ޓެރަރިޒަމްގެ ހަރަކާތްތަކަށް ކުޑަވެސް ޖާގައެއް ނުދެއްވާނެ ކަމަށް ކަމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ސީޕީ މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގުރާމުގައި ވާހަކަ ދައްކަވަމުންނެވެ.
ފުލުހުންގެ މުއައްސަސާއިން ހިންގާ އެކި އޮޕަރޭޝަންތަކާއި، މަސައްކަތްތަކާއި ގުޅޭގޮތުން ވާހަކަ ދައްކަވަމުން ސީޕީ ވިދާޅުވީ ކޯވިޑާއި ގުޅިގެން ފުރަބަންދުގައި މުޅި ދުނިޔެ އޮތް އިރުވެސް ސޯޝަލް މީޑިއާގައި އޮންލައިގެން ޒަރީއާއިން މިނުރައްކާތެރި އަމަލު ފެތުރުމަށް ނިރުބަވެރި ހަމަލާތައް ރާވާ ހިންގާ މީހުން އުޅުނު ކަމަށެވެ.
ސީޕީ ވިދާޅުވީ މަޖިލިސް ރައީސް މުހައްމަދު ނަޝީދަށް ދިން ހަމަލާއަކީ ވެސް ހަމަ މިފަދަ ގޮތަކަށް ރޭވިގެން ދިންތިޒާމު ވެގެން ދީފައިވާ ހަމަލާއެއްކަމަށެވެ.
ފުލުހުން އަބަދުވެސް އޮންނަނީ މިފަދަ ކޮންމެ ހާލަތަކަށް، ސަމާލުވެ ހޭލާ ކަމަށް ސީޕީ ވިދާޅުވިއެވެ.
ސީޕީ ވިދާޅުވީ އިސްލާމް ދީނާއި ދެކޮޅުވެރި އަމަލުތަކަށާއި، ޓެރަރިޒަމްގެ މައްސަލަތަކަކީ ވެސް ފުލުހުން ވަރަށް ސީރިއަސްކޮށް ބަލާނެ މައްސަލަތަކެއް ކަމަށާއި މިފަދަ އަމަލެއް ހިނގިޔަ ނުދިނުން ކޮންމެ ދުވަހު ހުއްޓުމެއް ނެތި ހުރިހާ މުއައްސަސައަކާއި ބޭރުގެ އެކި ފަރާތްތަކާއި ގުޅިގެން ކުރަމުންދާ ސީޕީ ފާހަގަކުރެއްވިއެވެ.
