އެމްޑީޕީގެ އަންހެނުންގެ ރޫހުގެ ރައީސް ކަމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވާދަކުރައްވަން ނިންމަވައިފިއެވެ.
އޭނާ މިކަން ހާމަ ކުރެއްވީ އެމްޑީޕީގެ ގައުމީ މަޖިލީހުގެ އަދި އަންހެނުންގެ ރޫހުގެ ވަޓްސް އެޕް ގްރޫޕްއަށް ފޮނުއްވި މެސެޖެއްގައެވެ.
ރޮޒޭގެ އިތުރުން މި މަގާމަށް ވާދަކުރައްވާނެކަން ދެން އިއުލާންކޮށްފައި ވަނީ ސަފާތު އަހުމަދު ޒާހިރުއެވެ.
އެމްޑީޕީ ޗެއާޕާސަން މަގާމާއި، އަންހެނުންގެ ރޫހާއި، ޒުވާނުންގެ ހިއްވަރުގެ ރައީސް އަދި ނައިބް ރައީސް ކަމުގެ މަގާމުގެ އިންތިހާބް ކުރުން އޮތީ އަންނަ އޭޕްރިލް މަހުގެ 16 ވަނަ ދުވަހުއެވެ.
މިއިންތިހާބު ބާއްވާނެ ތާރީހް އެމްޑީޕީން އިއުލާން ކޮށްފައި މި ވަނީ، އެމްޑީޕީގެ އެތެރޭގެ ބައެއް މަގާމުތަކުގެ ދައުރު ހަމަވާތީވެ، އެ މަގާމުތަކަށް މެންބަރުން އިންތިހާބު ކުރުމާބެހޭ ގަރާރެއް އެމްޑީޕީގެ މާލެ ދާއިރާގެ ރައީސް އަދި މާލޭގެ ކުރީގެ މޭޔަރު ޝިފާ މުހައްމަދު ހުށަހެޅުމުން ގައުމީ މަޖިލީހުން ފާސްކޮށްގެންނެވެ.
އެމްޑީޕީގެ އިންތިހާބުތަކުގައި ކުރިމަތިލުމަށް އެދޭ ފޯމް ފުރިހަމަކޮށް ފޯމާއެކު ހުށަހަޅަން ޖެހޭ ހުރިހާ ލިޔެކިޔުންތަކާ އެކު އެ ޕާޓީގެ އިންތިހާބާ ބެހޭ ކޮމިޓީގެ އީމެއިލަށް މި މަހުގެ 19 ވަނަ ދުވަހުގެ ހަވީރު 4:00 ގެ ކުރިން ފޯމް ހުށަހެޅުމަށް އެމްޑީޕީން ބުނެއެވެ.
