އެމްޑީޕީގެ ޗެއާޕާސަން ކަމަށް ކުރިމަތިލައްވާފައި ވާތީ އެޕާޓީގެ ސްޕޯކްސްޕާސަންގެ މަގާމުން މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) އިސްތިއުފާ ދެއްވައިފިއެވެ.
އިންތި އިސްތިއުފާ ސިޓީ ފޮނުއްވާފައި ވަނީ އެމްޑީޕީގެ ޗެއާޕާސަންގެ ނައިބު އަލީ ނިޔާޒަށެވެ.
އެސިޓީގައި އިންތި ވިދާޅުވީ، ސްޕޯކްސްޕާސަންގެ މަގާމުގައި ހޭދަކުރެއްވި މުއްދަތުގެ ތެރޭގައި އެމްޑީޕީގެ ލީޑާޝިޕާއި ސެކްރެޓޭރިއޭޓްގެ މުވައްޒަފުންނާއި މެމްބަރުންނާއެކު މަސައްކަތް ކުރެއްވުމަށް ލިބިވަޑައިގެންނެވި ފުރުސަތަކީ ސިޔާސީ ހަޔާތުގައި ލިބިވަޑައިގެންނެވި ނުހަނު ބޮޑު ތަޖުރިބާއަކާއި ޝަރަފަކާއި އުފަލެއް ކަމަށެވެ.
އަދި އެކަމަށްޓަކައި އެންމެނަށް އިންތި ވަނީ ޝުކުރު ދަންނަވާފައެވެ.
އިންތި އިތުރަށް ވިދާޅުވީ އޭނާ އަބަދުވެސް އެދިވަޑަައިގަންނަވަނީ އެޕާޓީއަށް ކުރިއެރުމާއި ކާމިޔާބެއް ކަމަށެވެ.
އެމްޑީޕީގެ ޗެއާޕާސަން ހޮވުމަށް އަންނަ އޭޕްރިލް މަހު ބާއްވަން ހަމަޖެހިފައިވާ އިންތިހާބަށް ކުރިމަތިލާން އެމްޑީޕީގެ މެންބަރުންނަށް ހުޅުވާލާފައި ވާއިރު، އިންތިގެ އިތުރުން އެމަގާމަށް ކުރިމަތިލައްވާފައި ވަނީ މި ވަގުތު އިކޮނޮމިކް މިނިސްޓަރު ކަމުގެ މަގާމުގައި ހުންނެވި ފައްޔާޒް އިސްމާއިލްއެވެ.
އެމްޑީޕީގެ ޗެއާޕާސަންގެ ދައުރު ހަމަވެފަައި ވާ އިރު، އެންމެ ފަހުން އެމްޑީޕީގެ ޗެއާޕާސަންގެ މަގާމުގައި ހުންނެވީ ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ. އެމްޑީޕީގެ ރައީސްކަމުގައި މިހާރު ހުންނެވި މަޖިލީހުގެ ރައީސް މުހައްމަދު ނަޝީދާއި، ޑިފެންސް މިނިސްޓަރު މާރިޔާ އަހުމަދު ދީދީވެސް މީގެ ކުރިން އެމްޑީޕީގެ ޗެއާޕާސަންގެ މަގާމް ފުރުއްވާފައި ވެއެވެ.
