އަންނަ މަހު އެމްޑީޕީން ބާއްވާ އެ ޕާޓީގެ ރިޔާސީ ޕްރައިމަރީގައި ވާދަ ކުރެއްވުމަށް، އެ ޕާޓީގެ ރައީސް މުހައްމަދު ނަޝީދު ރޭ ފޯމް ހުށަހަޅުއްވައިފިއެވެ.
ނަޝީދުގެ އެންމެ އަރިސް އެއް މެންބަރު ކަމަށްވާ އެމްޑީޕީގެ ކުރީގެ ޗެއާޕާސަން ހަސަން ލަތީފް ވިދާޅުވީ، "2023 ވަނަ އަހަރުގެ ރިޔާސީ އިންތިހާބުގެ އެމްޑީޕީގެ ޓިކެޓަށް ވާދަކުރެއްވުމަށް ކެންޑިޑޭޓްކަމުގެ ފޯމް ރައީސް މުހައްމަދު ނަޝީދު ހުށަހަޅުއްވައިފި،" ކަމަށެވެ.
މި ފެށޭ ޖެނުއަރީ މަހުގެ 28 ގައި ބާއްވާ އެމްޑީޕީގެ ރިޔާސީ ޕްރައިމަރީގައި ވާދަކުރާ ކެންޑިޑޭޓުން ފޯމް ހުށަހަޅަން ޖެހޭނީ މަދުވެގެން 500 މެންބަރުންގެ ތާއީދާ އެކުގައެވެ.
އެމްޑީޕީގެ ޕްރައިމަރީގައި ވާދަކުރަން ބޭނުންވާ ކެންޑިޑޭޓުންނަށް މާދަމާ ހަވީރު 4 ގެ ނިޔަލަށް ފުރުސަތު އެބައޮތެވެ.
ޕްރައިމަރީގައި ވާދަކުރެއްވުމަށް ނަޝީދު ރޭ ފޯމް ހުށަހެޅުއްވިއިރު، ޕްރައިމަރީގައި ދެން ވާދަ ކުރައްވާނެ ކަމަށް އިއުލާނުކުރެއްވި ރައީސް އިބްރާހީމް މުހައްމަދު ސޯލިހު އަދި ފޯމް ހުށަހަޅުއްވާފައެއް ނުވެއެވެ.
