ރަޝިއާއިން ހަނގުރާމަ އިއުލާންކޮށް މިއަދު ހަނގުރާމަ ފަށާފައިވާ އިރު، އެ ގައުމާ އަދި ކައިރި އެހެން ގައުމުތަކުގައި ތިބި ދިވެހިންގެ ހާލު ވެސް ބަލަމުން އަންނަ ކަމަށް ފޮރިން މިނިސްޓްރީން ބުނެފިއެވެ.
ފޮރިން މިނިސްޓްރީން ބުނީ، ހަނގުރާމަ ފެށިއިރު ރާއްޖެ ނާދެވި އެ ގައުމުގައި ތިބި ދަރިވަރުން ރައްކާތެރި ހިސާބުތަކަށް ބަދަލުކުރުމަށް އެ ސަރަހައްދާ ރަހުމަތްތެރި އެހެން ގައުމުތަކުގެ ސަރުކާރާ އެކު މަޝްވަރާ ކުރަމުން އަންނަ ކަމަށެވެ. ނަމަވެސް ރާއްޖެއިން މަޝްވަރާ ކުރަމުން އަންނަނީ ކޮން ގައުމުތަކަކާ ކަމެއް ސަރުކާރުން ހާމައެއް ނުކުރެއެވެ.
އެ ގައުމުގައި ތިބި ހުރިހާ ދަރިވަރުން މިއަދު ރާއްޖެ އަންނަން ނިންމާފައި ވިޔަސް، ހެނދުނު ހަނގުރާމަ ފަށައި އެއާޕޯޓް ދަތުރުތައް ހުއްޓުމަކަށް އައުމާ ގުޅިގެން ޔުކްރެއިންގައި ތިބި ދިވެހި 20 ދަރިވަރަކު ވަނީ އެ ގައުމުގައި ތާށިވެފައެވެ. އެ ހުރިހާ ދިވެހިންގެ ހާލު ރަނގަޅު ކަމަށް މިނިސްޓްރީން ބުނެއެވެ.
ރާއްޖެއަށް ނާދެވި ތިބި ދަރިވަރުންގެ ތަފްސީލަށް ބަލާއިރު، ރަޝިއާގެ ބޯޑަރު ކައިރީގެ ސިޓީ ހާރްކިވްގައި ތިބި ފަސް ދަރިވަރަކާއި ޔޫކްރެއިންގެ އިރުމަތީ ފަރާތު ސިޓީއެއް ކަމަށްވާ އިވަނޯ ފްރެންކިވްސްގައި ތިބި 14 ދަރިވަރަކާއި އެހެން ސިޓީއެއް ގައި އިތުރު އެއް ދަރިވަރެއް ހުރި ކަމަށް މައުލޫމާތު ލިބެއެވެ.
ރަޝިއާގެ ހަނގުރާމަ މިއަދު ފަށާފައި ވާއިރު، ޔޫކްރެއިންގެ ވައިގެ ދަތުރުފަތުރުތަކަށް ރަޝިއާއިން ހުރަސްއަޅާ، ބައެއް އެއާޕޯޓްތައް ވަނީ ބަންދުކުރަން ފަށައިފައެވެ.
