ރޭ ގދ. ގައްދޫގައި ބޭއްވި ޑިމޮކްރެޓްސްގެ ޖަލްސާގައި ވާހަކަފުޅު ދައްކަވަމުން ރައީސް މުހައްމަދު ނަޝީދު ދެއްކެވި ވާހަކަފުޅަށް ވަކީލުން މެދުވެރިކުރައްވާ ރައީސް އަބްދުﷲ ޔާމީން ރައްދު ދެއްވައިފިއެވެ.
ރައީސް ނަޝީދު ވިދާޅުވީ ޕީޕީއެމަށް މަސައްކަތް ކުރެވޭނަމަ ރައީސް ޔާމީން ޖަލުގައި ނުހުންނަވާނެ ކަމަށާއި މި ފަސް އަހަރު އެކީ ޖަލުގައި އެ ހުންނެވީ މިއަދު ޕީޕީއެމްގެ ލީޑަޝިޕްގައި ތިއްބެވި އެތައް ބޭފުޅުންނެއް އެގޮތަށް އެކަން އޮތުމަށް [ޔާމީން ޖެލުގައި ހުންނެވުމަށް] އެދިވަޑައިގެން ތިއްބެވީތީ ކަމަށެވެ. އަދި ޕީޕީއެމްގެ މެމްބަރުން އެމަނިކުފާނާ [ނަޝީދާ] ބައިވެރިވާން ނިންމާތާ ހަފްތާއެއްގެ ތެރޭގައި ޔާމީން ގެއަށް ގެނެސް ދެއްވާނެ ކަމަށްވެސް ނަޝީދު ވިދާޅުވިއެވެ.
ރައީސް ޔާމީން ޖަލުގައި ހުންނަވާތާ 1000 ދުވަސް ފާހަގަ ކުރުމަށް މިއަދު ހަވީރު އިދިކޮޅު ކޯލިޝަނުން މާލޭގައި ބޭއްވި ސައިކަލު ބުރު ނިންމާލުމަށް ފަހު ޑރ. މުހައްމަދު ޖަމީލް އަހުމަދު ވަނީ ޔާމީން ދެއްވި ހާއްސަ މެސެޖެއް ކަމަށް ވިދާޅުވެ، ވާހަކަ ދައްވާފައެވެ.
ޖަމީލު ވިދާޅުވީ ރައީސް ޔާމީން ގަބޫލުފުޅު ކުރައްވާ ގޮތުގައި އެ މަނިކުފާނަށް އަނިޔާ ދިނުމުގައި އިސްކޮށް ހުންނެވީ ރައީސް އިބްރާހިމް މުހައްމަދު ސޯލިހު ކަމަށާއި އެ ކަމުގައި ރައީސް ސޯލިހާ އެއްވަރަކަށް ޖޭއެސްސީގެ ތެރެއިން ރައީސް ނަޝީދު ބައިވެރި ވެވަޑައިގަންނަވާ ކަމަށެވެ. އަދި އަދި ހޯމް މިނިސްޓަރު އިމްރާން އަބްދުﷲ ވެސް އެ ކަމުގައި ބައިވެރި ވެވަޑައިގަންނަވާ ކަމަށް ޑރ. ޖަމީލު ވިދާޅުވިއެވެ.
ޖަމީލު އިތުރަށް ވިދާޅުވީ ޑިމޮކްރޭޓުން "ޖަހާ ސަކަރާތުގައި" ޕީޕީއެމްގެ އެއްވެސް މެމްބަރަކު ބައިވެރި ނުވުމަށް ރައީސް ޔާމީން އިލްތިމާސް ކުރައްވާ ކަމަށެވެ.
ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީލޯންޑަރިިންގެ ކުށް ޔާމީންގެ މައްޗަށް ސާބިތުވެ 11 އަހަރަށް ޖަލަށް ލުމާއި 5 މިލިއަން ޑޮލަރުން ޖޫރިމަނާ ކުރުމަށް ކްރިމިނަލް ކޯޓުން ހުކުމް ކުރީ މިދިޔަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ. އަދި ހުކުމްގައި ހިމެނޭ ޖޫރިމަނާ ފައިސާ 6 މަސްދުވަހުގެ ތެރޭގައި ދެއްކުމަށްވެސް ދަށު ކޯޓު ހުކުމްގައި ވެއެވެ.
މި މައްސަލަ އިސްތިއުނާފް ކުރަން ޔާމީންގެ ފަރާތްޕުޅުން މަސައްކަތް ކުރި ނަމަވެސް އެ މައްސަލަ ދިގު ދެމިގެން ދިޔުމުން ރިޔާސީ އިންތިހާބުގައި ވާދަކުރެއްވުމުގެ ފުރުސަތު ރައީސް ޔާމީނަށް ގެއްލުނެވެ. އެހިސާބުން ޔާމީން ސުޕްރީމް ކޯޓަށް ހުށަހެޅި މައްސަލައިގައި ޔާމީންގެ ޝަރުތު ފުރިހަމަ ނުވާ ކަމަށް އެ ކޯޓުން ވަނީ ނިންމާފައެވެ.
ޖަލު ހުކުމާ ހެދި ޔާމީންގެ ޝަރުތު ގެއްލި ރިޔާސީ އިންތިހާބުގައި އެމަނިކުފާނަށް ވާދަނުކުރެއްވޭ ގޮތް މެދުވެރިވުމުން ޔާމީން އެދިވަޑައިގަތީ ރިޔާސީ އިންތިހާބު ބޮއިކޮޓް ކުރުމަށެވެ. އެކަމަކު ޕީޕީއެމްގެ ސެނެޓުން އިންތިހާބުގައި ވާދަކުރަން ނިންމުމުން ޕާޓީ ތެރޭގައި ހިޔާލު ތަފާތުވުން އުފެދުނެވެ. އެ ހިޔާލު ތަފާތުވުން އޮތް ނަމަވެސް ޕީއެންސީގެ ފަރާތުން މުއިއްޒު ވަނީ ރިޔާސީ އިންތިހާބުގައި ވާދަކުރައްވަން ނިންމައި އީސީއަށް ފޯމް ހުށަހަޅުއްވާފައެވެ. އަދި ޕީޕީއެމް އާއި ޕީއެންސީގެ ލީޑާޝިޕުން ވަނީ މުއިއްޒުގައި ފަހަތަށް އަރާފައެވެ.
ނަޝީދަކީ ވަރަށް ދެފުށްކެހެރި މީހެއްތާ……!!!
ރ. އިބުރާހިމާ ރ. ނަޝީދު ބައިވެރިވާތާ އެއްގަލުން ފެހިކައިގެން އުޅޭ ބައެއް އެއީ، ރ. ނަޝީދު ވަކިކާޑު ހަދައިގެން ވަކިވެގެން އުޅުނަކަސް އެއީ ހަމަ އެކައްޗެއް މި އިންތިޚާބުތެރޭގާ އަނެއްކާވެސް އެއްގަލުން ފެހިކާން ފަށާނެ، ރ. މައުމޫނަކަސް ރ. ނަޝީދަކަސް ރައީސް އިބުރާހިމަކަސް ބުރުމާ އަކަސް ނާޒިމަކަސް ދެންހުރި މީހަކަސް މީހަމަ އެކައްޗެއް، ހަސަދަނޫން އެއްޗެއް ނޯންނާނެ،