ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޖިލީހުގެ އިމްތިޔާޒަށް އަރައިގަތް ކަމަށް ބުނާ މައްސަލައެއް ހުށަހަޅައި، އެ މައްސަލަ އަށް ބަހުސްކުރަން ފަށައިފިއެވެ.
އެ މައްސަލަ ހުށަހަޅުއްވަމުން މަރަދޫ ދާއިރާގެ މެންބަރު އިބްރާހީމް ޝަރީފް ވިދާޅުވީ، ރައްޔިތުންގެ މަޖިލީހުގެ ގަވައިދުގައިވާ ގޮތުން، މަޖިލީހުގެ ނައިބު ރައީސް އީވާ އަބްދުﷲ ގެ އިތުބާރު ނެތް ކަމުގެ މައްސަލައިގެ ނޯޓިސް ހަމަވުމަށް ފަހު ބާއްވާ ޖަލްސާގެ ރިޔާސަތު ބަލަހައްޓަވަން ޖެހޭނީ ނަޝީދު ކަމުގައިވީ ނަމަވެސް، ރިޔާސަތު ބަލަހައްޓަން އެމަނިކުފާނު އިންކާރު ކުރައްވާފައިވާ ކަމަށެވެ.
ނަމަވެސް ރިޔާސަތާ ހަވާލުވެވަޑައި ނުގެން، މަޖިލީހުގެ އެހެނިހެން ހަރަކާތްތަކުގައި ނަޝީދު އުޅުއްވިކަން ޝަރީފް ފާހަގަކުރެއްވިއެވެ.
އޭނާ ވިދާޅުވި ގޮތުގައި، ނަޝީދު މަޖިލީހުގެ ގަވައިދާ ހިލާފުވެ، ޖަލްސާ ކުރިއަށް ގެންދެވޭ ގޮތް ވަނީ ނުވެފައެވެ. އެހެންކަމުން މިއީ މަޖިލީހުގެ އިމްތިޔާޒަށާއި ހައްގަށް އަރައިގަތުން ކަމަށް، ޝަރީފް ވިދާޅުވިއެވެ.
މި މައްސަލަ އަށް ބަހުސްކުރުމަށް ފެނޭތޯ ވޯޓަށް އެހުމުން، ވޯޓުގައި ބައިވެރިވި 50 މެންބަރުންގެ ތެރެއިން 37 މެންބަރުންގެ އިއްތިފާގުން މި މައްސަލަ އަށް ބަހުސްކުރުމަށް ވަނީ ފާސްވެފައެވެ. ނުފެންނަ ކަމަށް ވޯޓު ދެއްވީ 13 މެންބަރުންނެވެ.
މަޖިލީހުގެ ގަވައިދުގައިވާ ގޮތުން، އިމްތިޔާޒްގެ މައްސަލަ އެއް ހުށަހެޅި ކުރިއަށްދާ ހިނދު، އެހެން މަސައްކަތަކަށް ވުރެ އެ މައްސަލައަށް އިސްކަން ދޭން ޖެހޭނެއެވެ.
