ކޮވިޑް-19 އާ ގުޅިގެން މޮނިޓަރިންގައި މިވަގުތު އޮތީ ޖުމްލަ 15 ރަށެއް ކަމަށް އެޗްޕީއޭއިން ބުނެފިއެވެ.
މިވަގުތު 15 ރަށެއް މޮނިޓަރިންގެ ހާލަތުގައި އޮތް އިރު މީގެ ތެރެއިން މޮނިޓަރިން ހާލަތުގައި އޮތް އެންމެ ގިނަ ދުވަސްވީ ރަށްތަކަކީ ސ. ހިތަދޫ، ސ. މަރަދޫ، ސ. މަރަދޫ ފޭދޫ އަދި ސ. ފޭދޫއެވެ. މި ރަށްތައް މޮނިޓަރިންގެ ހާލަތަށް ގެނެސްފައި ވަނީ މި ދިޔަ އޮގަސްޓް މަހުގެ 28 ވަނަ ދުވަހުއެވެ.
މީގެ އިތުރުން މި ދިޔަ ސެޕްޓެމްބަރު މަހު 4 ވަނަ ދުވަހު ސ. ހުޅުމީދޫ މޮނިޓަރިންގެ ހާލަތައް ލާފައި ވާއިރު މިދިޔަ އޮކްޓޯބަރު މަހު މޮނިޓަރިންގެ ހާލަތަށް ގެނައި ރަށްތަކުގެ ތެރެއިން މިވަގުތު އޮތީ އެންމެ ރަށެކެވެ. އެއީ މ. މުލަކެވެ.
މިމަހު މޮނިޓަރިންނަށް ލީ ރަށްތަކުގެ ތެރެއިން މިހާރު މޮނިޓަރިން ހާލަތުގައި އޮތީ 9 ރަށެކެވެ. އެއީ ދ. ކުޑަހުވަދޫ، ނ. ލަންދޫ، ތ. ވިލުފުށި، ގދ. ވާދޫ، ކ. ތުލުސްދޫ، ހދ. ނައިވާދޫ، ދ. ހުޅުދެލި، ގދ. ހޯޑެއްދޫ އަދި ގދ. ގައްދޫއެވެ.
ރާއްޖޭގައި އަނެއްކާވެސް ކޮވިޑުގެ ކޭސްތައް މަތިވަމުން އަންނައިރު، ހާލަތު އެންމެ ގޯސްވެފައި ވަނީ ރަށްރަށުންނެވެ. މިގޮތުން އިއްޔެ ޖުމްލަ 198 މީހަކު ކޮވިޑުން ޕޮޒިޓިވް ވެފައި ވާއިރު އޭގެ ތެރެއިން 85 މީހަކު ޕޮޒިޓިވްވީ ރަށްރަށުންނެވެ. މާލެއިން 53 މީހުން ޕޮޒިޓިވްވި އިރު ރިސޯޓުތަކުން 60 މީހަކު ވަނީ ޕޮޒިޓިވްވެފައެވެ.
މިއާއެކު މިހާތަނަށް 95،420 މީހުން ރާއްޖެއިން ޕޮޒިޓިވްވެފައިވާއިރު މިބަލިން 92،940 މީހުން ވަނީ ރަނގަޅުވެފައެވެ.
