ބޭންކް އޮފް މޯލްޑިވްސް (ބީއެމްއެލް) ގެ ޑޮލަރު އޭޓީއެމް އިން މަހެއްގެ މައްޗަށް ނެގޭ އެމެރިކާ ޑޮލަރުގެ ލިމިޓް މިއަދު އުވާލައިފިއެވެ.
ބޭންކުން ބުނީ، މި ބަދަލާއެކު މާލެ ސަރަހައްދުގައި ހުރި ބީއެމްއެލްގެ ޔޫއެސް ޑޮލަރު އޭޓީއެމްތަކުން ދުވާލަކު 1،600 ޑޮލަރު ނެގޭނެ ކަމަށެވެ.
ބީއެމްއެލްއިން އިތުރަށް ބުނީ ޔޫއެސް ޑޮލަރު އެކައުންޓް ޕްރައިމަރީ އެކައުންޓުގެ ގޮތުގައި ހަމަޖައްސާފައިވާ ޑެބިޓް ކާޑުތަކުން ކޮންމެ ދުވަހަކު 3،000 ޑޮލަރާ ހަމައަށް ރާއްޖެއިން ބޭރުގެ މުއާމަލާތްތައް ކުރެވޭނެ ކަމަށެވެ. އަދި ޔޫއެސް ޑޮލަރު އެކައުންޓުން އިންޓަނެޓް އަދި މޯބައިލް ބޭންކިން މެދުވެރިކޮށް އިންޓާނޭޝަނަލް މަނީ ޓްރާންސްފާގެ ހިދުމަތްވެސް ލިބޭނެ ކަމަށެވެ.
2020 ވަނަ އަހަރު ބީއެމްއެލްއިން ކަނޑައަޅާފައިވާ މި ލިމިޓް އުވާލުމާ ގުޅިގެން ޑޮލަރުގެ މުއާމަލާތްތައް އިތުރަށް ފަސޭހަވެގެން ދާނެއެވެ.
ދާދި ފަހުން ރާއްޖެއިން ބޭރުގައި ކިޔަވާ ދަރިވަރުންނަށް ފޮނުވާ ޓީޓީ ލިމިޓް ކުރުމާ ގުޅިގެން ގިނަ ބަޔަކު ޝަކުވާ ކޮށްފައި ވާއިރު ސެންޓްރަލް ބޭންކް، އެމްއެމްއޭ އަދި ބޭންކް އޮފް މޯލްޑިވްސް އިން މި ކަމަށް ހައްލެން ހޯދުމަށް ރައީސް އިބްރާހިމް މުހައްމަދު ސޯލިހް އޮތީ އެދިވަޑައިގެންފައެވެ.
