މާލެއިން ފެނުނު 37 ކޮވިޑް-19 ގެ ކޭސްތަކާ އެކު، މިއަދު 84 މީހުން ރާއްޖެ އިން ކޮވިޑަށް ޕޮޒިޓިވް ވެއްޖެއެވެ.
އެޗްޕީއޭ އިން މިރޭ އާންމުކުރި ތަފާސްހިސާބުތަކުން ދައްކާ ގޮތުގައި ރާއްޖެ އިން މިއަދު ކޮވިޑަށް ޕޮޒިޓިވްވީ ޖުމްލަ 84 މީހުންނެވެ. އޭގެ ތެރޭގައި ހިމެނެނީ މާލެއިން ޕޮޒިޓިވްވި 37 މީހުންނާއި، ރަށްރަށުން ޕޮޒިޓިވްވި 37 މީހުންނާއި، ރިސޯޓުތަކުން ޕޮޒިޓިވްވި ނުވަ މީހުންގެ އިތުރުން ސަފާރީއަކުން ޕޮޒިޓިވްވި އެކަކެވެ.
މިއާއެކު ރާއްޖެ އިން ކޮވިޑަށް 83،332 މީހުން ވަނީ ޕޮޒިޓިވް ވެފައެވެ. އޭގެ ތެރެއިން 81،404 މީހުން ބަލިން ރަނގަޅުވެފައި ވާއިރު، 1،686 މީހުން އަދިވެސް ރަނގަޅެއް ނުވެއެވެ. މީގެ ތެރެއިން 18 މީހުންނަށް އަންނަނީ ހޮސްޕިޓަލްތަކުގައި ފަރުވާ ދެމުންނެވެ.
ރާއްޖެ އިން ދުވާލަކު 100 އަށް ވުރެ ގިނަ މީހުން ކޮވިޑަށް ޕޮޒިޓިވްވަމުން އައިތާ ދުވަސްތަކެއް ފަހުން އިއްޔެ އެ އަދަދު ވަނީ 100 އަށް ވުރެ ތިރިވެފަ އެވެ. ވެރިރަށް މާލޭގައި ކޮވިޑުގެ ކޭސްތައް އެއްވަރެއްގައި ހިފެހެއްޓުނު ނަމަވެސް، ބައެއް ރަށްރަށުން ކޮވިޑު ފެނި، 20 ރަށެއް ވަނީ މޮނިޓަރިންނަށް ލާފައެވެ.
ކޮވިޑުގެ ހާލަތު ރާއްޖޭގައި ކޮންޓްރޯލް ކުރެވިފައި ވާއިރު، ސަރުކާރުން އަންނަނީ ވެކްސިން ދިނުމުގެ ބޮޑު ޕްރޮގްރާމެއް ހިންގަމުންނެވެ. މީގެ ތެރެއިން ވެކްސިން ޖެހޭ އާބާދީގެ 70 ޕަސެންޓު ފުރަތަމަ ޑޯޒް ޖަހާފައި ވާއިރު، 60 ޕަސެންޓާއި ގާތް ކުރާ އަދަދެއްގެ އާބާދީން ވަނީ ވެކްސިންގެ ދެ ޑޯޒް ޖަހައި ފުރިހަމަ ކޮށްފައެވެ.
