ޖުޑީޝަލް ސާވިސް ކޮމިޝަން މިނިވަން ކުރައްވާނެ ކަމަށާއި، ސަރުކާރުން އެކަން ނުކުރާހާ ހިނދެއްގައި ސަރުކާރު ޖަވާބުދާރީ ކުރުވުމުގެ މަސައްކަތް އެމްއެންޕީން ކުރާނެ ކަމަށް، އެ ޕާޓީގެ ރައީސް ކާނަލް ރިޓަޔާޑް މުހައްމަދު ނާޒިމް ވިދާޅުވެއްޖެއެވެ.
"ރައްޔިތުންގެ އުދާސް"ގެ ނަމުގައި އެމްއެންޕީން ރޭ ބޭއްވި ޖަލްސާގައި ވާހަކަ ދައްކަވަމުން ނާޒިމް ވިދާޅުވީ، ސިޔާސީ ވެރިންނަށް ޖޭއެސްސީގައި ނުތިބެވޭ ގޮތަށް އެކުލަވާލަން ސަރުކާރުން ފަސް ޖެހޭ ނަމަ، ދެން އަންނަ ދައުރެއްގައި އެ ޕާޓީން އެ ކަން ކުރާނެ ކަމަށެވެ. ނާޒިމް ވިދާޅުވި ގޮތުގައި، ޖޭއެސްސީ މިނިވަންވެގެން ނޫނީ ފަނޑިޔާރުގެ މިނިވަން ކުރެވޭކަށް ނެތެވެ.
މިދިޔަ 10 އަހަރުވެސް އެ ވާހަކަ ދެއްކެވިއިރު، އަދުގެ ސަރުކާރުންވެސް ޖޭއެސްސީ އެކުލެވިގެންވާ ގޮތް ބަދަލުކުރުމަށް ފަސް ޖެހޭ މަންޒަރު ފެންނަމުން ދާ ކަމަށް ނާޒިމް ވިދާޅުވިއެވެ. ޖޭއެސްސީ މިނިވަންކުރުމަކީ ސަރުކާރުގެ ވައުދެއް ކަން ހަނދާން ކޮށްދެއްވުމަށްފަހު ނާޒިމް ވަނީ، ޖޭއެސްސީގައި ސިޔާސީ ވެރިންނަށް ނުތިބެވޭ ގޮތް ހެދުމަށް ހުށަހެޅި ބިލް އެމްޑީޕީގެ މެޖޯރިޓީން ބޭރު ކޮށްލުމުން އެކަން ކުށްވެރި ކުރައްވާފައެވެ.
ނާޒިމް ވިދާޅުވި ގޮތުގައި ޖޭއެސްސީގައި ތިއްބަވަން ޖެހިވަޑައިގަންނަވާނީ ކުރީގެ ފަނޑިޔާރުންނާއި، ޝަރީއަތް ދަންނަ ބޭފުޅުންނާއި، އެކި ދާއިރާތަކުން ފާހަގަކޮށްލެވޭ އިލްމީ ބޭފުޅުންނެވެ. އެގޮތުން ޖޭއެސްސީގައި ތިއްބަވަން ޖެހޭނީ:
- ކުރީގެ ފަނޑިޔާރެއް
- ވަކީލުން އިންތިހާބުކުރާ ވަކީލެއް
- އަންހެން ވަކީލެއް
- ކޮލެޖް ޔުނިވާސިޓީތަކުގައި އިސްލާމީ ޝަރީއަތް ކިޔަވައިދޭ ބޭފުޅެއް
- ގާނޫނު ކިޔަވައިދޭ ބޭފުޅެއް
- ތައުލީމީ ދާއިރާއިން މަތީ ތައުލީމު ހާސިލްކޮށްފައިވާ ބޭފުޅެއް
- ވިޔަފާރީގެ ދާއިރާއިން މަތީ ތައުލީމު ހާސިލްކޮށްފައިވާ ބޭފުޅެއް
- ގުޅުންހުރި އެހެން ދާއިރާއަކުން މަތީ ތައުލީމު ހާސިލްކޮށްފައިވާ ބޭފުޅެއް
ނާޒިމް ވިދާޅުވީ، އެމްއެންޕީން ޖޭއެސްސީ މިނިވަން ކުރާނެ ކަމަށެވެ. އޭނާ މިހެން ވިދާޅުވިއިރު، ޖޭއެސްސީ އަށް މެންބަރުން އައްޔަން ކުރާއިރު، ސިޔާސީ މީހުން ނުހިމެނުމަށް ގާނޫނުއަސާސީ އަށް އިސްލާހު ގެނައުމަށް މަހިބަދޫ ދާއިރާގެ މެންބަރު އަހްމަދު ތޯރިގް ހުށަހެޅުއްވި އިސްލާހު މަޖިލީހުން ވަނީ މިދިޔަ އަންގާރަ ދުވަހު ބޭރުކޮށްލާފައެވެ. އެ ބިލަށް އެމްއެންޕީން ތާއީދު ކުރާ ކަމަށް ނާޒިމް މީގެ ކުރިންވެސް ވިދާޅުވެފައިވެއެވެ.
