ކޮވިޑް-19 ހަލުހިކަމާއެކު ފެތުރެމުން ދާތީ އއ. ހިމަންދޫގައި ޖަމާއަތުގައި ނަމާދުކުރުން މެދުކަނޑަލައިފިއެވެ.
ހިމަންދޫ ކައުންސިލުން ބުނީ ދުނިޔޭގައި ހަލުވިކަމާއެކު ފެތުރެމުންދާ ކޮވިޑް ރާއްޖޭގައި ހަލުވިކަމާއެކު ފެތުރެމުންދާތީ، ސަރުކާރުގެ ކަމާގުޅޭ އިދާރާތަކުން ގިނަގުނަ ފިޔަވަޅުތަކެއް އަޅުއްވަމުންދާ ކަމަށެވެ. އެގޮތުން މިމަހު ތިން ވަނަދުވަހު ކޮވިޑްގެ ބަލިމީހުންތަކެއް ފެންމަތިވެ، ކޮމިއުނިޓީ ސްޕްރެޑަކަށް ދިއުމުން، ހިމަންދޫ މޮނިޓަރިންގެ ހާލަތައް ގެނެސް ރައްކާތެރިކަމުގެ ގިނަގުނަ ފިޔަވަޅުތަކެއް އަޅަން ފަށާފައިވާ ކަމަށް ކައުންސިލުން ވަނީ ބުނެފައެވެ.
ނަމަވެސް ހިމަންދޫގައި ކޯވިޑް ދުވަހުން ދުވަހަށް އިތުރުވެ އިއްޔެގެ ނިޔަލަށް ނެގި 356 ސާމްޕަލްގެ ތެރެއިން 142 މީހުން ޕޮޒިޓިވް ވެފައިވާ ކަމަށް ކައުންސިލުން ވަނީ ބުނެފައެވެ.
ކައުންސިލްުން ބުނީ ކޮވިޑް ހިމަންދޫގައި ކޮންޓްރޯލް ކުރުމަށް ރަށުލެވެލްގައި ކައުންސިލާ، ޓާސްކުފޯހާ ގުޅިގެން ގިނަގުނަ ފިޔަވަޅުތަކެއް އަޅަމުންދާ ކަމަށާއި އިތުރަށް މިއަދުގެ ފަތިސްނަމާދުން ފެށިގެން މިމަހު 19 ވަނަވާ ދުވަހުގެ ރޭ އިޝާ ނަމާދުގެ ނިޔަލަށް ހިމަންދޫ މަސްޖިދުލް އުލާގައި ފަރުޟު ނަމާދުތަކާ ހުކުރު ނަމާދުގެ ޖަމާއަތް ވަގުތީމެދުކަނޑާލުމަށް އިސްލާމިކް މިނިސްޓްރީން ސިޓީއިން އަންގަވާފައިވާ ކަމަށެވެ.
މިދަނޑިވަޅުގައި މިސްކިތުގެ ޖަމާއަތުގައި ނަމާދު ނުކުރި ނަމަވެސް ފަރުޟު ފަސް ނަމާދު ބަރާބަރަށް އަދާކުރުމަށާ، ސުންނަތް ނަމާދު ގިނަކޮށް، ޤުރުއާން ކިޔަވާ، ގިނަގިނައިން ދުއާކޮށް، އިސްތިޣްފާރު ކުރުމަށް ހިމަންދޫގެ ރައްޔިތުންނަށް ކައުންސިލުން ވަނީ ނަސޭހަތްތެރިވެފައެވެ.
