ސާފް ޗެމްޕިއަންޝިޕްގައި މިއަދު ހަވީރު ސްރީ ލަންކާ އާއި ރާއްޖެ ކުޅޭ މެޗު ބައްލަވާލެއްވުމަށް، ލަންކާގެ ޔޫތު މިނިސްޓަރު، އަދި އެގައުމުގެ ބޮޑުވަޒީރު މަހިންދްރާ ރާޖަޕަކްސާގެ ދަރިކަލުން ނަމާލް ރާޖަޕަކްސާ ރާއްޖެ ވަޑައިގެންފިއެވެ.
ނަމާލް މިއަދު ރާއްޖެއަށް ވަޑައިގެންނެވިއިރު، އޭނާއަށް ވެލާނާ އިންޓަނޭޝަނަލް އެއާޕޯޓުން މަރުހަބާ ދެންނެވީ ޔޫތު މިނިސްޓަރު އަހުމަދު މަހްލޫފެވެ. މަހްލޫފާއި ނަމާލަކީ ގާތް ދެ ބޭފުޅުންނެވެ.
މެޗު ބައްލަވާލެއްވުމަށް ރާއްޖެ ވަޑައިގަތުމަށް ފަހު ނަމާލް ވިދާޅުވީ ރާއްޖެއަށް އަލުން އެނބުރި ވަޑައިގެންނެވުމަކީ އުފާ ކުރައްވާ ކަމެއް ކަމަށާއި، ރާއްޖެއާއި ލަންކާ އަކީ އަބަދުވެސް ގާތް ގުޅުމެއް އޮންނަ ދެ ގައުމު ކަމަށެވެ.
ކެންޔާ އަށް ކުރެއްވި ދަތުރު ނިންމަވާލެއްވުމަށް ފަހު، އެނބުރި ލަންކާއަށް ވަޑައިގަތުމުގެ މަގުމަތީގައި ނަމާލް ރާއްޖެ ވަޑައިގެންނެވިއިރު، މިއަދުގެ މެޗު ބައްލަވާލެއްވުމަށް ފަހު މިރޭގެ ވަގުތެއްގައި އޭނާ ގައުމަށް ފުރާ ވަޑައިގަންނަވާނެއެވެ.
ލަންކާގެ ފަހު މެޗުގައި މިއަދު ރާއްޖެއާ ވާދަ ކުރާއިރު، އޭގެ ކުރިން ކުޅުނު ތިން މެޗުގެ ތެރެއިން ނޭޕާލާއި ބަންގްލަދޭޝް އާ ދެކޮޅަށް ކުޅުނު މެޗުތަކުގައި އެ ޓީމު ބަލިވެ، އިންޑިއާ އާއި ދެކޮޅަށް ކުޅެ ވަނީ އެއްވަރު ކޮށްފައެވެ. އެހެންވެ މި މުބާރާތުން އިތުރަށް ކުރިއަށް ދިއުމުގެ ފުރުސަތު ލަންކާއަށް ވަނީ ގެއްލިފައެވެ.
މިހާތަނަށް ރާއްޖެ ދެ މެޗު ކުޅެފައިވާއިރު، ފުރަތަމަ މެޗުގައި ނޭޕާލާއި ވާދަކޮށްގެން ވަނީ ބަލިވެފައެވެ. އަދި ބަންގްލަދޭޝާއި ވާދަކޮށް ވަނީ މޮޅުވެފައެވެ. އެހެންކަމުން މުބާރާތުގައި ރާއްޖެއަށް ކުރިއަށް ދިއުމުގެ ފުރުސަތު އަދިވެސް އެބައޮތެވެ.
ރާއްޖެއާއި ލަންކާ ކުޅޭ މެޗު އޮންނާނީ މިއަދު 4:00 ޖަހާއިރު، ގަލޮޅު ރަސްމީ ދަނޑުގައެވެ.
