ހިޔާ މަޝްރޫއުގެ ފްލެޓުތަކުގެ އެތެރޭގެ މަސައްކަތްތައް ކުރުމުގެ އުސޫލު އާންމުކޮށް އިއުލާނު ކޮށްފިއެވެ.
އެޗްޑީސީން ބުނީ ހިޔާ މަޝްރޫއުގެ ދަށުން ހުޅުމާލެ ފޭސް-2 ގައި އިމާރާތްކޮށްފައިވާ 16 ޓަވަރުގައި ހިމެނޭ 6,720 ފުލެޓު ލިބިފައިވާ ފަރާތްތަކަށް ފުލެޓު ހަވާލުކުރުމުގެ ކަންކަން ޖުލައި 14، 2021އިން ފެށިގެން ކުރަމުންގެންދާ ކަމަށެވެ. އަދި އިއްޔެއިން ފެށިގެން ޓަވަރުތަކަށް ކަރަންޓްގެ ހިދުމަތް ފޯރުކޮށްދޭން ފަށާފައިވާ ކަމަށެވެ.
އެހެންކަމުން، ފެލްޓުތަކުގެ ފިނިޝިން މަސައްކަތް ކުރުމުގައި އަމަލުތައް ބަހައްޓަންވީ ގޮތް އަންގާ ދިނުމުގެ ގޮތުން ހިޔާ މަޝްރޫއުގެ ފްލެޓުތަކުގެ އެތެރޭގެ މަސައްކަތްތައް ކުރުމުގެ އުސޫލު އެކުލަވާލާފައިވާ ކަމަށް އެޗްޑީސީން ބުނެއެވެ.
އެއުސޫލުގައި ހިމެނޭ ބައެއް ކަންތަައްތަކުގެ ތެރޭގައި ފުލެޓު އެތެރޭގައި ޕާޓިޝަނެއް ހަރުކޮށް، ބައި ކުރާނަމަ، އިމާރާތުގެ އެތެރޭގައި ވައިދަތުރުވުމަށް ހުރަސްނޭޅޭނެ ގޮތަށް، އިމާރާތް ކުރުމުގައި ޓަވަރަށް ލޯޑް(ބަރުދަން) އިތުރުނުވާނެ ގޮތަށް ބަރުދަންލުއިތަކެތި ބޭނުންކޮށްގެން ކުރެވިދާނެއެވެ. އަދި މަސައްކަތް ފެށުމުގެ ކުރިން ޕާޓިޝަންޖަހާނެ ގޮތުގެ ކުރެހުން، ބޭނުން ކުރާނެ ތަކެތި އަދި ހަރުކުރާނެ ގޮތް ހުށަހަޅާ، އެޗްޑީސީގެ ހުއްދަ ހޯދަންޖެހޭނެއެވެ. ފުލެޓުގެ ފާރެއް ތަޅާލުމަށްފަހު ކޮޓަރި ވަކިކޮށް ނުވަތަ ގުޅުވުމަކީ ކަނޑައެޅިގެން މަނާކަމެއް ކަމަށް މިއުސޫލުގައިވެއެވެ.
އޭގެ އިތުރުން އިމާރާތުގެ ސްޓްރަކްޗަރަށް ގެއްލުން ނުވާނެ ގޮތަށް، އިމާރާތުގެ އެތެރޭގެ ދޮރުތައް ހުރިތަންބަދަލު ކުރުމުގައި، މޭޝަނަރީ ވޯލްސް (ކޮންކްރީޓް ފާރުފިޔަވައި) ގްރައިންޑާ ބޭނުން ކޮށްގެން ކަނޑައިގެން ބަދަލު ކުރެވިދާނެއެވެ. އަދި މަސައްކަތް ފެށުމުގެ ކުރިން ދޮރުތަކަށް ގެންނަން ބޭނުންވާ ބަދަލުތަކުގެ ކުރެހުން ހުށަހަޅާ، އެޗްޑީސީގެ ހުއްދަ ހޯދަންޖެހޭނެއެވެ.
އެޗްޑީސީގެ ހުއްދައާ ނުލާ ފުލެޓަށް އެއްވެސް ބަދަލެއް ގެނައުމަށްފަހު އެބަދަލުގެ ސަބަބުން ފުލެޓަށް ލިބޭ ކޮންމެ ގެއްލުމެއްގެ ޒިންމާ އުފުލަންވާނީ ފުލެޓު ވެރި ފަރާތުން ކަމަށް ވެސް އުސޫލުގައި ބުނެއެވެ.
