ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހްގެ މިދައުރުގެ އެންމެ ފަހު ރިޔާސީ ބަޔާން އިއްވާ ޖަލްސާ، ރައީސް މުހައްމަދު ނަޝީދަށް ތާއިދު ކުރައްވާ ގިނަ މަޖިލީސް މެމްބަރުން 'ބޮއިކޮޓް' ކޮށްފިއެވެ.
މިއަހަރުގެ މަޖިލީސް ހުޅުވުމުގެ ގޮތުން ރިޔާސީ ބަޔާން އިއްވުމަށް ބާއްވާ ޖަލްސާއަށް ރައްޔިތުންގެ މަޖިލީހުގެ ރައީސް ނަޝީދުގެ އިތުރުން އެފެކްޝަނުން މި ޖަލްސާއަށް ހާޒިރުވީ ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުލް ލަތީފް އަދި ހިތަދޫ މެދު ދާއިރާގެ މެމްބަރު އަހުމަދު ރަޝީދުއެވެ.
އެމްޑީޕީގެ ތެރޭގައި އުފެދިފައިވާ ހަމަނުޖެހުންތަކާއެކު އެ ޕާޓީ ދެ ފެކްޝަނަކަށް ވަނީ ބެހިފައެވެ. މި ގޮތުން މަޖިލީހުގެ ގިނަ މެމްބަރުން ތިއްބެވީ ރައީސް އިބްރާހީމް މުހައްމަދު ސޯލިހް އާ އެކުއެވެ.
ރައީސް ނަޝީދާއި ރައީސް ސޯލިހްއަށް ތާއިދުކުރާ މެމްބަރުންގެ މެދުގައި ހިޔާލު ތަފާތުވުންތައް އުފެދި ބަހުގެ ހަމަލާތައް ބަދަލުކުރަމުން އަންނައިރު މި ދިޔަ މަހު 28 ވަނަ ދުވަހު ބޭއްވި އެމްޑީޕީ ރިޔާސީ ޕްރައިމަރީ ނާކާމިޔާބު ވުމުން ރައީސް ނަޝީދު ވަނީ 'ފިކުރެއްގެ ދިރުން' ނަމުގައި ގޮއްޕެއް ހެއްދެވުމުގެ މަސައްކަތް ފައްޓަވާފައެވެ.
ރައީސް ނަޝީދަށް ތާއިދުކުރާ ފަރާތްތަކުން 'ފިކުރެއްގެ ދިރުން' ގޮފި ހެދުމުގެ މަސައްކަތް ފޯރިއާ އެކު ކުރަމުން އަންނައިރު ކުރިއަށް އޮތް ރިޔާސީ އިންތިހާބުގައި ރައީސް ނަޝީދުގެ ފެކްޝަން އިން ތާއިދުކުރާނެ ކެންޑިޑޭޓެއް އަދި ހާމަކޮށްފައެއް ނުވެއެވެ.
