އިއްޔެ ފަތިހު މާލޭގެ ނީލަން ފިހާރައިގައި ހިނގި އަލިފާނުގެ ހާދިސާ އާ ގުޅިގެން މާލޭގައި ކުނި އުކާލުމުގެ ހިދުމަތަށް ބުރޫ އެރި ނަމަވެސް، މަޑުމަޑުން އާންމު ހާލަތަށް އެޅޭނެ ކަމަށް ގަބޫލުކުރައްވާ ކަމަށް، މާލޭގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ބޭނުންކޮށްފައި ހުންނަ ލަކުޑި އާއި ދަގަނޑާއި ޕްލާސްޓިކްގެ ގިނަ ބާވަތްތައް ވިއްކާ ނީލަން ފިހާރައިގައި އިއްޔެ އަލިފާން ރޯވި ކަމުގެ މައުލޫމާތު ލިބިފައި ވަނީ ފަތިހު 5:49 ހާއިރު ކަމަށް އެމްއެންޑީއެފުން ބުނެފައިވެއެވެ. އެ ސަރަހައްދުގައި އަލިފާންގަނޑު އެއްކޮށް ކޮންޓްރޯލް ކުރެވުނީ 8:30 ހާއިރު ކަމަށް ވެސް ބުނެފައިވެއެވެ.
އެ އަލިފާންގަނޑުގެ ސަބަބުން މުޅި އެ ސަރަހައްދަށް އަލިފާނުގެ އަސަރު ކުރިއިރު، ނީލަން ފިހާރަ އާ ޖެހިގެން ހުންނަ ސިޓީ ކައުންސިލްގެ އެކޮމޮޑޭޝަން ބްލޮކްގައި ވެސް ރޯވެ، އެތަން ވަނީ އެއްކޮށް ހުލިވެފައެވެ. އެހެންވެ، އެތަނުގައި ދިރިއުޅޭ 160 އެއްހާ މުވައްޒަފުން މިހާރު ވަނީ ހުޅުމާލޭގައި ހުންނަ ފަރުކޮޅުފުށި ސަރަހައްދަށް ބަދަލުކޮށްފައެވެ. މުވައްޒަފުން އެއްކޮށް ބަދަލުކޮށް ނިމުނީ ގަޑިން ރޭ ދަންވަރު 12 ވެސް ޖެހި ފަހުންނެވެ.
މުއިއްޒު "ދަ ޕްރެސް" އަށް ވިދާޅުވީ، އިއްޔެ ހިނގި އަލިފާނުގެ ހާދިސާ އާ ގުޅިގެން އެއްވެސް މުވައްޒަފަކަށް އަނިޔާ އެއް ވެފައިނުވާ ކަމަށެވެ. ނަމަވެސް މުވައްޒަފުން ގެންގުޅޭ ބައިވަރު ސާމާނާއި ހިފާ ގެންގުޅޭ ތަކެތީގައި އަލިފާން ހިފައި ގެއްލުންވެފައިވާ ކަމަށް އޭނާ ވިދާޅުވިއެވެ.
ރޭގެ ހާދިސާ އާ ގުޅިގެން މާލޭގެ މަގުމަތީގައި ކުނިކެހުމުގެ މަސައްކަތް މުވައްޒަފުން ކުރަމުން ދިޔައީ ވަރަށް ހާލުގައި ކަމަށާއި، އެގޮތުން އެ ސަރަހައްދުގައި 12 ޖެހުމާ ހަމައަށް ކަރަންޓު ނެތުމުގެ ސަބަބުން މުވައްޒަފުން މަސައްކަތް ކުރީ ފޯނުން ފްލޭޝްލައިޓް ދިއްލައިގެން ކަން ފާހަގަކުރެއްވިއެވެ.
އެ ހާދިސާ އާ ގުޅިގެން ގިނަ މުވައްޒަފުންނަށް ނަފްސާނީ ގޮތުން އަސަރުކޮށްފައިވާ ކަމަށް މުއިއްޒު ވިދާޅުވިއެވެ. އޭނާ ވިދާޅުވި ގޮތުގައި އެ މުވައްޒަފުންނަށް އަރާމުކުރަން ވަގުތު ދީފައިވާނެއެވެ. ނަމަވެސް ބައެއް މުވައްޒަފުން ވަޒީފާ އަށް ނިކުތް ކަމަށް މުއިއްޒު ވިދާޅުވިއެވެ.
އެހެންކަމުން ކައުންސިލުން މާލޭގައި ކުރާ ކުނި ނަގައި އުކާލުމުގެ މަސައްކަތަށް ކޮންމެވެސް ވަރަކަށް ބުރޫ އަރާނެ ކަމަށާއި، އެކަމަކު ކުޑަ ދުވަސްކޮޅެއްގެ ތެރޭގައި ކުރިން ވެސް ކުނި އުކާލުމުގެ ހިދުމަތް ދެމުން ގެންދާ ގޮތަށް ކައުންސިލުން ހިދުމަތް ދެމުން ގެންދާނެ ކަމަށް މުއިއްޒު ވިދާޅުވިއެވެ.
