އުރީދޫ ސާފް ޗެމްޕިއަންޝިޕްގައި މާދަމާ ރާއްޖެއިން އިންޑިއާ ބަލިކޮށްފިނަމަ ފައިނަލް މެޗާ ހަމައަށް ކޮންމެ ރެއަކު މިއުޒިކް ޝޯ ބާއްވާނެ ކަމަށް ޔޫތް މިނިސްޓަރު އަހްމަދު މަހްލޫފު ވިދާޅުވުމުން "ހޫނު ފެނަށް ވެއްޓިއްޖެ"އެވެ.
ޔޫތް މިނިސްޓަރު އަހުމަދު މަހުލޫފް މިއަދު ކުރެއްވި ޓްވީޓެއްގައި ވަނީ މާދަމާގެ މެޗުގެ ފޯރި ނަގަން، ގިނަ ބަޔަކު ބައިވެރިވުމުގެ ފުރުސަތު ދިނުމަށް ޔޫތު މިނިސްޓްރީއާއި އުރީދޫ އަދި އެފްއޭއެމް ގުޅިގެން މާދަމާ ހަވީރުން ފެށިގެން ކާނިވާ ސަރަހައްދުގައި މެޗު ބެލުން އަދި މިއުޒިކް ޝޯ ގެންދަން ރާވާފައިވާ ކަމަށެވެ. އަދި މެޗުން ރާއްޖެ މޮޅުވެއްޖެނަމަ ފައިނަލް މެޗާ ހަމަޔަށް ކޮންމެ ރެޔަކު މިއުޒިކް ޝޯ އޮންނާނެ ކަމަށް މަހުލޫފް ވަނީ ވިދާޅުވެފައެވެ.
އެކަމާ ގުޅިގެން އާންމުގެ ގިނަ ބަޔަކު ހިތްހަމަ ނުޖެހުން ފާޅުކުރަމުން އަންނައިރު މިއީ ރައްޔިތުންގެ ފައިސާ އިސްރާފު ކުރުމަށް ކުރާ ކަމެއް ކަމަށް އެއް ބަޔަކު އަންނަނީ ބުނަމުންނެވެ. މިވަގުތު މިއުޒިކް ޝޯ ބޭއްވުމަކީ އެހާ މުހިއްމު ކަމެއްތޯ ވެސް އަނެއް ބަޔަކު ގެންދަނީ ސުވާލު ކުރަމުންނެވެ.
އެކަމާ ގުޅިގެން ދީނީ އިލްމުވެރިޔާ ޑރ. މުހައްމަދު އިޔާޒް ކުރެއްވި ޓްވީޓުގައި ވިދާޅުވީ އެތައް ރައްޔިތުންތަކެއް އެމީހުންގެ އަސާސީ ބޭނުންތައް ނުފުއްދި ތިއްބާ، ހަޒާނާގައި ހުރި ފައިސާކޮޅު މުންކަރާތް ތަކުގައި ތަޅާ ހުސްކުރަން ކުރާ މަސައްކަތް ހުއްޓާލަން ޖެހޭ ކަމަށެވެ.
އޭގެ އިތުރުން މޮޅުވިޔަސް ބަލިވިޔަސް ހިސާބުގަނޑު މީހުންނަށް އުޅެން އުނދަގޫވާ ޒާތުގެ ކަންތައް ކޮށްގެން ނުވާނެ ކަމަށް ވެސް ޑރ. އިޔާޒު ވަނީ ވިދާޅުވެފައެވެ. ޑރ. އިޔާޒުގެ ވާހަކަތަކަށް ވެސް ގިނަ ބަޔަކު ވަނީ ތާއީދު ކޮށްފައެވެ.
މާދަމާ ރޭ ރާއްޖެއާއި އިންޑިއާ ބައްދަލު ކުރާ މެޗު އޮންނާނީ ރޭގަނޑު 9:00 ގައެވެ. އިންޑިއާއި ރާއްޖެ މެޗުގެ ޓިކެޓް ޓިކެޓް ވިއްކަން ފެށިތާ އިރުކޮޅެއްގެ ތެރޭގައި ވިކި ހުސްވެފައި ވާއިރު، ދިވެހީންނަށް ހާއްސަކޮށް ވިއްކާފައި ވަނީ 3000 ޓިކެޓެވެ. ރާއްޖެއިން ކުޅުނު ތިން މެޗުން 6 ޕޮއިންޓް ލިބުނުއިރު، އިންޑިއާ ކުޅުނު ތިން މެޗުން ލިބުނީ ފަސް ޕޮއިންޓެވެ.
ލާ ދީނީ ކަން މިހާރު ވަރަށް ރަނގަޅަށް ހާމަ ވެއްޖެ. الله ދެއްވާ ކާމިޔާބަށް ޝުކުރު ކުރުމުގެ ބަދަލުގައި ފާފައަށް އަރައިގަންނަން ނިންމުމަކީ، ލާ ދީނީކަން.
މިއުޒިކުއަކީ ޙަރާމް އެއްޗެއްކަން މިނިސްޓަރަށް ނޭނގެނީބާ؟