ޑްރެސިންގް ޓޭބަލް ކައިރިއަށް ހުއްޓިލަމުން 14 އަހަރުގެ އާޔާ އޭނާ ލައިގެން ހުރި އެކްޓިވިޓީ ޔުނީފޯމަށް ބަލާލިއެވެ. އަރިއަރިއަށް އެނބުރެމުން ލޯގަނޑުން ފެންނަމުން ދިޔަ އޭނާގެ ހަށިގަނޑުގެ ވަނާތަކަށް ބަލަމުން ދިޔަ އާޔާ ބަނޑު ހިންދާލުމަށް ނޭވާ ހިފަހައްޓާލަން މަސައްކަތް ކުރިއެވެ. އާންމުކޮށް އެ އުމުރުފުރާގެ ކުދިންނާ ހިލާފަށް އާޔާ އަކީ ކުޑަކޮށް ފަލަކޮށް ހުންނަ ކުއްޖެއް ކަމުން ބަނޑުގައި މަސް ޖަހާ ފައި ހުންނާތީ އެކަމާ މިހާރު އާޔާ ހިތްހަމައެއް ނުޖެހެއެވެ. ކްލާހުގައި ތިބޭ ކުދިން ކިޔާ އެއްޗިހިން އަމިއްލަ ނަފްސު ދެކެ ފޫހިވެ އެ ކުދިންނެކޭ އެއްގޮތަށް ހިކިކޮށް ހުންނަން ބޭނުންވާތީ އިންޓަވަލް ގަޑީގައި ވެސް އާޔާ ހުންނަނީ އެއްވެސް އެއްޗެއް ނުކައެވެ.

ބުރާސްފަތި ދުވަހު ސްކޫލުން ގެއަށް އައި އިރު މިއަދު ބަޔޮލޮޖީ މާއްދާގެ އެކްސްޓާ ކްލާހެއް ހާވީރު ބާއްވާނެ ކަމަށް އެ މާއްދާ ކިޔަވައިދޭ މުދައްރިސް ވަނީ ބުނެފައެވެ. އިތުރު ގަޑިތަކަށް ސްކޫލަށް ދާ ނަމަ ލައި އުޅޭ އެކްޓިވިޓީ ޔުނީފޯމް މީހާރު އާޔާގެ ހަށިގަނޑަށް ކުޑަކޮށް ދޫވެފައި ހުއްޓަސް އަދިވެސް އާޔާ ބޭނުންވާ ވަރަށް އޭނާގެ މެދު ހަށި ހިމަ ނުވާތީ ފޫހި ގޮތަކަށް ފުން ނޭވާއެއް ބޭރުކޮށްލިއެވެ. މާދަމާ އިން ފެށިގެން ކޮންމެ ދުވަހަކު މޫދަށް ފަތަން ދާން ހިތު އަޅައިގެންނެވެ. ނަމަވެސް ދެން އޭނާގެ ހިޔާލު އަނެއްކާ ވެސް ބަދަލުވިއެވެ. މޫދަށް ގޮސްފި ނަމަ ހަންގަނޑު އަނދާނެ ކަމަށާއި އޭނާ އިތުރަށް ކަޅު ވެއްޖިއްޔާ ވެސް ކުދިން ކުރާނެ މަލާމާތް ހިތަށް އެރުމުން ޔޫޓިއުބް އިން ވީޑިއޯ ބަލައިގެން ކަސްރަތު ކުރަން އޭނާ ނިންމިއެވެ.

"މަންމާ... މި ދަނީ އެކްސްޓްރާ ކްލާހަކަށް ދާން.... 6:30 ގަ ނިމޭނީ، އަޅުގަނޑު އަންނާނަން އަޒްކާ އާ އެކީ.."

ބޫޓު ފަޔަށް މަހާލަމުން ސިޓިން ރޫމްތެރޭ ހުރި އޭނާގެ މަންމަ އާމިރާއަށް އަޒްކާ ގޮވާލިއެވެ. އަދި އަވަހަށް ގެއިން ނުކުންނަމުން އަތުގައި އޮތް މޮނީޓަރު ފޮތަކީ ބަޔޮލޮޖީ ފޮތްތޯ އޭނާ ޔަގީން ކޮށްލިއެވެ.

*** *** *** *** *** ***

ސްކޫލަށް ދާން އާޔާ ގެއިން ނިކުތް ވަގުތު އާމިރާ ގޯތިތެރެއަށް ނުކުމެ އެއްފަރާތެއްގައި ޖަހާފައިވާ ވެލި ފުނި ކައިރީ ކުޅެން ހުރި އިޔާން ގޭތެރެއަށް ވައްދަން މަސައްކަތް ކުރިއެވެ. އޭރު އިޔާން ހުރީ ހިރަފުހުން ތަތްތެޅިފައެވެ. އާޔާ ސްކޫލުން އަންނަން ވާއިރަށް އިޔާން ފެންވަރައިގެން ޓީވީން ކާޓޫނެއް ބަލަން އިންނާނީ ކަމަށް ބުނެ އާމިރާ އޭނާގެ ހަގު ދަރިފުޅު ހައްދާލައިގެން ގޭތެރެއަށް ވެއްދީ އިރުއޮއްސުމުގެ ކުރިން އެ ކުއްޖާ ފެންވަރުވާ ރީތިކުރަން ބެނުންވެފައި ހުރުމުންނެވެ.

"ނޯ... މަންމީ... ބައްޕި ކައިރީ ބުނެބަ ކޮއްކޮ ގޮވައިގެން މަސް ބާނަން ހިނގާށޭ... ޕްލީސް"

އިޔާންގެ ބައްޕައާ އެކު ބަނދަރަށް ގެންދިއުމަށް އެދި ބޮޑާ ހާކަމުން ގޭތެރެއަށް ވަދެ ފެންވަރަން ނުދާން މަސައްކަތް ކުރިއެވެ. އެ ސޮރު ރޮއްވާ ނުލާ ފެންވަރުވަން ގެންދިއުމަށް އާމިރާއަށް ޖެހުނީ މޮޅު ވާހަކައެއް ދައްކާށެވެ. އެހެންކަމުން ބައްޕައާ އެކީ އެ އާއިލާ އެންމެން މަހަށް ދާނީ ކަމަށާއި މާދަމާ އަކީ ހުކުރު ދުވަސްކަމުން ކައިރީ ފަޅުރަށަކަށް ދަތުރުދާން ވެސް ޕްލޭން ކުރެވިދާނެ ކަމަށް އާމިރާ ބުންޏެވެ. އިޔާން ވީ އުފަލުން އަވަހަށް ފެންވަރަން ދާން އެއްބަސްވެ ކޮޓަރިއާ ދިމާލަށް ދުއްވައިގަތެވެ.

*** *** *** *** *** ***

ގޯތިން ބޭރަށް ނުކުތުމަށް ފަހު އާޔާ، އޭނާގެ ޕާސްގެ ޒިބު ކަހާލައި އޭގެތެރެއިން މަޑު ފިޔާތޮށި ކުލައެއްގެ ލިޕްގްލޮސެއް ނެގިއެވެ. އަދި އާޔާގެ މަޑު ފިޔާތޮށި ކުލައިގެ ބޮޑު ތުންފަތް އޫކޮށްލުމަށް ފަހު އެ ލިޕްގްލޮސް ހާކާލީ އަތުގައި އޮތް މޮނީޓަރު ފޮތުގައި ލައްވާފައިވާ ސެލޯފީނުން ފެންނަމުން ދިޔަ އޭނާގެ ސޫރައަށް ބަލާލަމުންނެވެ. އެއަށް ފަހު އޮމާންކޮށް އެއްފަށަށް އައްސާފައިވާ އޭނާގެ ފަން ދިގު އިސްތަށިގަނޑުގައި އަތް ހާކާލި ވަގުތު، ތުންފަތް މައްޗަށް ލުއި ހިނިތުން ވުމެއް ވެރިވެގެން ދިޔައެވެ.

ގަޑި ޖެހުމުގެ ކުރިން ކްލާހަށް ވަންނަން އޭނާ ބޭނުން ވިއެވެ. ލަސްވެއްޖިއްޔާ ބައެއް ކުދިން ދިމާ ކުރާނެ ކަން އެނގޭތީ، އެ ބަސްތަކުގެ ހަމަލާއިން ސަލާމަތް ވާން އޭނާ ބޭނުން ވިއެވެ. އާމިރާއަށް ވަގަށް ސްކޫލް ގަވައިދާ ހިލާފަށް ތުންފަތުގައި ކުލަޖައްސާ ފަރިވެގެން އޭނާ ސްކޫލަށް ދަނީ ވެސް ބައެއް ކުދިން ކުރާ މަލާމާތާއި ފުރައްސާރައިން ސަލާމަތް ވުމަށެވެ. އޭނާ އަކީ ނާޑްއެއް ނޫން ކަން ސާބިތުކޮށް ދިނުމަށެވެ. ހަމައެއާއެކު އެ ކުލާހުގައި ކިޔާވާ މާހިލްއަށް ކަމުދަނީ ފަހުގެ ފެޝަނަށް ހެދުން އަޅާ، މޭކަޕުން ޖަރީވެގެން ތިބޭ ކުދިން ކަން އާޔާ އަށް ގަބޫލު ކުރެވޭތީ، މާހިލްއާ މެދު އާޔާގެ ހިތުގައި އުފެދިފައިވާ ޝައުގެއްގެ ބޮޑު ކަމުން މޮޑާން ސަގާފަތަށް އުޅެން އާޔާ މަސައްކަތް ކުރެއެވެ.

ސްކޫލާ އަރާ ހަމަވިއިރު ސްކޫލް ކައިރިން މީހެއްގެ ހިލަންވުމުން އާޔާ އެ ދިމާއަށް ބަލާލީ ދެބުމަ ގޮށް ޖަހާލަމުންނެވެ. މިއަދުވެސް އެމިހާގަނޑުގެ ކުރިމައްޗަށް ޖެހުމަކީ މުޅި ދުވަސް ހަރާބުވުން ގޮތުގައި އާޔާއަށް ގަބޫލު ކުރެވުނެވެ. އެމީހާއާ ދިމާއަށް ނުބަލާން އާޔާ އަނެއް ފަރާތަށް އެނބުރިލީ ތުންގަނޑު ވިކާލަމުންނެވެ. އޭރު ކަންމަތީގައި މަޑުކޮށްގެން އާޔާގެ ހަށިގަނޑަށް ބަލަހައްޓައިގެން ހުރި ޒުވާނާގެ ތުންފަތަށް ލާނެއް ހިނިތުންވުމެއް ވެރިވިއެވެ.

"އާޔާ... އަޅެ ވާހަކަ ދައްކާލަން އާދެބެލަ... ވަރަށް ބޮޑު ވާހަކައެކޭ..."

ފަވާޒް ކުރިއަށް ޖެހިލަމުން އޭނާ ލައިގެން ހުރި ދޫ ޖީންސްގެ ދެޖީބަށް އަތް މަހާލިއެވެ. ލައިގެން ހުރި ގަމީހުގެ މޭމަތިން ދެތިން ގޮށް ނައްޓާފައި ހުރުމުން އޭނާގެ ކަރުގައި އަޅަފައި އޮތް ދިގު ފަށުގެ ވިދުން ފާޅުވަމުން ދިޔައެވެ. އާޔާ ކުރިމައްޗަށް ހުއްޓެމުން، ކުރި ބައްދަން ފަވާޒް މަސައްކަތް ކުރިއެވެ. ފުސް މޫނު ހަދާލަމުން ފަވާޒާ ދިމާއަށް އާޔާ ބަލާލީ ދެލޯ އަޅާލަމުންނެވެ.

"ދެން ފަވާޒޫ... އަހަރެން ގަޑި ޖެހެނީއޭ..."

ފަވާޒުގެ ގައިން ނެއްޓިގެން ކުރިއަށް ދާން އާޔާ މަސައްކަތް ކުރީ އޭނާއަށް ވުރެއް އުމުރުގެ ގޮތުން ދިހަ ވަރަކަށް އަހަރު ދޮށީ އެމީހާ ފޮށޭ ވަރުން ސްކޫލްގައި އުޅޭ ބައެއް ކުދިން އާޔާ އާ އެމިހާއާ އަޅުވާ ކިޔާތީއެވެ. އެ ރަށުގައި ގޮތެއް ފޮތެއް، އެއްވެސް އަހްލާގެއް ނެތް މީހެއް ކަމަށް ގިނަ މީހުން ގަބޫލު ކުރާ ފަވާޒަކީ، އާޔާ އެކަނި ތަނަކަށް ދާތަން ފެނިއްޖެ ނަމަ މިހެން އުނދަގޫކޮށް އޭނާއާ ފޮށެ ހަދާ މީހެކެވެ. ގަޑި ޖެހެނީ ކަމަށް ބުނުމުން އިތުރަށް އާޔާ ހުއްޓުވާކަށް ފަވާޒް މަސައްކަތެއް ނުކުރެއެވެ. އެއްފަރާތަކަށް ޖެހި އާޔާ ސްކޫލަށް ވަންނަން ދާން ފަވާޒް ތަން ދެއްކީ އެ މައުސޫމް މޫނު މަތިން ފެންނަމުން ދިޔަ ނުތަނަވަސް ކަން ފަވާޒަށް އިހުސާސް ކުރެވުނީމައެވެ.

*** *** *** *** *** ***

މަދު ކުދިންތަކެއް ކްލާހުގައި ތިބި އިރު އެ ކްލާހުގެ ގިނަ ކުދިން ތިބީ ކޮމްޕައުންޑް އޭރިއާގައެވެ. ގްރޫޕް ގްރޫޕަށް ސްކޫލްގެ ގޯތިތެރޭ އެކި ކުދިން ތިބި އިރު އެންމެން ވެސް ތިބީ އޮލަ ވާހަކަ އެއްގައެވެ. އެއެންމެންގެ ތެރެއިން މާހިލް ފެނޭތޯ އާޔާގެ ނަޒަރު ވަށައިގެން ހިންގާލިއެވެ.

އެ ކްލާހުގައި އެންމެ މަގުބޫލު ދެ އަންހެން ކުދިން ކަމަށްވާ އަޒްކާ އާއި ނުހާ އާއެކު މާހިލް ހުރިތަން ފެނުމުން އެ ތިން ކުދިން ތިބި ދިއްގާ ގަސް ދަށަށް ދާން އާޔާ އަވަސް ވެގަތެވެ. އާޔާ ފެނުމާ އެކު މާހިލްގެ ތުންފަތަށް ލުއި ހިނިތުންވުމެއް ވެރި ވި މަންޒަރު ފެނި އާޔާ ލަދުރަކި ގޮތަކަށް އިސްޖަހާލިއިރު އެމީހުންނާ އޭނާ އަރާ ހަމަވީއެވެ. އާޔާ އައުމުން އެތިން އެކުވެރިންނާ ދުރަށް މާހިލް ޖެހިލިއެވެ. އާޔާއަށް އެކަމުން ނުތަނަވަސްކަމެއް ވެރިވިއެވެ. މާހިލް އެތަނުން އެ ދިޔައީ އާޔާ އައުމުން ބާއޭ އޭނާގެ ހިތަށް އެރިއެވެ.

އެ ވަގުތު ސްކޫލްގެ މައިދޮރުން އެތެރެއަށް ވަން ބަޔޮލޮޖީ މުދައްރިސްއާ ދިމާއަށް ހުރިހާ ކުދިންގެ ސަމާލުކަން ހުއްޓުނެވެ. އެހިސާބުން ހުރިހާ ކުދިން ވެސް ކްލާސް ރޫމާ ދިމާއަށް ހިނގައިގަތެވެ. ފޫހިގޮތަކަށް ހުރެ އާޔާ ވެސް ކްލާސް ރޫމަށް ދާން ހިނގައިގަތީ ދުރުގައި ތިބި ފިރިހެން ކުދިންތަކާ ދިމާއަށް ހިނގައިގަތް މާހިލްއަށް ވައްކަޅިން ބަލާލަމުންނެވެ.

ހުރިހާ ކުދިން ކްލާހަށް ވަދެ ގޮނޑިތަކުގައި އިށީނެވެ. އެކަކު އަނެއްކަކަށް މައްލަވަ ކޮށް އަދިވެސް ސަކަރާތް ޖަހާތީ ހީވަނީ މުޒާހަރާއެއް ކުރަމުން ދިޔަ ހެންނެވެ. އެކަކަށް ވުރެ ބާރަށް އަނެކަކު ވާހަކަ ދައްކާ، ހީ ސަމާސާ ކުރަމުން ދިޔައިރު، މުދައްރިސް މުޅި ކްލާހަށް ބަލާމަމުން ކަރުކެހިލިއެވެ. އެ އަޑަށް ވެސް އެ ކްލާސް ކުދިން ހިމޭން ނުވުމުން އަތުގައި އޮތް ފޮތަކުން އޭނާ މޭޒު މަތީ ޖަހާލިއެވެ. މުޅި ކްލާސް ހަމަހިމޭންވެ މުދައްރިސް ދައްކަން އުޅޭ ވާހަކައަށް ހުރިހާ ކުދިން ސަމާލުކަން ދޭން އެހިސާބުން މަސައްކަތް ކުރިއެވެ.

*** *** *** *** *** ***

ސޯފާގައި ވާހަކަ ފޮތެއް ހިފައިގެން ކިޔާލަން އިން އާމިރާއަށް އެގޭ ޖެހިގެން ހުރި މިސްކިތު މުދިމު އިޝާން ނަމާދަށް ގޮވި އަޑު އިވުމާ އެކު އޭނާ ސިހިފައި ގަޑިއަށް ބަލާލީ، އެތާ އެހެން އިނދެވުނީ ކިހާއިރެއް ވަންދެން ކަން ނޭނގުނީމައެވެ. ލޯބީގެ ދިވެހި ވާހަކައެއް ފޯރީގައި ކިޔަން އިން އާމިރާއަށް ވަގުތު ދިޔަ ގޮތް ވެސް ނޭނގުނެވެ. އެ ފޮތް ލައްޕާލަމުން ނަމާދު ކުރަން ދާން އާމިރާ އަވަސްވެގަތީ ދޮށީ ދަރިފުޅު އާޔާއަށް ގޮވައި، ނަމާދަށް އަރަން ހަދާން ކޮށްދެމުންނެވެ.

އާމިރާއަށް އެ ވަގުތު ޖަވާބު ދިނީ އިޔާންއެވެ. ޓީވީން ކާޓޫން ބަލަން އިން ހަ އަހަރުގެ އިޔާން އަދި ދޮންތަ ގެއަށް ނާންނަ ކަމަށް ބުންޏެވެ. ކޮޓަރީއާ ދިމާލަށް ދިޔަ އާމިރާ އެ ހުރި ފިޔަވަޅު މައްޗަށް ހުއްޓުން އެރީ އާޔާ ގެއަށް ނައިސް ލަސްވުމުންނެވެ. 6:30 ވާން ވާއިރަށް ކްލާސް ނިމޭނެ ކަމަށް ބުނި އާޔާ އެހާ ލަސްވީ ކީއްވެ ބާއޭ ހިތަށް އެރި އާމިރާގެ ނިތްކުރި މައްޗަށް ރޫގިނަ ކޮށްލިއެވެ.

(ނުނިމޭ)

ރޯދަ ވާހަކަ