އިސްލާމިކް މިނިސްޓްރީގެ ކުރީގެ ޕާމަނަންޓް ސެކްރެޓްރީ މުސްއަބް އަބްދުﷲ މަގާމުން ވަކިކުރި މައްސަލައިގައި ސިވިލް ސާވިސް ކޮމިޝަން (ސީއެސްސީ) އިން ޝަރީއަތުގެ ނިޒާމް ނަހަމަ ގޮތުގައި ބޭނުން ހިފާފައި ވާތީ، ޝަރީއަތުގެ ހަރަދުގެ ބަދަލު ހޯދުމުގެ ހައްގު މުސްއަބަށް ލިބިގެންވާ ކަމަށް ހައިކޯޓުން ބުނެފިއެވެ.
ހައިކޯޓުން މިގޮތަށް ހުކުމް ކޮށްފައި ވަނީ، ސިވިލް ސާވިސް ކޮމިޝަނުން މުސްއަބާ ދެކޮޅަށް ހައިކޯޓުގައި އިސްތިއުނާފް ކުރި މައްސަލައިގެ ޝަރީއަތް ނިންމައި މިއަދު ކުރި ހުކުމެވެ.
އެ ކޮމިޝަނުން ބަލަމުން ދިޔަ މައްސަލަތަކަކާ ގުޅިގެން ގިނަ ދުވަސްތަކެއް ވަންދެން ސަސްޕެންޝަނުގައި ބެހެއްޓުމަށް ފަހު، މުސްއަބު މަގާމުން ވަކިކުރީ ސެޕްޓެމްބަރު 2019 ގައެވެ. އެ މައްސަލައިގައި 2020 ވަނަ އަހަރު މުސްއަބާ ދެކޮޅަށް ސިވިލް ކޯޓުން ހުކުމް ކުރިއެވެ. އެ ހުކުމް އިސްތިއުނާފު ކުރުމުން ހައި ކޯޓުން މިދިޔަ އަހަރުގެ އޮގަސްޓް މަހުގެ 28 ގައި ނިންމާފައި ވަނީ އޭނާ ވަޒީފާ އިން ވަކިކޮށްފައި ވަނީ ގާނޫނާ ހިލާފަށް ކަމަށެވެ.
ހައި ކޯޓުގެ ހުކުމުގައި ބުނެފައި ވަނީ މުސްއަބު މަގާމުން ވަކިކުރުމަށް ފަހު، އޭނާގެ މަގާމަށް އެހެން މީހަކު އައްޔަން ކޮށްފައި ވާތީ މިހާރު ހޯދައި ދެވެން އޮތް ހައްލަކީ ބަދަލު ނަގައިދިނުން އެކަނި ކަމަށެވެ. އެގޮތުން ބަދަލުގެ ގޮތުގައި، 1،187،666.60 ރުފިޔާ ހުކުމް ކުރި ތާރީހުން ފެށިގެން 14 ދުވަސް ތެރޭގައި ދިނުމަށް ހައި ކޯޓުން ނިންމިއެވެ.
އެ ހުކުމް ތަންފީޒް ކޮށްފައި ނުވާތީ މުސްއަބްގެ ފަރާތުން މިދިޔަ އަހަރުގެ އޮކްޓޯބަރު 26 ގައި ވަނީ ސިވިލް ކޯޓަށް މައްސަލައެއް ހުށަހަޅާފައެވެ. އަދި ސިވިލް ކޯޓަށް ހުށަހެޅި މައްސަލަ ބެލުމަށް ފަހު އެ ކޯޓުން ވަނީ 1.1 މިލިއަން ރުފިޔާ ބަދަލުގެ ގޮތުގައި މުސްއަބަށް ދިނުމަށް ހައިކޯޓުން ކުރި ހުކުމް ތަންފީޒް ކުރުމަށް ސިވިލް ސާވިސް އަށް އަމުރު ކޮށްފައެވެ. ސިވިލް ކޯޓުގެ މި އަމުރު އިސްތިއުނާފް ކުރުމަށް އެދި ސިވިލް ސާވިސް އިން ހައިކޯޓުގައި އިސްތިއުނާފް ކޮށްފައި ވަނީ ވެސް އޮކްޓޯބަރު 26 ގައެވެ.
ހައިކޯޓަށް ސިވިލް ސާވިސް އިން ހުށަހެޅި އިސްތިއުނާފީ މައްސަލަ ބަލައި ނިންމައި މިއަދު ކުރި ހުކުމުގައި ބުނެފައި ވަނީ، 1.1 މިލިއަން ރުފިޔާ ބަދަލުގެ ގޮތުގައި މުސްއަބަށް ދިނުމަށް ހައިކޯޓުން ކުރި ހުކުމް ތަންފީޒް ކުރުމަށް ސިވިލް ސާވިސްގެ މައްޗަށް ނެރުނު އަމުރު ބަދަލު ގެންނަން ޖެހޭ ސަބަބެއް ނެތް ކަމަށެވެ. އަދި މި މައްސަލާގައި ސިވިލް ސާވިސް ކޮމިޝަނުން އަމަލުކޮށްފައިވާ ގޮތަށް ބަލާއިރު، އެ ފަރާތުން ޝަރީއަތުގެ ނިޒާމް ނަހަމަ ގޮތުގައި ބޭނުންކޮށްފައިވާ ކަމަށް ކަނޑައަޅައި. މުސްއަބަށް ޝަރިއަތުގެ ހަރަދު ހޯދުމުގެ ހައްގު ލިބިގެން ވާ ކަމަށް ހުކުމް ކޮށްގައި ވެއެވެ.
މި މައްސަލަ ބެލި އިރު، މުސްއަބަށް ލިބުނު ގެއްލުމުގެ ބަދަލު ހޯދަން އެދިފައިވީ ނަމަވެސް ގެއްލުމުގެ ބަދަލުގެ ގޮތުގައި ގާނޫނީ ވަކީލުގެ ފީގެ ގޮތުގައި 30،000 ރުފިޔާ ހަރަދު ކުރި ކަމަށް ވަނީ ބުނެފައެވެ. ނަމަވެސް އެ ފައިސާ ހަރަދު ކުރި ކަން ކޯޓުގައި ސާބިތުކޮށް ދީފައި ނުވާތީ މި މައްސަލައިގެ ތެރެއިން އެ ހަރަދު ނަގައިދެވެން ނެތް ކަމަށް ހައިކޯޓުން ކުރި ހުކުމުގައި ބުނެފައި ވެއެވެ.
މިއަދު ހައިކޯޓުގެ މި މައްސަލަ ބަލައި ހުކުމް ކުރީ ފަނޑިޔާރު، މުހައްމަދު ފައިސަލާއި، ފަނޑިޔާރު މުހައްމަދު ސަލީމާއި، ފަނޑިޔާރު ދީބާނާޒް ފަހުމީއެވެ.
