އައްޑޫ ސިޓީގައި ކޮވިޑް-19ގެ ކޭސްތައް އިތުރުވާތީ ހަރުކަށި ފިޔަވަޅުތައް އަޅައިފިއެވެ.
އައްޑޫ ސިޓީ ކައުންސިލުން ނެރުނު އިއުލާނެއްގައި ބުނީ ކޮވިޑާ ގުޅިގެން އެޗްޕީއޭއިން އިއްޔެ އައްޑޫސިޓީ ހިތަދޫ، މަރަދޫ، މަރަދޫފޭދޫ އަދި ފޭދޫ މޮނިޓަރިން އަށް ލާފައިވެއެވެ. އަދި އެޗްޕީއޭއިން ހިތަދޫ، މަރަދޫ، މަރަދޫފޭދޫ އަދި ފޭދޫ ގައި ފިޔަވަޅުތަކެއް އަޅަން އަންގާފައިވާ ކަމަށް ވެސް އިއުލާނުގައި ބުނެއެވެ.
އެޅުމަށް ހަމަޖެހިފައިވާ ފިޔަވަޅުތައް:
- އާއްމުކޮށް ބާއްވާ އެއްވުންތަކާއި ޕާޓީތައް ބޭއްވުން ދެ ހަފްތާއަށް މެދުކަނޑާލުން.
- ހިތަދޫ، މަރަދޫ، މަރަދޫފޭދޫ އަދި ފޭދޫގެ ސްކޫލްތައް ދެ ހަފްތާއަށް ބަންދުކުރުން. އަދި މިނިސްޓްރީ އޮފް އެޑިއުކޭޝަނުންއަންގަވާ ގޮތެއްގެ މަތިން ގްރޭޑް9 އަކުން މަތީގެ ގްރޭޑްތަކުގެ ކިޔެވުން ރައްކާތެރިކަމުގެ ފިޔަވަޅުތަކާއެކު ކުރިއަށްގެންދިއުން.
- މިރޭ 09:00 އިން ފެށިގެން ފަތިހު 04:00 ގެ ނިޔަލަށް، ކާފިއު ވަގުތު ކަމުގައި ހަމަޖައްސާ، މިވަގުތު ތަކުގައި ބޭރަށް ނިކުތުން މަނާވުން. އަދި ކޮންމެހެން ބޭރަށް ދާންޖެހޭނަމަ އައްޑޫ އީއޯސީގެ ހުއްދައާއެކު ބޭރަށްދިއުން.
- ގާޑިޔާ، ހޮޓާ ކެފޭ، ރެސްޓޯރެންޓް ފަދަ ކާބޯތަކެތީގެ ހިދުމަތްދޭ ތަންތަނުން 09:00 ގެ ނިޔަލަށް ހުޅުވައިގެން ހިދުމަތްދިނުމާ، އަދި 10:00 އާ ހަމައަށް ދެންނެވުނު ތަންތަނުން ޑެލިވަރީގެ ހިދުމަތް ދިނުން.
- ފިހާރަތަކުން 09:00 ގެ ނިޔަލަށް ހުޅުވައިގެން ހިދުމަތްދިނުމާ، އަދި 10:00 ގެ ނިޔަލަށް ޑެލިވަރީގެ ހިދުމަތްދިނުން.
އޭގެ އިތުރުން، އޮގަސްޓް 30، 2021 ވަނަ ދުވަހުން ފެށިގެން އައްޑޫ ސިޓީން ފުރާ އެންމެންގެ ޕީސީއާރް ނެގެޓިވް ނަތީޖާއަކާއެކު ފުރުމުގެ ހުއްދަ ދިނުމާއި ޒަރޫރީ ބޭނުމަށް ދަތުރުކުރާ އެންމެހާ ފަރާތްތައް އަޅާފައިވާ އެންމެހާ ފިޔަވަޅުތަކާ އެއްގޮތަށް އަމަލުކުރުމަށް ވަނީ އަންގާފައެވެ.
އަދި މޮނިޓަރިން ހާލަތުގައި އައްޑޫއިން ދަތުރުކުރެވޭނީ އައްޑޫއީ، އޯސީގެއޭސީގެ ހުއްދަ ލިބިގެން ކަމަށް ކައުންސިލް އިދާރާއިން ބުނެއެވެ. ކައުންސިލުން ވަނީ އެންގުންތަކަކީ އެންމެހާ ރައްޔިތުންގެ ސަލާމަތާއި ރައްކާތެރިކަމަށްޓަކައި އަންގާ އެންގުންތަކެއް ކަމަށްވާތީ އެ އެންގުންތަކަށް ހުރިހާ ފަރާތްތަކުން އަމަލުކުރުމަށް އެދިފައެވެ.
އައްޑޫގެ ގުޅިފައިވާ ރަށްތައް މޮނީޓަރިން ހާލަތަށް ގެނެސްފައިވާއިރު އިއްޔެވެސް އައްޑޫ އިން ވަނީ 18 މީހަކު ކޮވިޑަށް ޕޮޒިޓިވް ވެފައެވެ. އެ ކޭސްތަކުގެ ތެރެއިން 11 ކޭސް ފެނިފައިވަނީ މަރަދޫ އިން ކަމަށްވާއިރު ހަތް ކޭސް ފެނިފައިވަނީ ހިތަދޫންނެވެ.
އޭގެތެރޭގައި ހިމެނެނީ 12 ޑައިރެކްޓް ކޮންޓެކްޓުންނާ، ފަސް ފްލޫ ސާމްޕަލް އާއި އެއް ރެންޑަމް ސާމްޕަލްއެވެ.
