ހުޅުމާލެ ސްމާޓް ސިޓީއެއްގެ ގޮތުގައި ތަރައްގީކޮށް، އީޖާދީ އީކޯސިސްޓަމެއް ގާއިމްކުރުމުގެ މަސައްކަތްކުރުމާ ގުޅޭ އެއްބަސްވުމެއްގައި އާބަންކޯ އިން އިންޑިއާގެ ޓީ-ހަބް ކުންފުންޏާ އެކު ސޮއިކޮށްފިއެވެ.
އާބަންކޯގެ އޮފީހުގައި މިއަދު ބޭއްވި ރަސްމިއްޔާތެއްގައި، މިކަމާ ގުޅޭ އެއްބަސްވުމުގައި ސޮއިކުރެއްވީ އެ ކޯޕަރޭޝަންގެ ފަރާތުން މެނޭޖިން ޑިރެކްޓަރު އަހްމަދު އާތިފެވެ. ޓީ-ހަބްގެ ފަރާތުން ސޮއިކުރެއްވީ އެ ކުންފުނީގެ ޗީފް ޑެލިވަރީ އޮފިސަރު އާނިޝް އެންތަނީއެވެ.
އެއް އަހަރު ދުވަހުގެ މި އެއްބަސްވުމުގެ ދަށުން އާބަންކޯ އާއި ޓީ-ހަބް ކުންފުންޏާ ދެމެދު ޓެކްނޮލޮޖީ ބަދަލުކުރެވި، ހުޅުމާލެ ސްމާޓް ސިޓީއެއްގެ ގޮތުގައި ތަރައްގީކުރުމަށް ދެ ފަރާތުން ގުޅިގެން މަސައްކަތްކުރެވޭނެ ކަމަށް، އާބަންކޯ އިން ބުންޏެވެ.
އެ ކޯޕަރޭޝަނުން ބުނީ، ހުޅުމާލެ ރާއްޖޭގެ އެންމެ ފުރަތަމަ ސްމާޓް ސިޓީ އަށް ހެދުމަށްޓަކައި އެ ކޯޕަރޭޝަންގެ ސްމާޓްކޮމް ބްރޭންޑުން ދަނީ އެ މަސައްކަތަށް ބޭނުންވާ ޑިޖިޓަލް ވަސީލަތްތައް ގާއިމްކޮށް، ޒަމާނީ ޓެކްނޮލޮޖީގެ އެހީގައި ތަފާތު ސިޓީ ސޮލިއުޝަންތައް ތައާރަފްކުރަމުން ކަމަށެވެ.
