ރަށްރަށުގައި ހަލުވިކަމާއެކު ކޮވިޑް-19 ފެތުރި، ވޭތުވެދިޔަ 24 ގަޑިއިރުތެރޭ ރަށްރަށުން 100 އަށް ވުރެ ގިނަ މީހުން ކޮވިޑަށް ޕޮޒިޓިވް ވެއްޖެއެވެ.
އެޗްޕީއޭއިން މިރޭ އާންމުކުރި ތަފާސްހިސާބުތަކުން ދައްކާ ގޮތުގައި، އިއްޔެ އިރުއޮއްސި 6:00 އިން މިއަދު އިރުއޮއްސި 6:00 އަށް ރަށްރަށުން 117 މީހުން ވަނީ ޕޮޒިޓިވް ވެފައެވެ. އޭގެ ތެރޭގައި މޮނިޓަރިންގެ ހާލަތުގައި އޮތް މ. ދިއްގަރުންވެސް އަލަށް ޕޮޒިޓިވްވީ 23 މީހުން ހިމެނެއެވެ.
މީގެ އިތުރުން، މާލެއިން 23 މީހަކަށް، އަދި ރިސޯޓުތަކުން ތިން މީހަކަށް ކޮވިޑު ޖެހިފައި ވާއިރު، 143 މީހުން ވަނީ 24 ގަޑިއިރުތެރޭ ކޮވިޑަށް ޕޮޒިޓިވް ވެފައެވެ.
އެއާއެކު، ރާއްޖޭން 88،058 މީހުން ކޮވިޑަށް ޕޮޒިޓިވް ވެފައި ވާއިރު، އަދިވެސް ބަލި ޖެހިފައި ތިބި 1،860 މީހުން އެބަ ތިއްބެވެ. މިހާތަނަށް ރާއްޖޭން ކޮވިޑުން ރަނގަޅު ވެފައި ވަނީ 85،942 މީހުންނެވެ. އެއީ ރާއްޖޭން ކޮވިޑަށް ޕޮޒިޓިވްވި މީހުންގެ ތެރެއިން 97 ޕަސެންޓެވެ.
މާލޭގައި ކޮވިޑަށް ޕޮޒިޓިވް ވާ މީހުންގެ އަދަދުތައް އެއްވަރެއްގައި ހިފެހެއްޓުނު ނަމަވެސް، ރަށްރަށުން ކޮވިޑަށް ޕޮޒިޓިވް ވާ މީހުންގެ އަދަދު އިތުރުވެ، މިދިޔަ މަހުން ފެށިގެން 19 ރަށެއް ވަނީ މޮނިޓަރިންނަށް ލާފައެވެ. އެއާއެކު 25 ރަށެއް ވަނީ މިހާރު މޮނިޓަރިންގެ ހާލަތުގައެވެ.
