ޝަރުއީ ނިޒާމު ހިނގަމުންދަނީ ރައީސް އިބްރާހިމް މުހައްމަދު ސޯލިހް ބޭނުންފުޅުވާ ގޮތަށް ކަމަށާއި ޖުޑީޝަލް ސާވިސް ކޮމިޝަން (ޖޭއެސްސީ) މެދުވެރިކޮށް ކުރީގެ ރައީސް އަބްދުﷲ ޔާމީންގެ މައްސަލައަށް ނުފޫޒު ފޯރުވަމުންދާ ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ.
އެމްއެމްޕީއާރްސީގެ ހިޔާނާތުގެ މައްސަލައިގައި ޖަލު ހުކުމެއް ތަންފީޒު ކުރައްވަމުން ގެންދަވާ ޔާމީނަށް އަނިޔާކުރާ ކަމަށް ބުނެ، އެކަމުގެ ކަންބޮޑުވުންތަކާ އެކު، އިދިކޮޅު ޕްރޮގްރެސިވް ކޮންގްރެސް ކޯލިޝަންގެ ލީޑަޝިޕްގެ ބޭފުޅުން ވަނީ މިއަދު ރައީސް އޮފީސް ދޮށަށް ވަޑައިގެންފައެވެ.
ރައީސް އޮފީހުން ނުކުމެވަޑައިގެން ނޫސްވެރިންނާ ބައްދަލުކުރައްވާ ޝިޔާމް ވިދާޅުވީ، ރައީސް އިބްރާހިމް މުހައްމަދު ސޯލިހާ ބައްދަލުކުރައްވަން ރައީސް އޮފީހަށް ވަޑައިގެން ނަމަވެސް އެމަނިކުފާނާ ބައްދަލުވެ ވަޑައިނުގަތް ކަމަށާއި އެޕޮއިންޓްމަންޓަކަށް އެދުމަށް ދެއްވީ އީމެއިލް އެޑްރެހެއް ކަމަށެވެ.
ޝަރުއީ ނިޒާމު ހިނގަމުން ދަނީ ރައީސް ސޯލިހް ބޭނުންފުޅުވާ ގޮތަށް ކަމަށާއި ޖޭއެސްސީގެ މެދުވެރިކޮށް ރައީސް ޔާމީންގެ މައްސަލައަށް ނުފޫޒު ފޯރުވަމުންދާ ކަމަށް ވެސް ޝިޔާމް ވަނީ ވިދާޅުވެފައެވެ.
ޝިޔާމް އިތުރަށް ވިދާޅުވީ، ޔާމީނަށް ދޭ އަނިޔާ އަކީ ރައްޔިތުންނާއި ގައުމަށް ދޭ އަނިޔާއެއް ކަމަށާއި ޔާމީނަށް އަނިޔާދިނުން ހުއްޓާލަންޖެހޭ ކަމަށެވެ. އަދި ޔާމީންގެ ޝަރީއަތްތައް ކުރިއަށް ގެންދަނީ އެމަނިކުފާނުގެ ވަކީލުންނާ ވެސް ބައްދަލުކުރުމުގެ ފުރުސަތެއް އަދި ވަގުތެއް ވެސް ނުދީ ކަމަށް ވެސް ޝިޔާމް ވިދާޅުވިއެވެ.
ރައީސް ޔާމީނަށް އަނިޔާކުރާ ކަމަށް ބުނެ، އިދިކޮޅުން ވެލާނާގެ ސަރަހައްދުގައި މިއަދު މުޒާހަރާކޮށްފައިވާއިރު އެ ސަރަހައްދުން އެމީހުން ދުރުކުރުމުގެ މަސައްކަތް އެސްއޯ ފުލުހުންނާއި ސިފައިން ވަނީ ކޮށްފައެވެ.
ޔާމީން މިހާރު ވެސް ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރިންގެ ކުށް ސާބިތުވުމާ ގުޅިގެން ޔާމީނަށް ވަނީ އެ ދެ މައްސަލައިގައި 11 އަހަރުގެ ޖަލު ހުކުމެއް މިދިޔަ ޑިސެމްބަރު މަހުގެ 25 ގައި އިއްވާފައެވެ. އޭގެ ދެ މަސް ފަހުން ކުއްލި ގޮތަކަށް ކުރިމިނަލް ކޯޓުން ވަނީ 52.6 މިލިއަން ރުފިޔާ ހަ މަސް ދުވަހުގެ ތެރޭގައި ދައުލަތަށް ދެއްކުމަށް ޔާމީންގެ މައްޗަށް އަމުރު ކުރި ނަމަވެސް އެ އަމުރު ހައި ކޯޓުގައި އިސްތިއުނާފު ކުރުމުން ހައިކޯޓުން ވަނީ ބާތިލު ކޮށްފައެވެ.
މީގެ އިތުރުން ކްރިމިނަލް ކޯޓުން އިއްވި 11 އަހަރުގެ ޖަލު ހުކުމުގެ އިސްތިއުނާފް މައްސަލަ ވެސް މިހާރު ވަނީ ހައިކޯޓަށް ބަލައިގެންފައެވެ.
