މާލެ ރަސްފަންނު ސަރަހައްދުގައި މިރޭ ފެށި ނައިޓް މާކެޓް ވަގުތުން ހުއްޓާލަން ސިޓީ ކައުންސިލުން އަންގާ އިއުލާން ކޮށްފިއެވެ.
ސިޓީ ކައުންސިލުން މިރޭ ނެރުނު އިއުލާނެއްގައި ބުނީ، މާލެ ސަރަހައްދުގައި ކޮވިޑް ފެތުރޭލެއް ބާރުކަމުން ނައިޓް މާކެޓް ބާއްވަން ހުއްދަ ދިނީ، އެޗްޕީއޭއިން އެންގި ގައިޑްލައިނާ އެއްގޮތަށް ކުރިއަށް ގެންދިޔުމަށް ކަމަށެވެ. ނަމަވެސް މިރޭ ފެށި ނައިޓްމާކެޓް، އެޗްޕީއޭއިން އިންސްޕެކްޓް ކޮށް ބެލި އިރު، ގައިޑްލަނަށް ނުފެތޭ ކަމަށް ސިޓީ ކައުންސިލަށް އަންގާފައި ވާތީ ނައިޓް މާކެޓް ވަގުތުން ހުއްޓާލަން އަންގާ އިއުލާން ކުރީ ކަމަށެވެ.
ސިޓީ ކައުންސިލުން މިރޭ އިއުލާން ނެރުނު އިރު، ނައިޓް މާކެޓްގެ 200 އެއްހާ ސްޓޯލް ހުޅުވާ ދަނީ ވިޔަފާރި ކުރަމުންނެވެ.
"ދަ ޕްރެސް" ގެ ނޫސްވެރިން ގޮސް ބެލި އިރު، ނައިޓް މާކެޓަށް ގިނަ ބަޔަކު ދިޔައީ ވަންނަމުންނެވެ. އަދި ނައިޓްމާކެޓަށް ވަންނަ ދޮރު މަތީގައި ޓެމްޕަރޭޗަރު ބަލާނެ މީހަކު، ސެނިޓައިޒާ ފުޅިއެއްވެސް ހިފައިގެން ހުރިކަން ފާހަގަ ކުރަމެވެ. ނަމަވެސް އެތެރެއަށް ވަދެގެން ދާ މީހުން، އެޗްޕީއޭއިން ބުނާ ގައިދުރުކަމެއް ނުބަހައްޓައެވެ.
މިރޭ ފެށި ނައިޓް މާކެޓަކީ މިރެއިން ފެށިގެން މިމަހުގެ 17 އަށް ހިންގުމަށް، އަކޫޒް ޕްރައިވެޓް ލިމިޓެޑުން ހުއްދަ ހޯދާފައި އޮތް ނައިޓް މާކެޓެކެވެ.
މިރޭ ފެށި ނައިޓް މާކެޓްގެ ކުރިން، މިދިޔަ މަހުގެ 26 އިން މި ހިނގާ ޖެނުއަރީ މަހުގެ 4 އަށް ރަސްފަންނުގައި ނައިޓް މާކެޓެއް ވަނީ ބާއްވާފައެވެ.
ސިޓީ ކައުންސިލަށާއި، ހިންގާ ފަރާތަށާއި، ސްޓޯލްތައް ހުޅުވައިގެން ވިޔަފާރި ކުރާ ފަރާތްތަކަށްވެސް ބޮޑު އާމްދަނީއެއް ލިބޭގޮތަށް ހިންގާ ނައިޓް މާކެޓް ހުއްޓާލުމުން މާލީ ގެއްލުންތަކެއް ވާ އިރު އެ ގެއްލުމަކީ ކިހާވަރެއްކަން ސާފެއް ނުވެއެވެ.
