އުމުރުން 25 އަހަރުގެ ޒުވާނަކު މަރުވީ ކޮވިޑް-19 ބަލީގައި ނޫން ކަމަށް ނިންމައިފިއެވެ.
"ދަ ޕްރެސް" އަށް މައުލޫމާތު ދެއްވަމުން ހެލްތް މިނިސްޓްރީގެ ޑެޕިއުޓީ ޑިރެކްޓާ ޖެނެރަލް ތަސްލީމާ އުސްމާން ވިދާޅުވީ 25 އަހަރުގެ ޒުވާނާ މަރުވި އިރު ކޮވިޑަށް ޕޮޒިޓިވްވި ނަމަވެސް މަރުވީ ކޮވިޑުގެ ސަބަބުން ކަމަށް ނުބެލެވޭ ކަމަށެވެ. އެހެން ކަމުން އެމަރަކީ ކޮވިޑް މަރެއް ކަމަށް ނުނިންމާ ކަމަށް އޭނާ ވިދާޅުވިއެވެ.
ރޭ ދަންވަރުގެ ވަގުތެއްގައި މަރުވެފައި ވަނީ ގއ. މާމެންދޫ، ފުރުކުމާގެ، އައިޝަތު އިފާޒާއެވެ. މައުލޫމާތު ލިބިފައިވާ ގޮތުގައި އޭނާއަކީ ކިޑްނީ ބަލި މީހެކެވެ.
މިހާތަނަށް ކޮވިޑުގައި 265 މީހުން މަރުވެފައި ވާއިރު ކޮވިޑަށް ޕޮޒިޓިވް ވި 14 މީހަކު ވަނީ މަރުވެފައި ވެއެވެ. އަދި އެ 14 މީހުންނަކީ ކޮވިޑް މަރު ނޫން ކަމަށް އެޗްޕީއޭއިން ވަނީ ނިންމާފައެވެ.
ރާއްޖޭގައި ކޮވިޑް-19 ދަނީ ހަލުވިކަމާއެކު ފެތުރެމުންނެވެ. އެގޮތުން ވޭތުވެދިޔަ ތިން ދުވަހު ރާއްޖޭން 1،200 އަށް ވުރެ ގިނަ މީހުންނަށް ކޮވިޑު ޖެހިފައި ވާއިރު، އިއްޔެވެސް 1،594 އަށް ވުރެ ގިނަ މީހުންނަށް ކޮވިޑު ޖެހިގެން ވަނީ ރިޕޯޓު ކޮށްފައެވެ.
ރާއްޖޭގައި ހަލުވިކަމާއެކު ކޮވިޑު ފެތުރެމުން ދާތީ، އެޗްޕީއޭއިން ވަނީ ރާއްޖޭގެ ހާލަތު ރެޑް އެލާޓަށް ބަދަލުކޮށްފައެވެ.
