ފެށުނީއްސުރެ މަޖިލީހުގެ ތެރެއިންނާއި އިދިކޮޅު ޕީޕީއެމްގެ ފަރާތުން ގޮންޖެހުންތައް ކުރިމަތިވި ނަމަވެސް ކެތްތެރިކަމާއެކު ހިދުމަތްތައް ފޯރުކޮށްދީފައި ވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރައީސް މިހެން ވިދާޅުވީ އިއްޔެ ނ. އަތޮޅަށް ފެއްޓެވި ދަތުރުފުޅުގައި އެ އަތޮޅު ކެނދިކުޅުދޫގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ، ފަސް އަހަރުގެ ވެރިކަމެއް ނިމިދިޔަ އިރު ރައްޔިތުންނަށް ކޮށްދީފައިވާ ކަންތައްތަކާ އަޅާބަލާއިރު މި ސަރުކާރުން އެއަށް ވުރެ ގިނަ ހިދުމަތްތަކެއް ހަތަރު އަހަރު ތެރޭގައި ފޯރުކޮށްދީފައިވާ ކަމަށެވެ.

އަދި ރައްޔިތުންގެ މަޖިލީހުންނާއި އިދިކޮޅު ޕީޕީއެމުން ސަރުކާރަށް ގޮންޖެހުންތަކެއް ކުރިމަތިކުރި ނަމަވެސް މި ސަރުކާރުން އެ ކަންކަން ހުރަސްކޮށް، ކެތްތެރިކަމާ އެކު ރައްޔިތުންނަށް ހިދުމަތްތައް ފޯރުކޮށްދީފައި ވާނެ ކަމަށް ރައީސް ފާހަގަކުރެއްވިއެވެ.

ފެށުނީއްސުރެ މި ސަރުކާރަށް ގޮންޖެހުންތަކެއް މަޖިލިސް ތެރެއިންނާއި އަދި އިދިކޮޅު ޕީޕީއެމްގެ ފަރާތުން ވެސް ކުރިމަތިވި.
ރައީސް އިބްރާހިމް މުހައްމަދު ސޯލިހު

ރައީސް ވިދާޅުވީ ރިޔާސީ އިންތިހާބަކީ ވަކި މީހަކާ އިދިކޮޅަށް ނުވަތަ މިއީ ވަކި ބަޔަކު ބާކީ ކުރުމަށް ކުރާ ކަމެއް ނޫން ކަމަށެވެ. އެގޮތުން ޕްރައިމަރީ ނިމުމާއެކު ކުރިއަށްދާނީ އެމްޑީޕީ ކަމަށާއި އެމްޑީޕީ އަކީ އެއް ބައެއް ކަމަށްވެސް ރައީސް ވިދާޅުވިއެވެ.

ރައީސް ވަނީ އެމްޑީޕީގެ ރިޔާސީ ޕްރައިމަރީ ބޮޑުތަނުން ކާމިޔާބު ކުރައްވައި ރިޔާސީ އިންތިހާބު އެއް ބުރުން ކާމިޔާބު ކުރައްވާނެ ކަމަށްވެސް ވިދާޅުވެފައެވެ.

އެމްޑީޕީގެ ރިޔާސީ ޕްރައިމަރީގެ ކެމްޕެއިންގެ ފޯރި ގަދަވެފައި ވާއިރު، ޕްރައިމަރީ އޮންނާނީ މި މަހުގެ 28 ގައެވެ.