ކޮވިޑްގެ އާވޭރިއަންޓް އޮމިކްރޯންއާ ބެހޭ ގޮތުން މިހާތަނަށް ލިބިފައިވާ މައުލޫމާތުން ހިތްވަރު ލިބޭ ކަމަށް އެމެރިކާގެ އެންމެ އިސް ޕެންޑަމިކް އެޑްވައިސަރު ޑރ. އެންތޮނީ ފައުޗީ ވިދާޅުވެއްޖެއެވެ.
މިދިޔަ ނޮވެމްބަރު މަހުގެ ފަހުކޮޅު ދެކުނު އެފްރިކާއިން ފުރަތަމަ ފެނުނު އޮމިކްރޯން މިހާރު ދުނިޔޭގެ 40 އަށް ވުރެ ގިނަ ގައުމުން ފެނިފައިވާ އިރު ރާއްޖެއިން ވެސް އޮމިކްރޯންގެ ކޭސްއެއް ފެނިފައިވާ ކަން ހެލްތް ޕްރޮޓެކްޝަން އެޖެންސީ އެޗްޕީއޭއިން ރޭ ވަނީ ކަށަވަރުކޮށްދީފައެވެ.
މިކަމާ ބެހޭ ގޮތުން ޑރ. ފައުޗީ ވިދާޅުވީ، އަދި މިކަމުގައި އެއްޗެއް ބުނަން އަވަސް ނަމަވެސް މި ވޭރިއަންޓްގެ ސަބަބުން ކޮވިޑް ޖެހިގެން ބަލީގައި ބޮޑުވަރުވާކަން އަދި ޔަގީންކުރެވިފައި ނުވާ ކަމަށެވެ. އަދި މިއީ މިކަމުގައި ލިބިގެން ދިޔަ ހިތްވަރެއް ކަމަށާ އެހެން ނަމަވެސް އޮމިކްރޯންއާ ބެހޭ ގޮތުން އިތުރު މައުލޫމާތު އެއްކުރަމުން ދިއުން މުހިންމު ކަމަށެވެ.
ޑރ. ފައުޗީ މިހެން ބުނެފައިވާ އިރު އޮމިކްރޯން ފުރަތަމަ ފެނުނު ދެކުނު އެފްރިކާއިން ވެސް އަދި ބަލި ޖެހޭ މިންވަރު އިތުރުވެގެން އެކަން ރިޕޯޓްކޮށްފައެއް ނުވެއެވެ.
ޑރ. ފައުޗީ ވަނީ ދެކުނު އެފްރިކާއިން އޮމިކްރޯން ފެނުމާއެކު އެގައުމާ އެފްރިކާ ބައްރުގެ އެހެން ބައެއް ގައުމުތަކާ ދެކޮޅަށް އަޅާފައިވާ ފިޔަވަޅުތައް ގައުމުތަކުން ލުއިކުރާނެ ކަމަށް އުއްމީދުކުރައްވާ ކަމަށް ވިދާޅުވެފައެވެ. މިގޮތުން، އެފްރިކާގެ ދެކުނުގެ ހިސާބުތަކަށް ނިސްބަތްވާ ދަތުރުވެރިންނަށް ގައުމުތަކުގެ ބޯޑަރުތައް ބަންދުކުރި އިރު މީގެ ތެރޭގައި އެމެރިކާ ވެސް ހިމެނެއެވެ.
މިކަމާ ބެހޭ ގޮތުން ޑރ. ފައުޗީ ވިދާޅުވީ، އެމެރިކާއިން އެފްރިކާގެ ގައުމުތަކާ ދެކޮޅަށް ފިޔަވަޅު އެޅީ އޮމިކްރޯންއާ ބެހޭ ގޮތުން މާގިނަ މައުލޫމާތު އެގެން ނެތުމުން ކަމަށާ އަދި މާ ގިނަ ދުވަސް ނުކޮށް މި ފިޔަަވަޅުތައް ލުއިކުރާނެ ކަމަށް އުއްމީދުކުރައްވާ ކަމަށެވެ. އޭނާ ވަނީ ދެކުނު އެފްރިކާއިން އާވެރިއަންޓް ފެނުމުން އެކަން ސިއްރުނުކޮށް ދުނިޔޭގެ ސިއްހަތު ޖަމިއްޔާއާ ޑަބްލިއުއެޗްއޯއަށް އެކަން އެނގުމުން އެކަމަށް ތައުރީފުކުރައްވާފައެވެ.
