ރާއްޖޭގައި ގާއިމްވެފައި ތިބި އިންޑިއާ ސިފައިން ބޭރުކުރުމަށް ކަމަށް ބުނެ، އިދިކޮޅު ޕްރޮގްރެސިވް ކޮންގްރެސް ކޯލިޝަނުން ހިންގާ "އިންޑިއާ އައުޓް" ހަރަކާތަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވަރަށް ބޮޑަށް ފާޑު ވިދާޅުވެއްޖެއެވެ.

ވެރިކަންކުރާ އެމްޑީޕީގެ ރައީސްގެ ހައިސިއްޔަތުން ނަޝީދު އިސްނަންގަވައިގެން، އެޕާޓީގެ މާލޭގެ ދާއިރާތަކުގެ ރައީސުންނާއި އާންމުން ބައްދަލުކުރަން ސަލްޓަން ޕާކުގައި ބޭއްވި ކޯކަސް ބައްދަލުވުމުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، ޔާމީނަށް މޭފުޅު މަތީގައި "އިންޑިއާ އައުޓް" ޖައްސަވައިގެން ނުހިންގެވޭނެ ކަމަށެވެ. އަދި އެއީ ލަދު ގަންނަން ޖެހިވަޑައިވަޑައި ގަންނަވާނެ ކަމެއްގެ ގޮތުގައި ނަޝީދު ވަނީ ސިފަކުރައްވާފައެވެ.

"އިންޑިއާ އައުޓްގެ ނަމުގައި ކުރީގެ ރައީސް [ޔާމީން] ނުކުންނަވާ މުޅި މޭމަތި ފުރެންދެން އިންޑިއާ އައުޓް ޖައްސަވައިގެން ނުކުންނަވާ އަޅުގަނޑުމެންގެ ރައްޔިތުންނާ ބައްދަލުވީމަ އަޅުގަނޑަށް އެނގޭ ލަދުގަންނާނެކަން."
މުހައްމަދު ނަޝީދު, އެމްޑީޕީގެ ރައީސް އަދި ކުރީގެ ރައީސް

ހަމަ އެއާއެކު، ނަޝީދު ވަނީ ޔާމީންގެ ސަޕޯޓަރުންނާއި ޔާމީނާ ބައްދަލުކުރައްވަން ޖެހިވަޑައިގެންފި ނަމަ އުނދަގޫވާނެ ކަމަށް ވިދާޅުވެ، އެ ލަދުން އިދިކޮޅުގެ ސަޕޯޓަރުން ސަލާމަތް ކުރުމަށްޓަކައި އެމްޑީޕީގެ ސަޕޯޓަރުންނާއި ފުލުހުން އެ ހަރަކާތް ހުއްޓުވުމަށް އެދިވަޑައިގެންފައެވެ.

"ވިސްނަވާތި، އަޅުގަނޑު އެހެން ޖަހައިގެން ނުކުތްނަމަ ތިބޭފުޅުން ލަދުގަންނާނެ ވަރު. އަޅުގަނޑަށް އެބަ އެނގޭ އަދި އަޅުގަނޑަށް އެނގޭ ތިޔަބޭފުޅުންނަށް އުނދަގޫފުޅުވާނެ ކަންވެސް އަޅުގަނދުގެ ގާތުގައި ބަލަ ރައީސޭ ތިހިރީ ހާދަހާ އެހެން ބާވަތަކަށޭ ހެދުން އަޅުއްވައިގެން. ބައްލަވާށޭ ޖައްސަވައިގެން ތިހުރި އެއްޗެއްވެސް." ނަޝީދު ވިދާޅުވިއެވެ.

މީގެ އިތުރުން، "އިންޑިއާ އައުޓް ނުގޮވޭނެ" ކަމަށް ތަކުރާރު ކުރައްވައި ނަޝީދު ވިދާޅުވީ، މިއީ ތަހުޒީބު ޑިމޮކްރަސީއެއްގައި ހިނގާ ކަމެއްނޫން ކަމަށާއި، އިންޑިއާ އައުޓް ގޮވަމުން ޔާމީނަށް ނުހިންގެވޭނެ ކަމަށާއި، ފުލުހުން މި ހަރަކާތް ހުއްޓުވަން ޖެހޭނެ ކަމަށް ނަޝީދު ވަނީ ވިދާޅުވެފައެވެ.

"އިންޑިއާ އައުޓް" ހަރަކާތް ރަށްރަށަށް ފުޅާކުރުމުގެ ގޮތުން، ޔާމީން ވަނީ މިދިޔަ ހަފްތާގެ ބަންދުގައި ކ. އަތޮޅުގެ ބައެއް ރަށްރަށަށް އިންޑިއާ އައުޓް ޖަހާފައިވާ ޓީޝާޓު ތުރުކުރައްވައިގެން ވަޑައިގެންފައެވެ. އެކަމާ ގުޅިގެން ސަރުކާރުގެ ބައެއް އިސް ބޭފުޅުންނާއި އެމްޑީޕީގެ ބައެއް ސަޕޯޓަރުންގެ ފަރާތުން ވަނީ ޔާމީނަށް ފާޑުކިއުން އަމާޒުވެފައެވެ.

ހަބަރު އަބްދުﷲ ޔާމީން އިންޑިއާ އައުޓް މުހައްމަދު ނަޝީދު ސިޔާސީ ޕީއެންސީ ޕީޕީއެމް