އިއްޔެ ގަލޮޅު ދަނޑުގައި ކުރިއަށް ގެންދިޔަ ޔޯގާ ހަރަކާތަށް ހުރަސް އަޅައި، ހަމަނުޖެހުން ހިންގަން ބަޔަކަށް ފުރުސަތު ލިބުމުން ކަންބޮޑުވެ ވަޑައިގަންނަވާ ކަމަށް، ފުލުހުންގެ ކޮމިޝަނަރު މުހައްމަދު ހަމީދު ވިދާޅުވެއްޖެއެވެ.
ބައިނަލްއަގުވާމީ ޔޯގާ ދުވަހާ ގުޅިގެން އިއްޔެ ހެނދުނު ގަލޮޅު ދަނޑުގައި ބޭއްވި ހަރަކާތަށް ހުރަސް އަޅައި، ބަޔަކު ވަނީ ހަމަނުޖެހުން ހިންގާފައެވެ. އެ ހަމަނުޖެހުމުގައި ބައެއް މީހުންނަށް އަނިޔާދީ ތަކެއްޗަށް ގެއްލުން ދީފައި ވާއިރު، އެ މައްސަލައާ ގުޅިގެން ހަ މީހަކު ވަނީ ހައްޔަރު ކޮށްފައެވެ. އަދި އެ މައްސަލައާ ގުޅިގެން ފުލުހުންނާއި، ސަރުކާރުގެ އެކި މުއައްސަސާތަކުން އެކަން ކުށްވެރިކޮށް، ބަޔާން ވެސް ނެރެފައި ވެއެވެ.
މިއަދު ކުރެއްވި ޓްވީޓެއްގައި ހަމީދު ވިދާޅުވީ، ފުލުހުން އިއްޔެ ހަރަކާތްތެރި ވި ގޮތާއި، އިއްޔެ ބޭއްވި ހަރަކާތުގައި ބަޔަކަށް ހަމަނުޖެހުން ހިންގުމުގެ ފުރުސަތު ލިބުމުން ކަންބޮޑުވެ ވަޑައިގަންނަވާ ކަމަށާއި، އެކަމާ ގުޅިގެން ފުލުހުންގެ ތެރެއިން ބަލަން ޖެހޭ ކަންކަން ބަލަމުންދާ ކަމަށެވެ. އަދި އެކަމުގައި ކަމާބެހޭ ފަރާތްތަކަށް އެއްބާރުލުން ދެއްވާނެ ކަމުގެ ޔަގީންކަން އޭނާ ވަނީ ދެއްވާފައެވެ.
އޭގެ އިތުރުން، ފުލުހުންގެ އޮޕަރޭޝަންތަކުގައި އަމަލުކުރަމުން ދާ ގޮތް ރަނގަޅު ކުރުމަށް ވެސް މަސައްކަތް ކުރައްވާނެ ކަމަށް އޭނާ ވިދާޅުވިއެވެ.
އިއްޔެގެ ހަމަނުޖެހުމާ ގުޅިގެން ބަލަން ޖެހޭ ކަންކަން ފުލުހުން ބަލަމުން ދާއިރު، އެ މައްސަލަ ބެލުމަށްޓަކައި ހަތް ވަޒީރުންގެ ސަބް ކޮމިޓީއެއް ސަރުކާރުން ރޭ އެކުލަވާލައިފައެވެ. އެ ސަބް ކޮމިޓީގައި ހޯމް މިނިސްޓަރު އިމްރާން އަބްދުﷲ ހިމެނިވަޑައެއް ނުގަންނަވައެވެ.
އެ މައްސަލައާ ގުޅިގެން ކުރެއްވި ޓްވީޓެއްގައި ރައީސް އިބްރާހީމް މުހައްމަދު ސޯލިހު ވިދާޅުވީ، އެ ހަމަނުޖެހުން ހިންގުމުގައި ޒިންމާވާ މީހުން ގާނޫނުގެ ކުރިމައްޗަށް ގެންނާނެ ކަމަށެވެ.
އެ މައްސަލައާ ގުޅިގެން ނެރުނު ބަޔާނުގައި ފުލުހުން ވަނީ، އެ ހަމަނުޖެހުމުގައި ބޭނުން ކުރި ބައެއް ސާމާނު ނެރުނީ ޕީޕީއެމްގެ އޮފީހުން ކަމަށެވެ. ފުލުހުންގެ ތުހުމަތުތަކާ ގުޅޭ ބައެއް ފޮޓޯތައް ސޯޝަލް މީޑިއާގައި އާންމުވެފައި ވާއިރު، ޕީޕީއެމުން އެކަން ދޮގުކުރެއެވެ.
