ހިޔާ ޓަވަރު H16, H15, H14, H13 ގެ ލިފްޓް ކައިރީ ތޮއް ޖެހުން ކުޑަކުރުމުގެ މަސައްކަތް ފަށައިފިއެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނީ، ހިޔާ ޓަވަރުތަކުގެ ލިފްޓުކައިރީ ތޮއްޖެހުމުގެ މައްސަލަ ހައްލުކުރުމުގެ މަސައްކަތުގެ ތެރެއިން H16, H15, H14, H13 ޓަވަރުގައި އަމަލީ މަސައްކަތް ފަށާފައިވާ ކަމަށެވެ. އަދި މި މަސައްކަތް 2 މަސް ދުވަސްތެރޭ ނިންމާލެވޭނެ ކަމަށް އެޗްޑީސީން ބުނެއެވެ.
ލިފްޓް ކައިރީ ތޮއްޖެހުން ކުޑަކުރުމަށް، ހިޔާ ފްލެޓްތަކުގެ ލިފްޓު ހިމެނޭ ލޮބީ ބޮޑު ކޮށްގެންނެވެ. އެގޮތުން ލިފްޓް ހިމެނޭ ލޮބީގެ ސަރަހައްދު ބޮޑު ކުރަނީ ބައެއް ފާރުތައް ތަޅާލައިގެނެވެ.
ހިޔާ ފްލެޓްގެ ކޮންމެ ޓަވަރެއްގައި 25 ބުރި ހުންނަ އިރު، ކޮންމެ ޓަވަރެއްގައި ވެސް ހުންނަނީ ހަތަރު ލިފްޓެވެ. ނަމަވެސް ލިފްޓު ކައިރީގައި މަޑުކުރާނެ ޖާގަ ކުޑަވެ، ބާރުބޮޑުވާ ގަޑިތަކުގައި ތޮއްޖެހޭ މައްސަލާގައި އާންމުން ވަނީ ކަންބިޑުވުން ފާޅުކޮށްފައެވެ. އެހެންކަމުން ފްލެޓްތަކުގެ ލޮބީ ބޮޑުކުރުމުން އާންމުންގެ ދަތިތަކަށް ހައްލެއް ލިބިގެން ދާނެ ކަމަށް އެޗްޑީސީން ބުނެއެވެ.
