މުޅި ދުނިޔެއަށްހެން ބިންދާލާފައިވާ އޮމިކްރޯން ވޭރިއަންޓްގެ ލޯކަލް ޓްރާންސްމިޝަން ކޭހެއް ފެނިފައި ވާ ކަމަށް، ކޮރޯނާވައިރަސް ޑިޒީޒް (ކޮވިޑް-19)ގެ ކޭސްތައް އެންމެ ފުރަތަމަ ރިޕޯޓް ކުރަން ފެށި ޗައިނާއިން ބުނެފިއެވެ.
އޮމިކްރޯންގެ ލޯކަލް ޓްރާންސްމިޝަން ކޭހެއް ފެނިފައި ވަނީ ޗައިނާގެ ވެރިރަށް ބެއިޖީންގްއިން ކަމަށް މައުލޫމާތު ލިބެއެވެ. މި ދަނޑިވަޅަކީ ވިންޓާ އޮލިމްޕިކްސްއަށް ޗައިނާއިން ތައްޔާރު ވަމުން އަންނަ ދަނޑިވަޅެއް ކަން ވެސް ފާހަގަ ކުރަން ޖެހެއެވެ.
މި ކޭސް ފެނިފައި ވަނީ ގިނަ އަދަދެއްގެ ޓެކްނޮލޮޖީ ކުންފުނިތަކެއްގެ މަރުކަޒީ އިދާރާތައް ހިންގާ ސަރަހައްދަކުންނެވެ. އެމީހާއާ ގުޅިފައި ވާ މީހުން ދިރިއުޅޭ އިމާރާތްތަކާ އޮފީސްތަކުގައި ތިބި އެހެން މީހުން ޓެސްޓު ކުރުމުގެ މަސައްކަތް، ޗައިނާގެ ކަމާ ބެހޭ ފަރާތްތަކުން ދަނީ ކުރަމުންނެވެ.
ކޮވިޑް-19ގެ ބަލިމަޑުކަން ކޮންޓްރޯލް ކުރުމަށް އެންމެ ހަރުކަށި ފިޔަވަޅުތައް ތަންފީޒު ކުރާ އެއް ގައުމަކީ ޗައިނާއެވެ. އެގޮތުން އެ ގައުމުގެ އެތައް މިލިއަން ބަޔަކު މިހާރުވެސް ތިބީ ގޭ ބަންދުގެ ހާލަތުގައެވެ. ގިނަ އަދަދެއްގެ ޑޮމެސްޓިކް ފްލައިޓްތައްވެސް ވަނީ ކެންސަލް ކޮށްފައެވެ.
ކަން މިހެން އޮތް ނަމަވެސް، ފެބުރުއަރީ 4 ވަނަ ދުވަހު ފަށާ ވިންޓާ އޮލިމްޕިކްސް މުބާރާތުގެ އެތުލީޓުންގެ މެދުގައި އޮމިކްރޯން ވޭރިއަންޓް ފެތުރިގެން ދިއުން ކޮންޓްރޯލް ކުރުމަކީ ދަތި ކަމަކަށް ވާނެ ކަމަށް، ޕެސިފިކް ޔުނިވާސިޓީގެ ޕްރޮފެސާ ޖޫލްސް ބޮއިކޮފް ވަނީ އިންޒާރު ކުރައްވާފައެވެ.
ޖަޕާނުގައި ކުރިއަށް ދިޔަ އޮލިމްޕިކްސް ކުޅިވަރު މުބާރާތުގައިވެސް ލޮކްޑައުންގެ އަމުރުތައް ތަންފީޒު ކުރި މަންޒަރު ފެނުނު ކަމަށާ، ނަމަވެސް އޮލިމްޕިކް ބަބްލް ތެރެއިން އެކަނިވެސް 800 އަށް ވުރެ ގިނަ ކޭސް ފެނިފައި ވާ ކަމަށް ޕްރޮފެސާ ބޮއިކޮފް ވަނީ ވިދާޅުވެފައެވެ.
