މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ކުރީގެ ރައީސް މައުމޫން އަބްދުލްގައްޔޫމާ ދެކޮޅަށް ހައި ކޯޓަށް ހުށަހެޅި މައްސަލަ ބަލައި ނުގަނެ ބޭރުކޮށްލައިފިއެވެ.
ސިވިލް ކޯޓުން 2010 ވަނަ އަހަރު ވަނީ، ޑީއާރްޕީން އެމްޓީސީސީއަށް 1،113،587.96ރ. ދައްކަން ޖެހޭ ކަމަށް ހުކުމެއް ކޮށްފައެވެ. އަދި އެ ފައިސާ ހުކުމާ އެއްގޮތަށް ޑީއާރްޕީން ދައްކާފައި ނުވާއިރު އެ ޕާޓީއިން ލިބިފައި ވަނީ 2،609.33ރ އެވެ. އަދި ޑީއާރްޕީ އުވާލި އިރު ނުދައްކާ ބާކީ ހުރި ފައިސާ ހޯދުމަށް އެމްޓީސީސީ އިން މައުމޫނާ ދެކޮޅަށް ދައުވާ ކޮށްފައި ވަނީ ސިޔާސީ ޕާޓީތަކުގެ ގަވައިދުގައި ޕާޓީގެ ދަރަންޏަށް ޒިންމާވާނީ ޕާޓީ އުފެދުނު އިރު ހުރި ޕާޓީގެ އެންމެ އިސް ފަރާތް ކަމަށް ބުނާ މާއްދާއާ ހަވާލާދީއެވެ.
އެމްޓީސީސީއިން ސިވިލް ކޯޓަށް މި މައްސަލަ ހުށަހަޅާފައި ވާއިރު އެ ކޯޓުން ވަނީ ޑީއާރްޕީގެ ދަރަނި މައުމޫނު ދައްކަވަން ނުޖެހޭނެ ކަމަށް މި މަހުގެ 2 ވަނަ ދުވަހު ހުކުމް ކޮށްފައެވެ. އަދި އެ ކުންފުނީގެ ފަރާތުން މި މައްސަލަ ހައިކޯޓުގައި އިސްތިއުނާފު ކުރުމުން އެ ކޯޓުގެ ރަޖިސްޓްރާ ވަނީ މި މައްސަލަ އިސްތިއުނާފަށް ހުށަހެޅީ ވަގުތު ފާއިތުވި ފަހުން ކަމަށް ބުނެ މައްސަލަ ބަލައިނުގަތުމަށް ނިންމާފައެވެ.
ހައިކޯޓުގެ މި ނިންމުމުގައި ބުނެފައި ވަނީ މި މައްސަލަ އިސްތިއުނާފު ކުރަން މިމަހުގެ 9 އެއްގެ ނިޔަލަށް ހުށަހަޅަން ޖެހޭ ކަމަށާ، އެހެންނަމަވެސް މި މައްސަލަ އިސްތިއުނާފް ކުރުމަށް ހުށަހަޅާފައި ވަނީ، މިމަހުގެ 10 ވަނަ ދުވަހު އީމެއިލް މެދުވެރިކޮށް ކަމަށެވެ. އެހެންކަމުން މި މައްސަލަ ބަލައިނުގަތުމަށް ހައިކޯޓުން ވަނީ ނިންމާފައެވެ.
