ.
އެ އޮފީހުން ބުނީ، މިގޮތަށް ހަމަޖެއްސީ އެ ދުވަހުގެ ކުރިއަށް އޮތް ދުވަހަކީ ރިޔާސީ އިންތިހާބުގެ ވޯޓުލުން ކުރިއަށްދާ ދުވަސް ކަމުން އާދީއްތަަ ދުވަސް ވެގެން ދާނީ އިންތިހާބާ ގުޅުން ހުރި ކަންކަމުގައި ސަރުކާރުގެ މުވައްޒަފުންނާއި ގިނަ ރައްޔިތުންތަކެއް ބައިވެރިވާނެ ދުވަހެއް ކަމަށް ވާތީ ކަމަށެވެ. އަދި އެ ސަަބަބާ ހުރެ އިލެކްޝަންސް ކޮމިޝަނުން ވަނީ އެ ދުވަސް ސަރުކާރު ބަންދު ދުވަހެއްގެ ގޮތުގައި ހަމަޖައްސައި ދިނުމަށް ރައީސް އޮފީހުގައި އެދިފައި ކަމަށް ވެސް ބުނެފައި ވެއެވެ.
އަންނަ ހޮނިހިރު ދުވަހަކީ ރިޔާސީ އިންތިހާބުގެ ވޯޓުލާން ހަމަޖެހިފައިވާ ދުވަހެވެ. އެ ދުވަހު ވޯޓު ލުން ކުރިއަށް ދާ އިރު، ސްކޫލްތަކާއި، ކުޅިވަރު ކުޅޭ މަރުކަޒުތަކާއި މަލްޓިޕާޕަސް ހޯލްތައް ފަދަ ސަރުކާރުގެ އިމާރާތްތަކުގައި ވޯޓު ލުން ކުރިއަށް ގެންދަން ވަނީ ހަމަޖެހިފައެވެ.
ރިޔާސީ އިންތިހާބުގެ ފުރަތަމަ ބުރުގެ ރަސްމީ ނަތީޖާ އިއުލާން ކުރުން އޮންނާނީ އިންތިހާބު ކުރިއަށްދާ ހޮނިހިރު ފެށިގެން ހަތް ދުވަހުގެ ތެރޭގައެވެ. ދެވަނަ ބުރެއް ބާއްވަން ޖެހިއްޖެ ނަމަ ދެވަނަ ބުރު ބާއްވާނީ މި މަހުގެ 30 ވަނަ ދުވަހުގައެވެ. އަދި ދެވަނަ ބުރުގެ ރަސްމީ ނަތީޖާ އިއުލާން ކުރުން އޮންނާނީ ދެވަނަ ބުރުގެ އިންތިހާބު އޮންނަތާ ހަތް ދުވަހުގެ ތެރޭގައެވެ.
