ކުދި ފަންތީގެ ވިޔަފާރިތަކަށާއި މެދު ފަންތީގެ (އެސްއެމްއީ) ވިޔަފާރިތަކަށް ވަކިން އިސްލާމިކް ބޭންކެއް ގާއިމްކޮށް، އިސްލާމިކް ފައިނޭންސިން ކުދި ވިޔަފާރިތަކަށް ހާއްސަކޮށް ފުޅާކުރުމަށް އެމްޑީޕީގެ މެނިފެސްޓޯގައި ހިމަނައިފިއެވެ.
ސޯޝަލް ސެންޓަރުގައި ކުލަގަދަކޮށް އެމްޑީޕީން ބޭއްވި ޖަލްސާގައި ރޭ ވަނީ އެމްޑީޕީގެ "އުފާވެރި އަމާން ރާއްޖެ" މެނިފެސްޓޯގެ ފަހު ސިޔާސަތު ކަމަށްވާ "އިގްތިސާދީ ބޮޑު ބަދަލު" އިފްތިތާހު ކޮށްފައެވެ. މި ސިޔާސަތުގެ ދަށުން އެމްޑީޕީން ވަނީ ކުދި ވިޔަފާރިތަކަށް ކޮށްދޭނެ ބައެއް ކަންކަން ލިސްޓު ކޮށްފައެވެ. އެގޮތުން:
- އިސްލާމިކް ފައިނޭންސްގެ ހިދުމަތް ދިނުމަށް ކުދި ފަންތީގެ ވިޔަފާރިތަކަށް ހާއްސަ އިސްލާމިކް ބޭންކެއް ގާއިމް ކުރުމުން
- އެސްއެމްއީތަކަށް ދޫކުރާ ލޯނު ދިނުމުގައި ބަލާ މިންގަނޑު ލުއިކޮށް ވިޔަފާރިތަކަށް ހާއްސަ މިންގަނޑެއް ތައާރަފު ކުރުން
- ކުދި ވިޔަފާރިތަކަށް މާލީ އެހީ އިތުރަށް ދީ، ރެގިއުލޭޓަރީ ނިޒާމު ހަރުދަނާކުރުން
- ތިމާވެއްޓާ ރައްޓެހި ވިޔަފާރިތަކަށް ގްރީން ފައިނޭންސިން ފަދަ ހިދުމަތްތައް ތައާރަފު ކުރުން
- އެސްއެމްއީތަކާއި ސްޓާޓްއަޕްތައް އިންވެސްޓަރުންނާ ގުޅުވާލަދިނުމަށް ވަކި ޕްލެޓްފޯމެއް މެދުވެރިކޮށް ކްރައުޑް ފަންޑިން މެކޭނިޒަމެއް ގާއިމް ކުރުން
- އެންމެ ކުދި ވިޔަފާރިތަކަށް މާލީ އެހީތެރިކަން ފޯރުކޮށްދިނުމަށްޓަކައި ރަހުނާއި އިކުއިޓީ ނުލާ ފައިނޭންސިން ފޯރުކޮށްދިނުން ފުޅާކޮށް، މައިކްރޯފައިނޭންސިން ތައާރަފް ކުރުން، މިކަމުގައި ގޭގައި މަސައްކަތްކުރާ އަންހެނުންނަށާއި ޒުވާނުންނަށް ހާއްސަ އިސްކަމެއް ދޭނެ
މީގެ އިތުރުން އެސްއެމްއީ ވިޔަފާރިތައް ހަރުދަނާ ކުރުމަށްޓަކައި ތަފާތު ޕްރޮގްރާމްތައް އިތުރުކޮށް އިދާރީ، އީޖާދީ، ފަންނީ އަދި މާލީ އެހީތެރިކަން ފޯރުކޮށް ދިނުމާއި، އެސްއެމްއީ ހަބް ފަދަ އިތުރު ތަންތަން އެސްއެމްއީތަކަށް ގާއިމްކޮށް ކުޑަ އަގުގައި ވިޔަފާރިތަކަށް ދޫކުރުމަށް ވެސް، ކުދި ވިޔަފާރިތަކަށް އެމްޑީޕީން ކޮށްދޭން ވައުދުވި ކަންކަމުގެ ތެރޭގައި ހިމެނެއެވެ.
އަދި ކުދި ވިޔަފާރިތަކަށާއި އަމިއްލަ ވިޔަފާރިތަކުގެ ތެރެއިން ދެ މިލިއަން ރުފިޔާ އަށް ވުރެ މަދުން އާމްދަނީ ލިބޭ ވިޔަފާރިތައް ޖީއެސްޓީންނާއި ވިޔަފާރިތަކަށް ލިބޭ އާމްދަނީން ނަގާ ޓެކުހުން އިސްތިސްނާކޮށް، ހާއްސަ، އަގުހެޔޮ ޓެކުހުގެ ނިޒާމެއް ގާއިމްކުރުމާއި، ޒަމާނީ ޕޭމެންޓް ހިދުމަތްތައް ކުދި ވިޔަފާރިތަކަށް ފޯރުކޮށްދިނުމަށް ވެސް މެނިފެސްޓޯގައި ހިމަނާފައި ވެއެވެ.
