ޓެކްސްއާ ގުޅޭ މައްސަލަތައް ހައްލުކުރުމަށް ރާއްޖެ އާއި މެލޭޝިއާއިން އެއްބާރުލުން ދިނުމުގެ އެއްބަސްވުމެއްގައި ސޮއިކޮށްފިއެވެ.
ފިނޭންސް މިނިސްޓްރީން ބުނީ، މިއީ ދެގައުމުގެ ދެމެދު ކުރެވޭ ވިޔަފާރި މުއާމަލާތްތަކުން އެއް އާމްދަނީއަކުން ދެފަހަރު ޓެކްސް ކުރުން ހުއްޓުވާ، ޓެކުހާގުޅޭ މައުލޫމާތުތައް ބަދަލުކުރުމަށް މަގުފަހިކުރާ އެއްބަސްވުމެއް ކަމަށެވެ.
މީގެ އިތުރުން ޓެކްސްއަށް މަކަރު ހެދުން ހުއްޓުވުމަކީ ވެސް މި އެއްބަސްވުމުން ހާސިލުވާނެ މަގްސަދެއް ކަމަށް މިނިސްޓްރީން ފާހަގަކުރެއެވެ. މި އެއްބަސްވުމުގެ ސަބަބުން ދެ ގައުމުގެ ދެމެދުގައި ވިޔަފާރިއާއި އިންވެސްޓްމެންޓް އިތުރަށް ވަރުގަދަވެގެންދާނެ ކަމަށް ވެސް މިނިސްޓްރިން ބުނެއެވެ.
މެލޭޝިއާގެ ޕާލިމެންޓް ބިލްޑިންގައި ބޭއްވި ރަސްމިއްޔާތެއްގައި މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މާލީ ވަޒީރު އިބްރާހިމް އަމީރެވެ. އަދި މެލޭޝިއާގެ ފަރާތުން ސޮއި ކުރެއްވީ ޑެޕިއުޓީ ފޮރިން މިނިސްޓަރު އަހުމަދު މަސްލާންއެވެ.
މި އެއްބަސްވުމުގައި ސޮއިކުރައްވާފައިވަނީ އަމީރު މެލޭޝިޔާއަށް މިހާރު ކުރައްވަމުން ގެންދަވާ ދަތުރުގެ ތެރެއިންނެވެ.
މިއީ ޑަބަލް ޓެކްސް ނެގުން ހުއްޓުވުމާއި ޓެކްސްއަށް މަކަރު ހެދުން ހުއްޓުވުމާ ދެކޮޅަށް ރާއްޖެއިން ބައިނަލްއަގްވާމީ ގައުމަކާއި ސޮއިކުރި 3 ވަނަ ފަހަރެވެ.
