ކޮވިޑާ ގުޅިގެން ތ. ވޭމަންޑޫ، ގއ. މާމެންދޫ އަދި ތ. ދިޔަމިގިލި މޮނިޓަރިން ހާލަތަށް ގެނެސްފިއެވެ.
"ދަ ޕްރެސް" އަށް މައުލޫމާތު ދެއްވަމުން ވޭމަންޑޫ ކައުންސިލްގެ ރައީސް ރަޝްވާން އާދަމް ވިދާޅުވީ، އެރަށް މޮނިޓަރިން އަށް ލާފައިވަނީ އަލާމަތްތައް ހުރެގެން ފްލޫ ކްލިނިކަށް ދެއްކި މީހަކު ޕޮޒިޓްވެ، ކޮންޓެކްޓް ޓްރޭސިންއިން ނެގުނު ސާމްޕަލް ތެރެއިން އިތުރު 2 މީހަކު ޕޮޒިޓިވް ވުމާ ގުޅިގެން ކަމަށެވެ.
ދިޔަމިގިލި މޮނިޓަރިން ހާލަތަށް ގެނެސްފައިވަނީ މިމަހު 13 ވަނަ ދުވަހު ނެގި ސާމްޕަލްތަކެއް ޕޮޒިޓިވްވުމާ ގުޅިގެން ކަމަށް އެރަށު ކައުންސިލްގެ ރައީސް އަހްމަދު މޫސާ "ދަ ޕްރެސް" އަށް ވަނީ މައުލޫމާތު ދީފައެވެ.
އަހްމަދު މޫސާ ވިދާޅުވީ އެރަށުގައި ހުން އައިސް މީހުން އުޅޭތާ ދުވަސް ކޮޅެއް ވެއްޖެ ކަމަށާ އެހެންކަމުން ސެލްތު ސެންޓަރުން ބައެއް ގޭގެއަށް ގޮސް ސާމްޕަލްތައް ނަގާފައިވާ ކަމަށެވެ.
އެގޮތުން 70 ސާމްޕަލް އެއް ނެގި އިރު އޭގެ ތެރެއިން 14 މީހަކު ޕޮޒިޓިވް ކަމަށް އޭނާ ވިދާޅުވިއެވެ.
"ދަ ޕްރެސް" އަށް މައުލޫމާތު ދެއްވަމުން މާމެންދޫ ކައުންސިލްގެ ރައީސް އަހްމަދު އަޒީޒު ވިދާޅުވީ އެރަށް މޮނިޓަރިން ހާލަތައް ގެނެސްފައިވަނީ އެރަށުގައި ކޮވިޑް ހަލުވި ކަމާއެކީ ފެތުރެމުންދާތީ ކަމަށެވެ. އެގޮތުން މިއަދު ވެސް 9 މީހަކު ޕޮޒިޓިވް ވެފައިވާ ކަމަށް އޭނާ ވިދާޅުވިއެވެ.
މި ވަގުތު 22 ރަށެއް މޮނިޓަރިންގާ އޮތްއިރު، މޮނިޓަރިންގެ ހާލަތުގައި އޮތް ރަށްތަކުގެ ތެރެއިން އެންމެ ގިނަ ދުވަސްވެފައިވަނީ ރ. ދުވާފަރެވެ. އެ ރަށް މޮނިޓަރިންގެ ހާލަތަށް ގެނައީ މިދިޔަ މެއި މަހުގެ 25 ވަނަ ދުވަހުއެވެ.
