ސީރިއާގެ ރެފިއުޖީ ކޭމްޕުތަކުގައި ދިވެހިންގެ ތެރެއިން ބަޔަކު އުޅެންޖެހި އެފަރާތްތަކަށް ރާއްޖެ ނާދެވި ގިނަ ދުވަސްތަކެއް ވެފައި ވާތީ އެކަން ވީހާވެސް އަވަހަށް ހައްލު ކުރުމަށް އެމްއެންޕީ އިން ސަރުކާރަށް ގޮވާލައިފިއެވެ.
އެމްއެންޕީ އިން ބުނީ ސެޕްޓެމްބަރު 19، 2019 ގައި ބޭއްވި ނޫސްވެރިންގެ ބައްދަލުވުމެއްގައި އެފަދަ ފަރާތަތައް ބޭތިއްބުމަށް ހަދާ މަރުކަޒު ކުރިއަތް އޮތް 2 މަސް ދުވަހުގެ ތެރޭގައި ނިންމާ އެ ފަރާތްތައް ރާއްޖެ ގެންނާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވި ނަމަވެސް އަމަލީ ސިފަ ގެނައުމުގެ އެއްވެސް ކަމެއް ސަރުކާރުން ކުރިއަށް ނުގެންދާ ކަމަށެވެ. އަދި މަދަދަށް އެދި ފޮނުވާ އާދޭސް ތަކަށް ވެސް އެކަށީގެންވާ ޖަވާބެއް ނުދޭ ކަމަށް ސީރިއާގެ ރެފިއުޖީ ކޭމްޕުތަކުގައި އުޅެންޖެހިފައި ވާ ފަރާތްތަކުގެ އާއިލާއިން މައުލޫމާތު ދީފައިވާ ކަމަށް ވެސް އެމްއެންޕީ އިން ބުނެއެވެ.
ހަނގުރާމަވެރި ސަރަހައްދު ތަކުން އަންނަ ދިވެހިން ބޭތިއްބުމަށް އދ ގެ ހިލޭ އެހީ ދަށުން ބިނާކުރި ސެންޓަރުގެ މަސައްކަތް ވެސް 2021 ވަނަ އަހަރު ނިމިފައިވާކަން ފާހަގަކޮށް އެ ޕާޓީ އިން ބުނީ އެ ކަންކަން ހަމަޖެހިފައި ވީނަމަވެސް ސީރިއާގައި ރެފިއުޖީންނަށް ވެފައިވާ ދިވެހިން ރާއްޖެ އައުމުގައި ސަރުކާރުން މަދަދުވެރި ނުވެ އެއް މުއައްސަސާ އިން އަނެއް މުއައްސަސާގެ ބޮލުގައި މިކަމުގެ ޒިންމާ އަޅުވައި އެކަމުގެ ޒިންމާއިން މުއައްސަސާތައް ރެކެން މަސައްކަތް ކުރަމުން ދާ ކަމަށް އާއިލާތަކުން ބުނާ ކަމަށެވެ.
އިތުރަށް އެމްއެންޕީ އިން ވަނީ އެ މައްސަލައަކީ ހާއްސަ ކަމެއްގެ ގޮތުގައި ސަރުކާރުން ދެކި ސީރިއާގައި ތިބި ދިވެހި ދަރިން ރާއްޖެ ގެނައުމުގެ މަސައްކަތް އެކަށީގެންވާ އަވަސް މިނުގައި ނިންމުމަށާއި އެ މީހުން ގެނައުމަށްޓަކައި ސަރުކާރުން ކުރާ މަސައްކަތާބެހޭ ސައްހަ މައުލޫމާތު އެ އާއިލާތަކުގެ މެންބަރުންނާ ހިއްސާކުރަމުން ގެންދިއުމަށް ރައީސުލްޖުމްހޫރިއްޔާ އަށް އިލްތިމާސް ކޮށް މިދިޔަ މަހު 27 ވަނަ ދުވަހު ރައީސް އަށް އެކަން ހުށަހަޅާފައި ވާ ކަމަށް ބުނެފައެވެ.
ކުރަން ހެޔޮވާވަރުގެ ކަމެއްނޫން.