މަޖިލީސް20: އިންތިހާބުގެ ހާއްސަ ކަވަރޭޖް

ނޫސްވެރިއަކު ރައީސް ޔާމީނާ ސުވާލުކުރަމުން ބުނީ ހަސަން ކުރުސީ ކިޔާ އެކައުންޓަކުން ރައީސް މުއިއްޒުގެ ބައިވަރު ކޮރަޕްޝަން ތަކެއްގެ ވާހަކަ ލީކުވި ކަމަށް ލިޔެފައި އޮތްކަމަށާއި އެކަހަލަ ކޮރަޕްޝަން ތަކެއްގެ ވާހަކަ މީޑިއާތަކުގައި ވެސް ފެތުރިގެން ދިޔަކަމަށް. މިކަމަށް ރައީސް ޔާމީން ވިދާޅުވަނީ ކީކޭތޯ އެހުމުން ޔާމީން ވިދާޅުވީ އަނގަބަހުން ޖަވާބު ނުދެއްވާ ޖަވާބު ދެއްވަން ބޭނުންފުޅު ވަނީ "އެކްސްޕްރެޝަނުން" ކަމަށް. ރައީސް ޔާމީން ޖަވާބުގައި ވަނީ ބިމާ ދިމާއަށް އަދި އުޑާ ދިމާއަށް ބައްލަވާލައްވާފަ.

މިއަދު ކުރިއަށްދާ ރައްޔިތުން މަޖިލިސް އިންތިހާބުގައި 4 ޖެހުމުގެ ނިޔަލަށް 181،406 މީހަކު ވޯޓުލައިފި. 

އީސީއިން ހާމަކުރި ތަފާސް ހިސާބުތަކުން ދައްކާ ގޮތުގައި 63.73 ޕަސެންޓް މީހަކު ވޯޓު ލާފައިވާއިރު އަދިވެސް ވޯޓުލުމުގެ ހައްގު ލިބިގެންވާ މީހުންގެ ތެރެއިން 103،257 މީހަކު ވޯޓު ލާފައެއް ނުވޭ.

މަލީހު މިފަދައިން ވިދާޅުވީ މިއަދު ކުރިއަށްދާ ރައްޔިތުން މަޖިލީހުގެ އިންތިހާބުގައި ވޯޓުލެއްވުމަށްފަހު ނިކުމެވަޑައިގެން ނޫސްވެރިންނާ ވާހަކަދައްކަވަމުންނެވެ.

ޕީއެންއެފްއަށް ކިތައް ދާއިރާގެ ގޮނޑި ލިބޭނެ ކަމަށް އުންމީދުކުރައްވަންތޯ "ދަ ޕްރެސް" އިން ކުރެއްވި ސުވާލަށް އެކަށީގެންވާ ޖަވާބެއް ނުލިބުނެވެ.

އެ ސުވާލާ ގުޅިގެން މަލީހު ވިދާޅުވީ މި އިންތިހާބުގައި އުންމީދުކުރަނީ ރައްޔިތުންގެ ބަސް އިވިގެންދިއުން ކަމަށާއި ޕީއެންއެފްގެ ލޯގާއާއި ނަމުގައި ކެންޑިޑޭޓުން ނެރުމުގެ ފުރުސަތު ނެތް ކަމަށެވެ. އަދި ރީ ރަޖިސްޓްރީ ކުރުމުގެ ފުރުސަތު އެކަށީގެންވާ ވަރަށް ދީފައި ނުވާ ކަމަށާއި ވޯޓުލުމަށް ބާރު އެޅުމަށް މަސައްކަތް ކުރެވިފައި ނުވާ ކަމަށް ވެސް މަލީހު ވިދާޅުވިއެވެ.

ފުލުހުން ބުނީ ރައްޔިތުން މަޖިލީހުގެ އިންތިހާބުގެ ސެކިއުރިޓީ އޮޕަރޭޝަންގައި މިހާތަނަށް ޖުމުލަ 3 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށް.

އެއީ ވޯޓް ކަރުދާސް ދެއްކި މައްސަލައަކާ ގުޅިގެން މާލެއިން އެކަކު އަދި ވޯޓުލާ މަރުކަޒުގެ މަސްލަހަތު ނަގާލައި ވޯޓުލުމަށް ހުރަސްއެޅި މައްސަލައަކާ ގުޅިގެން ގދ. ފިޔޯރީއިން ދެ މީހަކު ކަމަށް ވެސް ފުލުހުން ބުނޭ.

ޕީއެންއެފްގެ ވަގުތީ ރައީސް ޒޭން އަބްދުﷲ ޔާމީން ވޯޓުލައްވާފައިވަނީ އަހުމަދިއްޔާ ސްކޫލްގައި ބަހައްޓާފައި ހުރި މައްޗަންގޯޅި މެދު ދާއިރާގެ ވޯޓު ފޮއްޓަށް.

ރައީސް މައުމޫން ވޯޓު ލައްވާފައި ވަނީ، މައްޗަންގޯޅި އުތުރު ދާއިރާގެ އަމީނިއްޔާ ސްކޫލްގައި ބަހައްޓާފައިވާ ވޯޓު ފޮއްޓަށް.

އީސީއިން ބުނީ 10 ޖެހުމުގެ ނިޔަލަށް 47،296 މީހުން ވޯޓުލާފައިވާ ކަމަށް. އެއީ ވޯޓުލުމުގެ ހައްގު ލިބިގެންވާ މީހުންގެ ނިސްބަތުން 16.61 ޕަސެންޓް.

އެއާއެކު ވޯޓު ނުލާ މީހުންގެ އަދަދަކީ 237،367 މީހުން.

ކުރީގެ ރައީސް މުހައްމަދު ނަޝީދު ވޯޓުލައްވާފައިވަނީ އިސްކަންދަރު ސްކޫލުގައި ބަހައްޓާފައިވާ ގަލޮޅު އުތުރު ދާއިރާގެ ވޯޓު ފޮއްޓަށް.

ރައީސް ނަޝީދު ވޯޓުލައްވާފައިވާއިރު މިހާރުގެ ރައީސް ޑރ. މުހައްމަދު މުއިއްޒާއި ކުރީގެ ރައީސް އިބްރާހިމް މުހައްމަދު ސޯލިހު ވެސް ވަނީ ވޯޓު ލައްވާފައި.

ކުރީގެ ރައީސް އިބްރާހިމް މުހައްމަދު ސޯލިހު މިފަދައިން ވިދާޅުވީ މިއަދު ކުރިއަށްދާ ރައްޔިތުން މަޖިލީހުގައި އިންތިހާބުގައި ވޯޓުލެއްވުމަށްފަހު ނިކުމެވަޑައިގެން ނޫސްވެރިންނާ ދެއްކެވި ވާހަކަފުޅުގައެވެ.

ރައީސް ސޯލިހު ވިދާޅުވީ ވޯޓުލުމުގެ ކަންތައް ކުރިއަށްދާތަން ފެނިވަޑައިގަންނަވާއިރު އުންމީދަކީ މިއަދުގެ ވޯޓުލުން ނިމޭއިރުގައި ރަނގަޅު އަޣުލަބިއްޔަތެއް އެމްޑީޕީއަށް ލިބިގެން ދިއުން ކަމަށެވެ. އަދި އެކަން ކެމްޕެއިންގެ ތެރެއިންނާއި މިއަދު ވޯޓުލަމުންދާއިރު ވެސް ފެނިވަޑައިގަންނަވާ ކަަމަށް ރައީސް ސޯލިހު ވިދާޅުވިއެވެ.

ކުރީގެ ރައީސް އިބްރާހިމް މުހައްމަދު ސޯލިހު ވޯޓުލައްވާފައިވަނީ ޖަމާލުއްދީން ސްކޫލުގައި ބަހައްޓާފައިވާ ހިންނަވަރު ދާއިރާގެ ވޯޓު ފޮއްޓަށް.

ޕީއެންސީގެ ޗެއާޕާސަން އަބްދުއްރަހީމް އަބްދުﷲ (އަދުރޭ) ވޯޓު ލައްވައިފި. އަދުރޭ ވޯޓު ލައްވާފައި ވަނީ ރިހިޖެހި ކޮށި އިމާރާތުގައި ހުންނަ ހުސް ޖާގައިގައި ބަހައްޓާފައިވާ ލެއްވީ ލ އަތޮޅު، މާލެ ވޯޓު ފޮއްޓަށް.

އީސީއިން ބުނީ 9 ޖެހުމުގެ ނިޔަލަށް 24،703 މީހުން ވޯޓުލާފައިވާ ކަމަށް. އެއީ ވޯޓުލުމުގެ ހައްގު ލިބިގެންވާ މީހުންގެ ނިސްބަތުން 8.68 ޕަސެންޓް.

އެއާއެކު ވޯޓު ނުލާ މީހުންގެ އަދަދަކީ 259،960 މީހުން.  

ރައީސް ޑރ. މުހައްމަދު މުއިއްޒު އަނބިކަނބަލުން، ސާޖިދާ މުހައްމަދު ވޯޓު ލައްވާފައިވަނީ އަމީނިއްޔާ ސްކޫލުގައި ބެހެއްޓިފައިވާ މައްޗަންގޯޅި މެދު ދާއިރާގެ ވޯޓު ފޮއްޓަށް.

ސާޖިދާ ވޯޓު ލައްވާފައިވާއިރު ރައީސް މުއިއްޒުއާއި ދޮށީދަރިފުޅު ޔާސްމީން މުހައްމަދު މުއިއްޒުވެސް ވަނީ ވޯޓު ލައްވާފައި.

ރައްޔިތުން މަޖިލީހުގެ ވޯޓުލުން ފަށައިފިއެވެ.

8 ޖެހުމާއެކު ވޯޓުލުން ފަށާފައިވާއިރު މިއަދު ހަވީރު 5:30 ގެ ނިޔަލަށް ވޯޓުލުން ކުރިއަށްދާނެ ކަމަށް އިލެކްޝަން ކޮމިޝަނުން ވަނީ ބުނެފައެވެ.