ރައްޔިތުންގެ މަޖިލީހުގެ ގަދަރާއި އިއްޒަތަށް އަރައިނުގަތުމަށް މެންބަރުންނަށް އިލްތިމާސްކުރައްވައި، މަޖިލީހުގެ އަމީންއާންމާއި ކައުންސެލް ޖެނެރަލްގެ ގަދަރާއި އިއްޒަތަށް އަރައިގަންނަކަން ފާހަގަކުރައްވައި، މަޖިލީހުގެ ރައީސް މުހައްމަދު ނަޝީދު މިއަދު ކަންބޮޑުވުން ފާޅުކުރައްވައިފިއެވެ.
ވެރިކަންކުރާ އެމްޑީޕީން މަޖިލީހުގެ 13 މެންބަރަކު ވަކިވެ، މެންބަރުން މަޖިލީހުގައި ތަމްސީލުކުރާ ގޮތަށް ބަދަލު އައުމުން، މަޖިލީހުގެ ދާއިމީ ކޮމިޓީތައް އަލުން އެކުލަވާލަން ޖެހުނު ނަމަވެސް، ކޮމިޓީތައް އެކުލަވާނުލެވި އޮތުމުގެ ސަބަބުން، ކޮމިޓީތަކުގެ މަސައްކަތްތައް ތިން ހަފްތާ ވަރު ވަންދެން ވަނީ ހުއްޓިފައެވެ. އެއާއެކު، މަޖިލީހުގެ ނައިބު ރައީސް ކަމުން ގަލޮޅު އުތުރު ދާއިރާގެ މެންބަރު އީވާ އަބްދުﷲ ވަކިކުރުމުގެ މައްސަލަ ވެސް އޮތީ ހުއްޓިފައެވެ.
ކޮމިޓީތައް އެކުލަވާލެވުން ލަސްކުރަނީ ނަޝީދު، އީވާގެ މައްސަލަ ހުއްޓުވާފައި ބޭއްވުމަށް ކަމަށް، އެމްޑީޕީން ދަނީ ތުހުމަތުކުރަމުންނެވެ. ނަމަވެސް، ކޮމިޓީތަކުގެ އެކުލަވާލެވުން ލަސްވެފައި ވަނީ، އެމްޑީޕީގެ މަޖިލިސް ގްރޫޕްގެ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އެދިވަޑައިގަތުމުން ކަމަށް، މަޖިލީހުގެ އަމީންއާންމު ފާތިމަތު ނިއުޝާ ސޮއިކުރައްވައި، ރޭ އާންމުކުރެއްވި ސިޓީއެއްގައި ވިދާޅުވިއެވެ.
ނަމަވެސް އަސްލަމް ވިދާޅުވި ގޮތުގައި، ކޮމިޓީތަކަށް ބަދަލު ގެންނަން އެދިވަޑައިގަތީ، މަޖިލީހުގެ ކޮމިޓީތަކުގެ މެޖޯރިޓީ އެމްޑީޕީ އަށް ގެއްލޭ ގޮތަށް ކޮމިޓީތައް އެކުލަވާލުމުގެ މަސައްކަތް ކުރިއަށް ނުގެންދިއުމަށެވެ.
އެމްޑީޕީން ގަބޫލުކުރާ ގޮތުގައި، މަޖިލީހުގެ ދާއިމީ ކޮމިޓީތައް ދެމި އޮންނާނެތީ، އާންމު ކޮމިޓީގެ ބައްދަލުވުން އަމީންއާންމު އިންތިޒާމުކުރައްވަން ޖެހެއެވެ. އެކަމަކު ގަވައިދާ ހިލާފަށް ނިއުޝާ އެކަން ނުކުރައްވާ ކަމަށް ބުނެ، އެމްޑީޕީގެ މެންބަރުން ދަނީ ނިއުޝާ އަށް ފާޑުކިއުންތައް އަމާޒުކުރަމުންނެވެ.
އެކަމާ ގުޅިގެން ނެރުނު ބަޔާނެއްގައި ނަޝީދު ވިދާޅުވީ، މަޖިލީހުގެ ގަވައިދުގައި އަމީންއާންމަށާއި ކައުންސެލް ޖެނެރަލަށް ހާއްސަ މިނިވަން ކަމެއް ދީފައި އޮންނަ ކަމަށާއި، މިވަގުތު އެމަނިކުފާނާއި އީވާގެ މައްސަލަ މަޖިލީހަށް ވައްދާފައިވުމުން، ކަންކަން ހިންގަން ޖެހޭ އިޖުރާއަތުތައް، މަޖިލީހުގެ ގަވައިދުގައި ސާފުކޮށް ބަޔާންކޮށްފައިވާ ކަމަށެވެ.
އެމަނިކުފާނު ވިދާޅުވި ގޮތުގައި، އެ އިޖުރާއަތުތައް ބަޔާންކޮށްދިނުމުގައި އެހީތެރިކަން އަމީންއާންމާއި ކައުންސެލް ޖެނެރަލްގެ ފަރާތުންކަން، ގަވައިދުގައި ސާފުކޮށް ބަޔާންކޮށްފައިވެއެވެ.
ހަމަ އެއާއެކު، މަޖިލީހުގައި ތަމްސީލުކުރާ ސިޔާސީ ޕާޓީތަކުގެ މެދުގައި ވާދަވެރިކަން އުފެދިފައި އޮތް ނަމަވެސް، ގާނޫނީ ދައުލަތެއް ހިންގުމަކީ މެންބަރުންގެ ވާޖިބެއް ކަން ނަޝީދު ހަނދާން ކޮށްދެއްވިއެވެ.
"ވީމާ، ރައްޔިތުންގެ މަޖިލީހުގެ އަމީންއާންމު އާއި، އެހެނިގެން އޮފިޝަލުންގެ ގަދަރާއި އިއްޒަތަށް އަރައިގަތުމުގެ ޖާގަ އެއްވެސް މިންވަރަކަށް ދެވިގެން ނުވާނެ،" ބަޔާން ނިންމަވާލައްވަމުން ނަޝީދު ވިދާޅުވިއެވެ.
ނަޝީދުގެ އިތުބާރު ނެތް ކަމުގެ މައްސަލަ މަޖިލީހަށް ހުށަހަޅާފައި ވާތީ، ރިޔާސަތު ބެލެހެއްޓުމަށް އެމަނިކުފާނު އުޒުރުވެރިވެވަޑައިގަންނަވާ ކަމަށް، އަމީންއާންމަށް އެމަނިކުފާނު މިއަދު ފޮނުއްވި ސިޓީއެއްގައި ވިދާޅުވިއެވެ.
