އެމްޑީޕީގެ ޕްރައިމަރީގައި ވާދަކުރަން ނިންމާފައިވާ ކަމަށް ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިފަދައިން ވިދާޅުވީ އަންނަ މަހުގެ 28 ވާ ހޮނިހިރު ދުވަހު އެ ޕާޓީގެ ރިޔާސީ ޕްރައިމަރީ އޮންނާނެ ކަމަށާއި ޕްރައިމަރީގައި ވާދަކުރުމަށް ބޭނުންވާ ފަރާތްތަކުން އަންނަ ހޮނިހިރު ދުވަހުގެ ހަވީރު 4 ގެ ކުރިން ޕްރައިމަރީ އަށް ކުރިމަތިލުމަށް އެދޭ ފޯމް ފުރިހަމަކުރުމަށް ފަހު ހުށަހަޅަން އެދޭ ކަމަށް އެމްޑީޕީއިން މިއަދު ބުނެފައިވަނިކޮށެވެ.
ކޮންމެ ކެންޑިޑޭޓަކު ވެސް ފޯމް ހުށަހަޅާއިރު، ހުށަހަޅަން ޖެހެނީ އެމްޑީޕީގެ 500 މެންބަރުންގެ ތާއީދާ އެކުގައި ކަމަށް އެމްޑީޕީއިން ބުނެއެވެ.
އެމްޑީޕީއިން ބުނީ މި މަހުގެ 26 ވަނަ ދުވަހު ކެންޑިޑޭޓުންގެ ފައިނަލް ލިސްޓު، ނަންބަރާ އެކު އިއުލާނުކުރުނާނެ ކަމަށާއި މި މަހުގެ 28 އިން 31 ވޯޓުލާ މީހުންގެ ލިސްޓު އާންމުކޮށް، ޝަކުވާ ހުށަހެޅުމަށް ހުޅުވާލުނެ ކަމަށެވެ. އަދި އަންނަ މަހު 3 ގައި ވޯޓުލާ މީހުންގެ ފައިނަލް ލިސްޓު އާންމުކުރާނެ ކަމަށާއި އަންނަ މަހުގެ 10 އިން 15 އަށް ކެންޑިޑޭޓުންގެ މަންދޫބުންނަށް ފުރުސަތު ހުޅުވާލުނެ ކަމަށް އެމްޑީޕީއިން ބުނެއެވެ.
ރައީސް ނަޝީދު މިއަދު ވިދާޅުވީ އެމްޑީޕީގެ ރިޔާސީ ޕްރައިމަރީގައި ވާދަކުރަން ވަނީ ނިންމާފައި ކަމަށެވެ. އަދި ޕާޓީގެ ހުރިހާ މެންބަރުންގެ ވޯޓު ރައީސް ނަޝީދަށް ދެއްވުމަށް ވެސް ވަނީ އެދިފައެވެ.
ރައީސް ނަޝީދުގެ އިތުރުން ރައީސް އިބްރާހީމް މުހައްމަދު ސޯލިހު ވަނީ އެމްޑީޕީގެ ޕްރައިމަރީގައި ވާދަކުރައްވާނެ ކަމަށް އިއުލާން ކުރައްވައިފައެވެ.
އެމްޑީޕީއިން ޕްރައިމަރީއަށް ތައްޔާރުވަމުން އަންނައިރު އިދިކޮޅު ޕްރޮގްރެސިވް ކޮންގްރެސް ކޯލިޝަންގެ ފަރާތުން އަންނަ އަހަރުގެ އިންތިހާބުގައި ވާދަކުރައްވާނީ ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން ކަމަށް، އެ ކޯލިޝަނުން ވަނީ ރަސްމީކޮށް އިއުލާންކޮށްފައެވެ. ޔާމީނަށް ޓިކެޓް ދީފައި ވަނީ އިދިކޮޅުގެ ސެނެޓުގެ އިއްތިފާގުންނެވެ.
ޔާމީންގެ އިތުރުން، އެމްއެންޕީގެ ޓިކެޓުގައި އެ ޕާޓީގެ ރައީސް މުހައްމަދު ނާޒިމް ވާދަކުރައްވާނެ ކަން ކަށަވަރުވެފައިވާއިރު، އެމްޑީއޭގެ ރައީސް އަހްމަދު ސިޔާމް މުހައްމަދު ވެސް އިންތިހާބުގައި ކުރިމަތިލައްވާނެ ކަމަށް ވަނީ އިއުލާނުކުރައްވައިފައެވެ.
