މާލެ އަތޮޅު ގުޅީގައި ސްޓެލްކޯ އިން އޮޑިދޯނި ފަހަރަށް ފެނުގެ ހިދުމަތް ދޭން ފަށައިފިއެވެ.
ސްޓެލްކޯއިން ބުނީ ކ. ގުޅީގައި ދޭން ފެށި އެ ހިދުމަތާއެކު ޒަމާނީ ފަސޭހަތަކެއް ލިބިގެން ދާނެ ކަމަށާއި އެގޮތުން ހޮޓްލައިންއަށް ގުޅާ އޯޑަރު ދިނުމުން ޕޭމަންޓް ލިންކް ފޯނަށް ލިބޭނެ ކަމަށާއި ފަސޭހައިން ހިދުމަތަށް ފައިސާ ދެއްކުމުގެ އިންތިޒާމް ހަމަޖެހިފައި ވާކަމަށެވެ.
އެ ހިދުމަތް ގުޅީގައި އިފްތިތާހު ކުރެވިގެން ދިޔުމާއެކު ސްޓެލްކޯގެ މެނޭޖްމަންޓުން ވަނީ ގުޅީގައި ރަޖިސްޓްރީ ކޮށްފައިވާ ކޮންމެ ދޯންޏަކަށް އެއް ޓަނުގެ ފެން ހިލޭ ދިނުމަށް ނިންމާފައެވެ.
ސްޓެލްކޯއިން ބުނީ އޮޑިދޯނިފަހަރަށް ފެން ވިއްކަމުން ގެންދާނީ ތިން ބޭންޑަކަށް ބަހާލައިގެން ކަމަށާޢި އެގޮތުން ބޭންޑް A އަށް 10 ރުފިޔާ، ބޭންޑް B އަށް 12 ރުފިޔާ ފަންސާސް ލާރި އަދި ބޭންޑް C އަށް 13 ރުފިޔާ ފަންސާސް ލާރީގެ މަގުން ޗާޖް ކުރެވިގެންދާނެ ކަމަށެވެ.
ގުޅީގެ ފެނުގެ ހޮޓްލައިން ނަމްބަރަކީ 7281221 ކަމަށާއި ގުޅީގައި ރަޖިސްޓްރީ ކޮށްފައިވާ ދޯނިތަކުގެ އިތުރުންވެސް އެ ހިދުމަތް ބޭނުންވާ އެހެން އޮޑިދޯނި ފަހަރަށްވެސް އެ ހިދުމަތް އެ ރަށު ސްޓެލްކޯއިން ފޯރުކޮށްދޭނެ ކަމަށް ސްޓެލްކޯއިން ބުނެއެވެ.
އޮޑި ދޯނިފަހަރަށް ފެން ވިއްކުމުގެ ޚިދުމަތް މިވަގުތު ސްޓެލްކޯއިން ދެމުން އަންނަ ރަށްތަކުގެ ތެރޭގައި ކ. ގުޅީގެ އިތުރުން، އދ. މަހިބަދޫއާއި ކ. ގާފަރު ހިމެނެއެވެ.
