2008 ވަނަ އަހަރުން ފެށިގެން މިހާތަނަށް ބޭއްވުނު ހުރިހާ ރިޔާސީ އިންތިހާބެއްގައި ވެސް ދިވެހިން ދައްކަމުން އަންނަ ސުލޫކު އެގޮތަށް ދަމަހައްޓައި އެމީހަކު އިހްތިޔާރުކުރާ ކެންޑިޑޭޓަކަށް ވޯޓު ދިނުމުގެ ފުރުސަތު ފަހިކޮށް އޮތުމަކީ ނުހަނު ބޭނުންތެރިކަމެއް ކަމަށް އިލެކްޝަން ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވެއްޖެއެވެ.
ހަބީބް މިހެން ވިދާޅުވީ މިއަދު ކުރިއަށްދާ އެމްޑީޕީގެ ޕްރައިމަރީގައި ގިނަ ހަމަނުޖެހުންތަކެއް ހިނގާފައި ވަނިކޮށް ކުރެއްވި ޓްވީޓެއްގައެވެ.
މި އިންތިހާބުގައި ވޯޓް ކަރުދާސްތައް ހަލާކު ކުރުން، ވޯޓު ފޮށިތައް ފަޅާލުން އަދި ވޯޓާސް ލިސްޓްގައި ނަން ނެތި މީހުން ވޯޓު ލައިފައިވާތީ މެދު ހެންވޭރު ދާއިރާގެ މެންބަރު އަލީ އާޒިމް ވެސް ވަނީ ކުރިއަށް މިދާ އިންތިހާބުގައި އިންސާފުވެރި ވޯޓެއް ލިބޭނެ ކަމުގެ ޔަގީންކަމެއް މިހާރު ނެތް ކަމަށް ވިދާޅުވެފައެވެ.
ރައީސް ނަޝީދުގެ 3 މަންދޫބަކު މި އިންތިހާބުގެ ތެރެއިން ހައްޔަރު ކޮށްފައި ވާއިރު ރައީސް ނަޝީދު ވިދާޅުވީ ބައެއް ވޯޓު ފޮށި ކައިރީގައި އެމަނިކުފާނުގެ ފަރާތުން ތިބި މަންދޫބުންނާއި ތާއީދުކުރައްވާ ގިނަ ބަޔަކު ފުލުހުން ހައްޔަރުކޮށްފައިވާ ކަމަށެވެ. އަދި ރައީސް ނަޝީދު ވަނީ އެ މަންދޫބުން ދޫކޮށްލަން ގޮވާލައްވާފައެވެ.
ހައްޔަރުކުރި މީހުން ވަގުތުން ދޫކޮށްލުމަށް އަދި ވޯޓު ގަޑުބަޑު ކުރާ މީހުންނާ މެދު ފިޔަވަޅު އެޅުމަށް ރައީސް ނަޝީދު ގޮވާލައްވާފައި ވާއިރު ސާފު ވޯޓަކުން މޮޅުވާނެ ކަމަށާއި ވާދަވެރިން ވޯޓް ފޮށިތައް ގަޑުބަޑުކޮށް މަސްލަހަތު ނަގާލަން ހިންގާ އެއްވެސް ކަމެއްގައި ބައިވެރިނުވުމަށް ރައީސް އިބްރާހިމް މުހައްމަދު ސޯލިހްގެ ކެމްޕެއިން ޓީމުން ވަނީ ބުނެފައެވެ.
