ވެލާނާ އިންޓަނޭޝަނަލް އެއާޕޯޓުން ފުރަންދާ މީހުން ފުރުމުގެ ތިން ގަޑިއިރު ކުރިން އެއާޕޯޓަށް ދިއުމަށް، އެމްއޭސީއެލްއިން އިލްތިމާސް ކޮށްފިއެވެ.
އެމްއޭސީއެލް އިން ބުނީ، މިދުވަސްވަރަކީ ޗުއްޓީ ދުވަސްވަރުކަމުން އެއާޕޯޓުގެ ކިއުތައް ދިގުވެ، ޑިލޭތައް މަދުކުރުމަށްޓަކައި ފުރުމުގެ 3 ގަޑިއިރު ކުރިން އެއާޕޯޓަށް ދިޔުމަށް އެދޭ ކަމަށެވެ.
މީގެ އިތުރުން ދަތުރުކުރާ ހުރިހާ ފަރާތްތަކުން ވެސް ޗެކްއިން ވުމުގެ ކުރިން އިމުގާ ފޯމް ފުރުމަށް ވެސް އެމްއޭސީއެލުން ވަނީ އެދިފައެވެ.
މިދުވަސްވަރަކީ ރާއްޖެއަށް ޕީކް ސީޒަން ކަމުން އެއާޕޯޓުން ދޭ ހިދުމަތްތައް ހަރުދަނާކުރުމަށް ގިނަ ބަދަލުތަކެއް ގެނެސްފައި ވާއިރު އިމިގްރޭޝަނުން ވަނީ ކައުންޓަރުތައް އިތުރު ކޮށްފައެވެ.
އެމްއޭސީއެލް އިން ވަނީ މީގެ ކުރިން ވެސް ޗުއްޓީ ދުވަސްވަރާ ދިމާކޮށް ދަތުރުކުރާ މީހުން ގިނަވެ އެއާޕޯޓަށް ބާރުބޮޑުވާތީ ފުރުމުގެ ތިން ގަޑިއިރު ކުރިން އެއާޕޯޓަށް ދިއުމަށް އެދިފައެވެ.
