މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ސެންޓާ ފޯ ހަޔާ ސެކަންޑަރީ އެޑިއުކޭޝަން (ސީއެޗްއެސްއީ) ގެ މެރިޓް އެވޯޑް ސްޕޮންސާ ކުރުމުގެ އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމަކީ، އެމްއޭސީއެލްގެ އިޖުތިމާއީ ޒިންމާގެ ދަށުން ކުރިއަށްގެންދާ ހަރަކާތްތަކުގައި ހިމެނިގެން ތައުލީމީ ދާއިރާގެ ކުރިއެރުމަށް ކުރާ މަސައްކަތްތަކުގެ ތެރޭގައި ހިމެނޭ ކަމެއް ކަމަށް އެމްއޭސީއެލްއިން ބުނެއެވެ.
އެމްއޭސީއެލްއިން ބުނީ، މި އެއްބަސްވުމުގެ ދަށުން ސީއެޗްއެސްއީގެ ގްރޭޑް 11 ނިންމާ ދަރިވަރުންގެ ތެރެއިން އެންމެ މަތީ ފާސް ހޯދާ ދަރިވަރުންނަށް ހިތްވަރު ދިނުމާއިއެކު އިތުރު ފުރުސަތުތައް ފަހިކޮށްދެވޭނެ ކަމަށެވެ. އެމްއޭސީއެލްއިން ވަނީ ތިން އަހަރު ދުވަހަށް މެރިޓް އެވޯޑް ސްޕޮންސާ ކޮށްފައެވެ.
"އެމްއޭސީއެލް މެރިޓް އެވޯޑްގެ" ދަށުން ސީއެޗްއެސްއީގެ ގްރޭޑް 11ގައި ކިޔަވަމުންދާ ދަރިވަރުންގެ ތެރެއިން އަންހެން ދެ ދަރިވަރުން އަދި ފިރިހެން ދެ ދަރިވަރަކަށް ކޮންމެ އަހަރަކު މި އެވޯޑް ލިބިގެންދާނެއިރު މި ދަރިވަރުންނަށް އެމްއޭސީއެލް ހިންގަމުން އަންނަ ވެލާނާ އިންޓާނޭޝަނަލް އެއާޕޯޓުގައި އެކުއްޖަކު ޝައުގުވެރިކަން ހުރި ދާއިރާއަކުން މަސައްކަތުގެ ތަޖުރިބާއާއި ތަމްރީނު ހޯދުމުގެ ފުރުސަތު ފަހިވެގެންދާނެ ކަމަށް އެމްއޭސީއެލްއިން ބުނެއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ކުންފުނީގެ ސީއީއޯ އަދި އެމްޑީ މަހްޖޫބު ޝުޖާއު ވިދާޅުވީ، މި އެވޯޑުގެ އަމާޒަކީ ކުދިންގެ ކިޔެވުމުގައި ހޯދާ ކާމިޔާބީ ފާހަގަކުރުމުގެ އިތުރުން މިފަދަ ކާމިޔާބީ ހޯދާ ދަރިވަރުންނަށް ފަހި ފުރުސަތުތައް ހޯދައިދިނުން ކަމަށެވެ. އަދި އެމްއޭސީއެލްގައި އެ ދަރިވަރުންނަށް ވަޒީފާގެ ތަމްރީނާއި ތަޖްރިބާ ފޯރުކޮށްދިނުމަކީ އެމްއޭސީއެލްގެ މުހިންމު މަގުސަދެއް ކަމަށާއި، އުންމީދުކުރަނީ ކިޔަވާ ނިންމުމަށްފަހު އެމްއޭސީއެލްގެ ވަޒީފާއާއި ގުޅޭ ދަރިވަރުންގެ ނިސްބަތް އިތުރުވެގެން ދިޔުން ކަމަށް އެމްޑީ ވިދާޅުވިއެވެ.
އެމްއޭސީއެލް އިން ބުނީ، އެމްއޭސީއެލްގެ އިޖްތިމާއީ ޒިންމާގެ ދަށުން ހިންގާ މި ޕްރޮގްރާމަކީ، ތައުލީމީ ގޮތުން ކުރިއެރުމަށް ދަރިވަރުންނަށް ހިތްވަރު ދިނުމުގެ އިތުރުން ގައުމަށް ބޭނުންވާ ހިންގުންތެރި އިސްވާރުން އުފެއްދުމަށް އެޅޭ މުހިންމު ފިޔަވަޅެއް ކަމަށެވެ.
މެރިޓް އެވޯޑް ސްޕޮންސާ ކުރުމުގެ އެއްބަސްވުމެއްގައި އެމްއޭސީއެލްގެ ފަރާތުން ސޮއިކުރެއްވީ، ކުންފުނީގެ ސީއީއޯ އަދި އެމްޑީ މަހްޖޫބު ޝުޖާއުއެވެ. އަދި ސީއެޗްއެސްއީގެ ފަރާތުން ސޮއިކުރެއްވީ، އެސްކޫލުގެ ޕްރިންސިޕަލް އާއިޝަތު ސަފޫރާއެވެ.
