ހުޅުމާލޭގައި ހަދާ ސަރުކާރުގެ އާ އޮފީސް އިމާރާތް އަންނަ ޖެނުއަރީ މަހު ބޭނުންކުރަން ފަށާނެ ކަމަށް ޕްލޭނިން މިނިސްޓްރީން ބުނެފިއެވެ.
މިނިސްޓްރީން ބުނީ، މި އޮފީސް އިމާރާތުގެ މަސައްކަތް މިއަހަރު ނިންމާލާނެ ކަމަށާއި އަދި އަންނަ އަހަރުގެ ޖެނައަރީ މަހު މި އޮފީސް އިމާރާތް ބޭނުންކުރަން ފަށާނެ ކަމަށެވެ.
މިގޮތުން މިހާރު ކުރިއަށްދަނީ އިމާރާތުގެ އެންމެ ފަހުގެ މަސައްކަތްތައް ކަމަށް މިނިސްޓްރީން ބުނެއެވެ.
ސަރުކާރު އޮފީސް އިމާރާތުގެ މަސައްކަތް ފެށީ 2020 ވަނަ އަހަރު ފެބްރުއަރީ މަހުއެވެ. ނަމަވެސް ކޮވިޑުގެ ހަލަތާ ހެދި އިމާރާތުގެ މަސައްކަތް ލަސްވެގެން ދިޔައެވެ.
މިނިސްޓްރީން މީގެ ކުރިން ބުނީ، ދިމާވި ދަތިތަކަށް ފަހު މިދިޔަ މަހު އެތަނުގެ މަސައްކަތް އެއްކޮށް ނިންމާ މިމަހު މި އިމާރާތް ބޭނުން ކުރަން ފަށާނެ ކަމަށެވެ.
ހަ ބުރީގެ އެ އިމާރާތުގައި ތިން މިނިސްޓްރީއެއް ހުންނާނެއެވެ. އެ އިމާރާތުގެ ފަންގިފިލާތައް ބެހިގެންވާ ގޮތަކީ:
- ގްރައުންޑް ފްލޯ އަދި ފުރަތަމަ ފަންގިފިލާ: ޕާކިން އޭރިއާ
- ދެވަނަ ފަންގިފިލާ: މިނިސްޓްރީ އޮފް ޖެންޑާ، ފެމިލީ އެންޑް ސޯޝަލް ސާވިސަސް
- ތިންވަނަ ފަންގިފިލާ: މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން
- ހަތަރުވަނަ ފަންގިފިލާ: އެމެރިކަން އެމްބަސީ
- ފަސްވަނަ ފަންގިފިލާ: މިނިސްޓްރީ އޮފް ހަޔާ އެޑިއުކޭޝަން
- ހަވަނަ ފަންގިފިލާ: ކުދި މީޓިން ރޫމްތަކާއި ސެމިނާ ރޫމެއް އަދި ޓެރަހެއް
މިނިސްޓްރީން ބުނީ، މި އިމާރާތުގެ ކޮންމު ފަންގިފިލާއެއްގެ ބޮޑު މިނަކީ 25،000 އަކަފޫޓު ކަމަށެވެ.
ޕްލޭނިން މިނިސްޓްރީގެ ފަރާތުން ޑިސެމްބަރު 2019ގައި ޗައިނާގެ ހުނާން ކޮންސްޓްރަކްޝަން އިންޖިނިއަރިން ގުރޫޕާ ހަވާލު ކޮށްގެން ހަދާ މި އިމާރާތަށް ޖުމުލަ 185 މިލިއަން ރުފިޔާ ހަރަދު ކުރެއެވެ.
