ކޮވިޑް 19 މެނޭޖް ކުރުމުގެ ހުރިހާ ކްރެޑިޓެއް ހައްގުވަނީ ރައީސް އިބްރާހިމް މުހައްމަދު ސޯލިހަށް ކަމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.
ރޮޒެއިނާ މިފަދައިން ވިދާޅުވީ ރައްޔިތުން މަޖިލީހުގެ ރައީސް މުހައްމަދު ނަޝީދަށް ރައްދު ދެއްވައެވެ.
މިއަދު މަޖިލީހަށް ހުށަހެޅުނު ފޮރިން ސާވިސް ބިލުގެ ބަހުސްގައި ދާންދޫ ދާއިރާގެ މެމްބަރު ޔައުގޫބް ވިދާޅުވީ ކޮވިޑުން ރާއްޖެ އަރައިގަނެވި ބޯޑަރު ހުޅުވިގެން ދިޔައީ ރައީސް ސޯލިހާއި، ސަރުކާރުގެ ހަރުދަނާ ސިޔާސަތުގެ ސަބަބުން ކަމަށެވެ.
އެކަމާ ގުޅިގެން ރޮޒެއިނާ މިއަދު ކުރެއްވި ޓްވީޓުތަކެއްގައި ވިދާޅުވީ ކޮވިޑުން އަރައިގަނެވުނީ ރައީސް ސޯލިހާއި ކެބިނެޓާއި އަދި އެކި ދާއިރާތަކުގެ ޕްރޮފެޝަނަލް މީހުންނާއެކު ރެޔާއި ދުވާލު ކުރި މަސައްކަތުން ކަމަށެވެ. އަދި ބޯޑަރު ވެސް ބަންދު ކުރަން ޖެހުނު ވަގުތު ބަންދުކުރީ ކަމަށާއި ބޯޑަރު ހުޅުވަންވީ ވަގުތު އައުމުން އެކަން ވެސް ކުރީ ކަމަށް ރޮޒެއިނާ ވިދާޅުވިއެވެ.
ރޮޒެއިނާ ވިދާޅުވީ ކޮވިޑަކީ އާދައިގެ ބައްޔެއް ކަމަށް ދެކި އަޅާނުލާ ތިބިނަމަ މިއަދު އޮތް ހާލަތު، ރާއްޖޭގައި ނޯންނާނެ ކަމަށެވެ. އަދި އާދައިގެ ބައްޔަކަށް މިއަދު ވެފައިވަނީ ވެކްސިން ދެވުމުން ކަމަށާއި އެކަން ވެސް ކުރީ ރައީސް ސޯލިހުގެ މަސައްޕުޅުތަކުން ކަމަށް އޭނާ ވިދާޅުވިއެވެ.
ރޮޒެއިނާ ވަނީ މިހާތަނަށް ވެސް ހުންނެވީ މަސްލަހަތަށް ބައްލަވާފައި އެއްޗެއް ވިދާޅުނުވާން ކަމަށާއި ނަމަވެސް މިއަދު ރައީސް ސޯލިހު ކުރެއްވި ހުރިހާ ކަމެއްގެ ކްރެޑިޓް، އެ ހުރިހާ ކަމަކަށް ފާޑުކިޔާ، ކަމުނުގޮސްގެން އުޅުނު ބަޔަކު ނަގަން އުޅުމަކީ ދެރަވަރު ކަމެއް ކަމަށް ވެސް އޭނާ ވިދާޅުވެފައެވެ.
މީގެ އިތުރުން ރޮޒައިނާ ވަނީ އޭރު ކުރި ކޮންމެ ކަމަކަށް ޖަދަލު ކުރި މީހުން މިއަދު ކޮވިޑުން އަރައިގަތުމަށް އޭގެ ކްރެޑިޓް ނަގަނީ ކަމަށްވެސް ވިދާޅުވެ ނުސީދާ ފާޑުވިދާޅުވުންތައް ރައީސް ނަޝީދަ އަމާޒު ކުރައްވާފައެވެ. އަދި މިއަދު (އޭރު) މަޖިލީހަށް ބޯޑަރު ހުޅުވަން މައްސަލަ ލަނީ މާދަމާ ބޯޑަރު ހުޅުވާނެކަން އެނގި ހުރެ ކަމަށްވެސް ރޮޒައިނާ ވަނީ ވިދާޅުވެފައެވެ.
