ނީލަން ފިހާރާގައި މިއަދު ހެނދުނު ހިނގި ހާދިސާގައި މާލެ ސިޓީ ކައުންސިލްގެ ބިދޭސީންގެ އެކޮމޮޑޭޝަން ބްލޮކް އެއްކޮން އެނދުމާ ގުޅިގެން ފަރުކޮޅުފުށި އެ މީހުންގެ ވަގުތީ ހިޔާގެ ގޮތުގައި ހަމަޖައްސައިފިއެވެ.
މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާޅުވީ ބިދޭސީންގެ އެކޮމަޑޭޝަން ގެއްލުމާއެކު ހިފާގެންގުޅޭ ތަކެއްޗާއި އަންނައުނާއި ފޯނުތަކާއި ފައިސާ ވެސް ހަލާކުވެގެން ގޮސްފައިވާ ކަމަށެވެ.
މުއިއްޒު ވަނީ އެ މުވައްޒަފުންގެ ވަގުތީ ހިޔާއަކަށް ސަރުކާރުގައި އެދިފައެވެ. އަދި މައުލޫމާތު ލިބިފައިވާ ގޮތުގައި ސިޓީ ކައުންސިލުން އެދުނީ ކޮރަލް ބުލެވާޑް ހަމަޖައްސައިދިނުމަށެވެ. އެހެންނަމަވެސް އެ ތަނުގެ މައްސަލަ ކޯޓުގައި އޮތުމުން އެތަން ހަމަނުޖެއްސޭނެ ކަމަށް ވަނީ ނިންމާފައެވެ.
މީގެ ކުރިން ކަރަންޓީނު ފެސިލިޓީއަކަށް ވެސް ބޭނުންކުރި ފަރުކޮޅުފުށި ވަގުތީ ބޯހިޔާވަހިކަން ސަރުކާރުން މިހާރު ހަމަޖައްސައިދީފައިވާއިރު އެ ހާދިސާގައި ރެއިންބޯ ކުންފުނީގެ މުވައްޒަފުން ތިބި އެކޮމަޑޭޝަނެއް ވެސް އަނދައި ހުލިވި ނަމަވެސް އެ ކުންފުނިން ވަނީ އެ މީހުންނާ ހަވާލުވެފައެވެ.
ފަހުގެ ތާރީހުގައި އަލިފާނުގެ ބޮޑެތި ހާދިސާތައް ހިނގަމުންދާއިރު މިދިޔަ އަހަރު ގަރާޖެއްގައި ހިނގި އަލިފާނުގެ ހާދިސާގައި ގިނަ އަދަދެއްގެ ބަޔަކު ވަނީ މަރުވެފައެވެ. އަދި ފިޔޯރީ ސްކޫލުގައި އިއްޔެ ހަވީރު އަލިފާނުގެ ހާދިސާ ހިނގާފައި ވާއިރު މިއަދު ހެނދުނު 5:43 ހާއިރު މާލޭގައި ވަނީ ބޮޑު އަލިފާނުގެ ހާދިސާއެއް ހިނގާފައެވެ. އެގޮތުން ނީލަން ފިހާރަ އަނދާ ހުލިވިއިރު އެތަނުގެ ކުރިމަތީގައި ހުރި މާލެ ސިޓީ ކައުންސިލްގެ ބިދޭސީ މުވައްޒަފުންގެ އެކޮމަޑޭޝަން ބްލޮކުގައި ވެސް ވަނީ އަލިފާން ރޯވެ ބޭނުން ނުކުރެވޭ ވަރަށް އަނދާހުލިވެފައެވެ.
މީގެ ކުރިންވެސް ނީލަން ފިހާރައިގައި އެތައް ފަހަރަކު ވަނީ ރޯވެފައެވެ. އެގޮތުން 2015 އިން ފެށިގެން 2021 ގެ ނިޔަލަށް އެތަނުގައި އަލިފާނުގެ ގިނަ ހާދިސާތައް ހިނގާފައިވެއެވެ.
އެ މައްސަލަ ތަހުގީގު ކުރުމަށް ފޮރެންސިކް އެކްސްޕާޓުންތަކެެއް ރާއްޖެ ގެނެސް އެކަމުގައި އެއްވެސް ބަޔަކު އަޑީގައި ތިބިތޯ އާއި އަލިފާން ރޯކުރަނީ ގަސްދުގައިތޯ ބަލަން އެމީހުން ބައިވެރިވާނެ ކަމަށް ފުލުހުން ވަނީ މިއަދު ބުނެފައެވެ.
