ސޮވަރިން ޑިވެލޮޕްމަންޓް ފަންޑް (އެސްޑީއެފް) ބެލެހެއްޓުމުގެ ހުރިހާ ބާރެއް ފިނޭންސް މިނިސްޓަރަށް ލިބިގެންވާ ގޮތަށް ގާނޫނީ ބާރު ދޭން ސަރުކާރުގެ ފަރާތުން ހުށަހެޅި އިސްލާހު، ރައްޔިތުންގެ މަޖިލީހުން ފާސްކޮށްފިއެވެ.
43 މެންބަރުންގެ ވޯޓާއެކު މިއަދު މަޖިލީހުން އެ ބިލް ފާސްކޮށްފައި ވާއިރު އެއީ މިދިޔަ އަހަރު ރައްޔިތުންގެ މަޖިލީހުގެ ދެވަނަ ދައުރުގައި ހުށަހެޅި ބިލެކެވެ. ފުވައްމުލަކު ދެކުނު ދާއިރާގެ މެންބަރު، މުހައްމަދު މުމްތާޒް ހުށަހެޅުއްވި އެ ބިލުގައި ހިމެނޭ މުހިންމު އިސްލާހަކީ އެސްޑީއެފް އަށް ގާނޫނީ ބާރުދޭން ހުށަހެޅި މާއްދާތަކެވެ. އެ މާއްދާތަކުގައި ހިމެނެނީ:
- އެ ފަންޑް ބެލެހެއްޓުމުގެ ހުރިހާ ކަމެއް ކުރާނީ ފިނޭންސް މިނިސްޓްރީން ކަން
- އެސްޑީއެފްއަށް ފައިސާ ޖަމާކުރުމާއި އެ ފަންޑުން ހަރަދުކުރާނެ ގޮތް ނިންމާނީ ފިނޭންސް މިނިސްޓަރުގެ ލަފާގެ މަތިން ރައީސް
މިހާރު، ފަންޑަށް ފައިސާ ޖަމާކުރުމާއި ހަރަދު ކުރުމާ ގުޅޭ ހުރިހާ ނިންމުމެއް ނިންމަނީ ފިނޭންސް މިނިސްޓަރުގެ އިތުރުން ރައީސް އެވެ. އެސްޑީއެފްއާ ގުޅޭ ގޮތުން މާލިއްޔަތު ގާނޫނަށް އިތުރު ކުރަން ބިލުގައި އިތުރު މާއްދާތަކެއް ހުށަހަޅާފައިވެއެވެ. އެގޮތުން މާއްދާތަކުގެ ތެރޭގައި، އޮޑިޓްކޮށް ހިސާބުތައް ތައްޔާރުކުރަން ޖެހުމާއި، ސޮވަރިން ފަންޑް އިންވެސްޓް ކުރާނެ ގޮތްތައް ނިންމަން ރައީސް ފަސް މެންބަރުންގެ ކޮމިޓީއެއް އެކުލަވާލަން ޖެހުމާއި، އެ ކޮމިޓީ އެކުލަވާލަން ޖެހެނީ ފިނޭންސް މިނިސްޓަރުގެ ލަފާގެ މަތިންކަމާއި، އެސްޑީއެފް ހިންގާނެ އުސޫލުތައް މާލިއްޔަތު ގަވާއިދުގައި ލިޔަން ޖެހުން އަދި އެސްޑީއެފްގެ ފައިސާ ބަހައްޓަން ޖެހޭނީ އެމްއެމްއޭގައި ވަކި ހާއްސަ އެކައުންޓެއް މެދުވެރިކޮށް ކަމުގެ އިތުރުން ޕަބްލިކް ބޭންކް އެކައުންޓާއި އެސްޑީއެފް އެއްކޮށްގެން ނުވާނޭ ކަމުގެ މާއްދާއެވެ.
2017 ވަނަ އަހަރު ހެދި އެސްޑީއެފްއާ ފަންޑާ ގުޅޭ އެއްވެސް މާއްދާއަކަށް މަޖިލީހުގެ މާލިއްޔަތު ކޮމިޓީ އިންވެސް ބަދަލު ގެނެސްފައެއް ނުވެއެވެ. އަދި މަޖިލީހުގެ ތަޅުމުންވެސް އެއްވެސް އިސްލާހެއް ހުށަހަޅާފައި ނުވެއެވެ. މިވަގުތު އެސްޑީއެފްގެ ބެލެނިވެރި ފަރާތަކީ އެމްއެމްއޭ ކަމަށްވީ ނަމަވެސް މި ބިލު ފާސްކުރުމާއެކު އެސްޑީއެފްއަކީ މާލިއްޔަތު ގާނޫނުގައިވާ ވަކި އުސޫލުތަކެއްގެ ދަށުން ބަލަހައްޓަން ޖެހޭ ފަންޑަކަށް ވެގެންދާނެއެވެ.
އޮޑިޓާ ޖެނެރަލްގެ އޮފީހުން ނެރުނު ރިޕޯޓުގައި ބުނެފައިވާ ގޮތުން މިފަދަ އިސްލާހުތަކެއް ކުރުމަށް ކޮމެޓީން ނިންމާފައިވަނީ ދައުލަތުގެ ދަރަންޏާއި ގެރެންޓީސް މިހާރު 100 ބިލިއަނާ ގާތްކުރާ އަދަދަކަށް ހުރުމުންނެވެ. އަދި ދައުލަތުގެ ދަރަނި ޖީޑީޕީގެ ނިސްބަތުން 100 ޕަސެންޓްއާ ގާތްކުރާ މިންވަރެއްގައި ވެއެވެ. އެހެންކަމުން ލޯނު ނެގުމަކީ ހެޑް އޮފް ސްޓޭޓް ލެވެލްގައި މުޅި ދައުލަތާއި ގައުމުގެ މާލީ ހާލަތަށް ރިއާޔަތްކޮށް ނިންމަން ޖެހޭ ނިންމުމެއް ކަމަށްވެސް ރިޕޯޓުގައި ބުނެފައިވެއެވެ.
2026 ވަނަ އަހަރު އަންނައިރު ސޮވެރިން ފަންޑަށް 600 މިލިއަން ޑޮލަރު ޖަމާކުރުމަށް ސަރުކާރުން އަމާޒު ހިފާފައިވެއެވެ. އަދި މި ރާއްޖެ ސޮވެރިން ޑިފޯލްޓަކަށް ދާނެ ކަމުގެ ވާހަކަތައް ދެކެވުނު ނަމަވެސް ސޮވެރިން ޑިފޯލްޓަކަށް ނުދާނެ ކަމުގެ ފުރިހަމަ ޔަގީންކަން އެބައޮތް ކަމަށް ފިނޭންސް މިނިސްޓަރި އިބްރާހިމް އަމީރު ވަނީ މީގެ ކުރިން ވިދާޅުވިއެވެ.
