ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް 70،000 ވޯޓު ގެއްލޭނެ ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވެފައި ވަނީ އެމަނިކުފާނު ރ އަތޮޅުގެ ރަށްތަކަށް ކުރައްވާ ކެމްޕެއިން ދަތުރުފުޅުގައި ރ ދުވާފަރަށް ވަޑައިގެން ދެއްކެވި ވާހަކަފުޅުގައެވެ.
އެމްޑިޕީއިން ކަނޑާލި 39،000 މީހުންނާއި އެ މީހުންގެ ބަސް އަޑުއަހާ މީހުން ހިމެނޭ ގޮތަށް 70،000 ވޯޓު ރައީސް ސޯލިހަށް ގެއްލޭނެ ކަމަށް ރައީސް ނަޝީދު ވިދާޅުވެއެވެ. އަދި ޕާޓީއިން ކަނޑާލި ގިނަ މީހުންނަކީ ރައީސް ނަޝީދަށް ވޯޓުލާނެ ކަމަށް ގަބޫލުކުރެއްވޭ މީހުން ކަމަށާއި ޕާޓީގައި ބާކީ ތިބި 56،000 މީހުންގެ އަޣުލަބިއްޔަތު ލިބިވަޑައިގަންނަވާނެ ކަމާމެދު ޝައްކު ނުކުރައްވާ ކަމަށް ރައީސް ނަޝީދު ވަނީ ވިދާޅުވެފައެވެ.
ރައީސް ސޯލިހަށް ވޯޓު ނުދޭނެކަމަށް ބުނާ މީހުން ގިނަކަމަށް ވެސް ރައީސް ނަޝީދު ވިދާޅުވެފައި ވެެއެވެ.
ރައީސް ނަޝީދު ވިދާޅުވެފައި ވަނީ އެމްޑީޕީ އުފެދިގެން އައީ ދުވާފަރު ރައްޔިތުންނާއެކީ ކަމަށާއި ފައިސާގެ އެހީ ދުވާފަރުގެ ރައްޔިތުންގެ ފަރާތުން އިންތިހާއަށް ލިބުނު ކަމަށެވެ. ދުވާފަރުގެ ބޮޑު އަޣުލަބިއްޔަތެއް ލިބިވަޑައިގަންނަވާނެކަން ޔަގީންވެ ވަޑަައިގަންނަވާ ކަމަށް ވެސް ރައީސް ނަޝީދު ވިދާޅުވިއެވެ.
މި މަހުގެ 28 ވަނަ ދުވަހު ބާއްވަން ނިންމާފައިވާ އެ ޕާޓީގެ ޕްރައިމަރީގެ ކެމްޕެއިން ހަރަކާތުގައި ދެ ކެންޑިޑޭޓުންވެސް ގެންދަވަނީ އަތޮޅުތެރެއަށް ވަޑައިގެން ވަރަށް ފޯރީގައި ކެމްޕެއިން ކުރައްވަމުންނެވެ. ރައީސް ނަޝީދު ވަނީ "ފިކުރެއްގެ ދިރުން" ނަމުގައި ބޮޑު ތިލަދުންމައްޗަށް މިދިޔަ ޑިސެންބަރު މަހު ވަޑައިގެންފައެވެ. އެއަށްފަހު ފުވައްމުލަކު ސިޓީއަށާއި އއ އަދި އދ ގެ ބައެއް ރަށްތަކަށް ވަޑައިގެންފައި ވެއެވެ.
ރައީސް ނަޝީދުގެ މިހާރު ގެންދަވަނީ ނ، ރ އަދި ބ އަތޮޅުގެ ރަށްތަކަށް ވަޑައިގަންނަވަމުންނެވެ. ކުރިއަށް އޮތް ކެމްޕެއިން ހަރަކާތްތަކަށް ބަލާއިރު މި މަހުގެ 13 އިން 15 ގައި މ، ވ، ތ އަދި ފ އަށް ވަޑައިގަންނަވާނެއެވެ. އަދި 17 ވަނަ ދުވަހު ޅ އަތޮޅާއި މާލެ އަތޮޅުގެ ރަށްތަކަށް ވަޑައިގަންނަވާއިރު 19 އިން 21 އަށް ވަޑައިގަންނަވާނީ ގއ އަދި ގދ އަށެވެ.
މީގެ އިތުރުން މި މަހުގެ 23 އަދި 24 ގައި އައްޑޫ ސިޓީއަށް ވަޑައިގަންނާވެ ކަމަށް އެމަނިކުފާނުގެ ކެމްޕެއިން ޓީމުން މައުލޫމާތު ދެއެވެ.
