ރާއްޖޭގައި ކޮވިޑް-19 އަށް ޕޮޒިޓިވްވާ މީހުންގެ އަދަދުތައް މިއަދުވެސް މައްޗަށް ގޮސް، އެކްޓިވް ކޭސްތައް 2،000 އާ ގާތްކޮށްފިއެވެ.
އެގޮތުން، އިއްޔެ އިރުއޮއްސި 6 އިން މިރޭ އިރުއޮއްސި 6 އަށް ކޮވިޑަށް ޕޮޒިޓިވްވީ 219 މީހުންނާ އެކު، އެކްޓިވް ކޭސްތައް 1،981 އަށް އިތުރުވެފައިވާ ކަމަށް، އެޗްޕީއޭއިން މިރޭ އާންމުކުރި ތަފާސްހިސާބުތަކުން ދައްކައެވެ.
މިރޭ ކޮވިޑަށް 219 މީހުން ޕޮޒިޓިވްވިއިރު، އެންމެ ގިނަ މީހުން ޕޮޒިޓިވްވީ ރަށްރަށުންނެވެ. ރަށްރަށުން 173 މީހުން ކޮވިޑަށް ޕޮޒިޓިވްވެފައިވާއިރު، ރިސޯޓުތަކުން 17 މީހުން، އަދި މާލޭން 29 މީހުން ވަނީ ޕޮޒިޓިވްވެފައެވެ.
އެންމެ ފަހުން 200 އަށް ވުރެ ގިނަ މީހުންނަށް ކޮވިޑް ޖެހުނު ކަމަށް ރިޕޯޓުކޮށްފައި ވަނީ މީގެ ދިހަ ދުވަސް ކުރިންނެވެ. މިދިޔަ މަހުގެ 23 ވަނަ ދުވަހު 225 މީހުން ކޮވިޑަށް ޕޮޒިޓިވްވިއެވެ. އެއަށްފަހު، އެންމެ ދުވަހެއް ފިޔަވައި މިއަދާ ހަމައަށް ކޮންމެ ދުވަހަކުވެސް 90 އަށް ވުރެ ގިނަ މީހުން އަންނަނީ ކޮވިޑަށް ޕޮޒިޓިވްވަމުންނެވެ.
ރާއްޖޭގައި އަނެއްކާވެސް ކޮވިޑުގެ ކޭސްތައް މަތިވަމުން އަންނައިރު، ހާލަތު އެންމެ ގޯސްވެފައިވަނީ ރަށްރަށުންނެވެ. ރަށްރަށުގެ ހާލަތު ގޯސްވެ، މިހާރު ބައެއް ރަށްތައް ވަނީ މޮނިޓަރިންނަށް ލާފައެވެ.
